नेपालगन्ज : नेपालगन्जबाट दैलेख जादै गरेको अवस्थामा सुर्खेत प्रहरीले शनिबार राती भे १ ख ३१४४ नम्बरको ट्रक नियन्त्रणमा लियो । ट्रक चेकजाँच गर्दा प्रहरीले ५० किलोका २६ र २५ किलोका २४ बोरा गरेर कुल ५० बोरा चिनी फेला पार्यो ।
सुर्खेतस्थित नेपाल प्रहरीको सुब्बा कुना चेकपोष्टले उक्त चिनी बरामद गरेको थियो । यो त एउटा पछिल्लो घटना मात्रै हो । भन्सार कर्मचारी र सुरक्षाकर्मीको मिलेमतोमा तस्करले भन्सार शुल्क नतिरेरै ठुलो परिमाणका सामान भित्र्याउने गरेका छन् ।
भन्सार कार्यालयले सर्बसाधारण नागरिकका लागि भने एक सय रुपैयाँ भन्दा बढीको सामानको पनि भन्सार शुल्क लिने गरेको छ । सर्बसाधारण नागरिकले दैनिक रुपमा उपभोग गर्नका लागि सामान ल्याउँदा कडा निगरानी गर्ने भन्सार कर्मचारी र सुरक्षाकर्मीले सिमापारीबाट सेटिङमा भने करोडौं मुल्यका सामान भित्र्याउने गरेको प्रत्यक्षदर्शी बताउँछन् । पछिल्लो यस घटनाले पनि सर्बसाधारणको आरोपलाई पुष्टी गरेको छ ।
नेपालगन्जस्थित नेपाल-भारत सिमाक्षेत्र जमुनाहादेखी चौलिका चोकसम्म भन्सार कार्यालय, नेपाल प्रहरी र सशस्त्र प्रहरीका गरी आधा दर्जनबढी चेकपोष्टहरु राखिएका छन् । यिनै चेकपोष्ट भएर भन्सार कर्मचारी र सुरक्षाकर्मीको मिलेमतोमा तस्करले भन्सार शुल्क नतिरेरै ठुलो परिमाणको सामान भित्र्याउने गरेको प्रत्यक्षदर्शीको भनाई छ ।
भन्सार सुरक्षाका लागि सरकारले सशस्त्र प्रहरी बललाई विशेष जिम्मेवारीका साथ परिचालन गरेको छ । सशस्त्र प्रहरीले नेपालगन्जको भन्सार सुरक्षाका लागि डिएसपीको कमाण्डमा सशस्त्र प्रहरी परिचालन गरेको छ । यस्तै बाँकेको विभिन्न सिमाक्षेत्रमा सशस्त्र प्रहरीका बिओपी स्थापना छन् । तर यिनै सशस्त्र प्रहरीहरु तस्करसँगै मिलेर सामान तस्करीमा संलग्न हुने गरेको स्थानीयको गुनासो छ ।
भारतबाट अबैध रुपमा सामान भित्रिरहँदा यहाँका उद्योगी, ब्यवसायी समेत निराश भइरहेका छन् । नेपालगन्ज उद्योग वाणिज्य संघका पुर्वअध्यक्ष कृष्णप्रसाद श्रेष्ठ सिमा क्षेत्रमा थरी-थरीका चेकपोष्ट हुँदा पनि ठुलो परिमाणको सामान अबैध रुपमा भित्रिनु लज्जाको विषय भएको बताउँछन् ।
‘चोरी निकासी पूर्ण रुपमा नियन्त्रण गर्नुपर्छ भनेर हामीले बारम्बार भन्दै आएका छौं, तरपनि नियन्त्रणमा आउन सकेको छैन,’ उनले भने ‘अबैध रुपमा सामान भित्रिदाँ निजी क्षेत्रले जसरी घाटा ब्यहोर्नु परेको छ, सरकारले पनि ठुलो मात्रामा राजश्व गुमाइरहेको छ ।’
कर्मचारी र सुरक्षाकर्मीको मिलेमतो बिना सिमापारीबाट अबैध रुपमा सामान भित्रिनै नसक्ने उनको जिकिर छ । पछिल्लो समयमा बाँकेका विभिन्न अबैध नाकाबाट समेत तस्करले अबैध रुपमा सामान भित्र्याउने क्रम चलिरहेको स्थानीय बासिन्दाले बताएका छन् ।
जिल्लाको नरैनापुर, डुडुवा, जानकी, खजुरा गाउँपालिका अन्र्तगत पर्ने अबैध सिमा नाकाबाट पनि सुरक्षाकर्मीको मिलेमतोमा सामान भित्रिने क्रम चलिरहेको बताइएको छ । सिमापारीबाट अबैध सामान भित्रिरहेको विषयमा प्रतिक्रिया लिन सम्पर्क गर्दा नेपालगन्ज भन्सार कार्यालयका प्रमुखले फोन उठाएनन् ।
कार्यालयकाअधिकृत डिल्लुप्रसाद शर्माले भने भन्सार नियम अनुसार सामान जाँचपास गरेर भन्सार शुल्क लिने गरिएको दाबी गरे । ‘हामीले नियम अनुसार काम गरिरहेका हुन्छौंं, तर कसरी र कहाँबाट अबैध रुपमा सामान भित्रियो भन्ने विषयमा हामीलाई जानकारी हुदैन,’ कार्यालयका सूचना अधिकारी शर्माले भने । नेपालगन्जबाट लगिएको ठुलो परिमाणको चिनी सुर्खेतमा बरामद भएको घटनाका विषयमा भने कार्यालयलाई जानकारी नभएको उनले बताए ।
यो पनि पढ्नुस् :
नेपालगन्ज भन्सारबाट सेटिङमा छिरेको चिनी सुर्खेतमा बरामद !
