काठमाडौं : अविरल वर्षाका कारण आएको बाढी, पहिरो र डुबानबाट अहिलेसम्म मृत्यु हुनेको संख्या ८७ पुगेको छ । अझै ७२ जना बेपत्ता भएको गृह मन्त्रालयले जनाएको छ ।
सशस्त्र प्रहरी बल नेपालका केन्द्रीय प्रवक्ता, सशस्त्र प्रहरी नायब महानिरीक्षक कुमार न्यौपानेले शनिबार बेलुका ८ः३० बजे सम्मको रिपोर्ट अनुसार ८७ जनाको मृत्यु भएको जानकारी दिए । उनका अनुसार बाढी र पहिरोमा परेर ३६ जना घाइते भएका छन् । काठमाडौं उपत्यकामा मात्रै ४८ जनाको मृत्यु भएको छ । काठमाडौंमा २५, भक्तपुरमा पाँच र ललितपुरमा १८ जनाको मृत्यु भएको छ ।
उनका अनुसार कोशी प्रदेशमा १० र बागमती प्रदेशमा २९ जनाको मृत्यु भएको छ । त्यसैगरी कोशी प्रदेशमा ९, मधेस प्रदेशमा १, काठमाडौं उपत्यकामा २१, बागमतीमा ३९ र लुम्बिनी प्रदेशमा २ जना बेपत्ता भएका छन । काठमाडौं उपत्यकापछि सबभन्दा बढी काभ्रेमा १४ जनाको मृत्यु भएको छ ।
त्यसपछि मकवानपुरमा ७, पाँचथरमा ५, सिन्धुपाल्चोकमा ४, दोलखामा ३ जनासहित विभिन्न जिल्लामा गरेर कुल ८७ जनाको मृत्यु भएको मन्त्रालयले जनाएको छ । त्यस्तै उपत्यकापछि सबैभन्दा बढी काभ्रेमै २६ जना बेपत्ता छन । यसैगरी पाँचथरमा ५, झापामा ४, सिन्धुपाल्चोकमा ५ सहित अन्य जिल्लामा गरेर ७२ जना बेपत्ता भएको बताइएको छ ।
