नेपालगन्ज : भारतबाट भन्सार छलेर अबैध रुपमा सामान भित्र्याउने क्रम अझै रोकिएको छैन । नेपालगन्जबाट ठुलो परिमाणको चिनी दैलेख लैजादै गरेको अवस्थामा सुर्खेत प्रहरीले बरामद गरेको घटना सेलाउन नपाउँदै पुनः अर्को घटना सार्वजनिक भएको हो ।
यि घटनाले नेपाल-भारत सिमापारीबाट कसरी सजिलैसँग सामान अबैध रुपमा भित्रिन्छ भन्ने कुरालाई थप पुष्टी गरिदिएको छ । सिमाक्षेत्र जमुनाहादेखी चौलिका चोकसम्म नेपाल प्रहरी, सशस्त्र प्रहरी र भन्सार कार्यालयका गरी करिव आधा दर्जन जति चेकपोष्ट राखिएका छन् ।
यि पोष्ट कतै दैनिक उपभोग्य सामान किनेर ल्याउने सर्बसाधारण नागरिकलाई तर्साउने र तस्करहरुका सामान मिलेमतोमा भित्र्याउने उद्धेश्यले राखिएका त होईनन् ? भन्ने आमनागरिकका मनमा प्रश्न उब्जिन थालेका छन् । सिमापारीबाट अबैध रुपमा भित्र्याइएको ठुलो परिमाणको सामान नेपालगन्जमा बरामद हुनुले सिमा क्षेत्रमा सुरक्षा गर्ने सुरक्षाकर्मी (सशस्त्र प्रहरी र नेपाल प्रहरी) र भन्सार कर्मचारीको कार्यशैलीमाथी प्रश्न उब्जिएको छ ।
विभागमा लाखौं रुपैयाँ बुझाएर कर्मचारीहरुले भन्सार कार्यालय नै रोजेर सरुवा माग्ने, नेपाल प्रहरी र सशस्त्र प्रहरीमा पनि जुनियर कर्मचारीदेखी सिनियर अधिकृत समेत सिमा नाकामा आउन तलदेखी माथीसम्म पैसा बुझाउनुपर्ने प्रवृत्ती छ । जसले गर्दा सिमा क्षेत्रमा तस्कर बढिरहेको बताइन्छ । तस्करसँग लाइन मिलाएर नेपाल प्रहरी र सशस्त्र प्रहरीकै स्कटिङमा सिमापारीबाट अबैध सामान भित्रिने गरेको प्रत्यक्षदर्शी बताउँछन् ।
प्रत्यक्षदर्शीका अनुसार सुरक्षाकर्मी (प्रहरी र सशस्त्र प्रहरी)ले लाइन मिल्दा गुपचुपमै सिमापारीबाट अबैध सामान सहजै प्रवेश गराउँछन् भने लाइन नमिल्दा बरामद गर्ने गरेको पाइएको छ । ‘लाइन मिल्दासम्म प्रहरी र सशस्त्र प्रहरीका हाकिमहरु गुपचुपमा गर्छन्, तस्करले सिमापारीबाट सामान ओसार्दा स्कटिङ गर्न आफ्ना सुरक्षाकर्मीलाई नै फिल्डमा खटाउँछन्, तस्करले लाइन दिन छाडेपछि भने सामान बरामद गरेको देखाउँछन् ,’ एक प्रत्यक्षदर्शीले भने ।
भारतबाट सहजै भित्रिएको ठुलो परिमाणको अबैध सामान नेपालगन्ज उपमहानगरपालिका वडा नम्बर १ राना चोक नजिकबाट बरामद गरिएको छ । वडा प्रहरी कार्यालय नेपालगन्जबाट खटिएको प्रहरी टोलीले १ लाख ४२ हजार रुपैयाँ बराबरको ७१ बोरा चामल र ७० हजार रुपैयाँ बराबरको १४ बोरा चिनी गरी कुल २ लाख १२ हजार रुपैयाँको खाद्यान्न सामान बरामद गरेको हो ।
गत असार २९ गते साँझ करिव ६ बजेतिर भारतबाट अबैध रुपमा भन्सार छलेर चोरी पैठारी गरी ल्याइएका सामान बेवारिसे अवस्थामा रहेको छ भन्ने सूचना प्राप्त भएपछि कार्यालयबाट खटिएको टोलीले बरामद गरेको वडा प्रहरी कार्यालयले प्रष्ट्याएको छ ।
स्थानीय बासिन्दाले भने प्रहरीले नै अबैध सामान ल्याउने तस्करलाई भगाएको आरोप लगाएका छन् । दुई दिनअघि भएको उक्त घटनालाई वडा प्रहरी कार्यालयले बुधबार मात्र आफ्नो आधिकारिक फेसबुकबाट सार्वजनिक गरेको छ ।
सम्बन्धित समाचार :
सेटिङमै भित्रिन्छन् सिमापारीबाट अबैध सामान
नेपालगन्ज भन्सारबाट सेटिङमा छिरेको चिनी सुर्खेतमा बरामद !
