नेपालगन्ज : उद्योग, वाणिज्य तथा आपूर्ति मन्त्री रमेश रिजालले नौवस्ता औद्योगिक क्षेत्रलाई चाडो सञ्चालनमा ल्याउन नेपाल सरकार तयार रहेको बताएका छन् ।
नेपालगन्ज उद्योग वाणिज्य संघले बिहीबार बिहान गरेको अन्तरक्रियामा उद्योगी, व्यवसायीको गुनासोलाई सम्बोधन गर्दै उनले भने, ‘नौवस्ता औद्योगिक क्षेत्रको विषयमा यहाँका माननीय ज्युहरुले पनि बारम्बार मसँग कुरा गरिरहनु भएको छ, हाम्रो राठौर माननीय जी र माननीय आशा जि, उहाँहरु यो विषयमा चिन्तित हुनुहुन्छ ।’
उद्योगी व्यवसायीलाई बढीभन्दा बढी सुविधा दिएर नौवस्ता औद्योगिक क्षेत्रमा आउने वातावरण बनाउन सरकार तयार रहेको बताए । नेपाल सरकारले न्युनतम शुल्क लिएर त्यस भित्रका जग्गा उपलब्ध गराउने मन्त्री रिजालले विश्वास दिलाए ।
अर्को प्रसंगमा उनले मुलुकको आर्थिक क्षेत्रको निराशा चाडै अन्त्य हुने ठोकुवा गरे । विगतमा कोरोना महामारी र पछिल्लो समयमा रसिया र युक्रेनको युद्धका कारण आर्थिक समस्या बल्झिएको उनको भनाई छ । ‘विगतमा कोरोना महामारी, त्यसपछि रसिया र युक्रेनको युद्धले पनि हामी समस्याग्रस्त छौं, धेरै दिन जादैन अब यो समस्या,’ रिजालले भने ।
उद्योगी, व्यवसायीले भोग्नु परेको ब्याजदरको समस्या पनि अब घट्दै जाने विश्वास दिलाए । ‘यो मुलुक तपाई हामी सबैको हो, निराश हुन जरुरत नै छैन, तपाईहरुलाई नेपाल सरकारले हरेक सुविधा दिन्छ,’ उनले भने । सो क्रममा नेपालगन्ज उद्योग वाणिज्य संघका अध्यक्ष टंकबहादुर धामीले उद्योगी, व्यवसायीको विभिन्न मागसहितको ज्ञापन पत्र बुझाएका थिए ।
उक्त कार्यक्रममा नेपाल उद्योग वाणिज्य महासंघका केन्द्रीय सदस्य एवम् नेपालगन्ज उद्योग वाणिज्य संघका निर्वतमान अध्यक्ष अब्दुल वाहिद मन्सुरी, संघका प्रथम उपाध्यक्ष चिरिञ्जीवी ओलीले राज्यको नीतिका कारण उद्योगी ब्यवसायीहरु पलायन हुने अवस्थामा पुगेको दुखेसो पोखेका थिए ।
सो अवसरमा उद्योग वाणिज्य तथा आपूर्ति मन्त्रालयका सचिव मधुकुमार मरासिनी, बाँकेका प्रमुख जिल्ला अधिकारी विपिन आचार्य, नेपाली काँग्रेस बाँकेका सभापति नारायणप्रसाद गौडेल, उपसभापति गोपालप्रसाद अधिकारी, नेपालगन्ज उद्योग वाणिज्य संघका पुर्वअध्यक्ष कृष्णप्रसाद श्रेष्ठ, नेपाल जडिबुटी ब्यवसायीको संघका केन्द्रीय अध्यक्ष टंकप्रसाद शर्मा, प्रजातान्त्रिक उद्योगी ब्यवसायी संघ बाँकेका उपाध्यक्ष ध्रुब दाहाल, संघका कार्यसमिति, पदाधिकारी लगायत उद्योगी व्यवसायीको सहभागिता रहेको थियो ।
उक्त कार्यक्रममा हरित अभियन्ता हेमन्तराज काफ्लेले मन्त्री रिजाललाई सितल चिनीको विरुवा उपहार स्वरुप हस्तान्तरण गरेका थिए । कार्यक्रम सञ्चालन संघका कार्यबाहक महासचिव टेकबहादुर खड्काले गरेका थिए ।
