राजावादी आन्दोलनका 'कमाण्डर' दुर्गा प्रसाई पक्राउ

राजनीति

Home
राजनीति
राजावादी आन्दोलनका 'कमाण्डर' दुर्गा प्रसाई पक्राउ

राजावादी आन्दोलनका 'कमाण्डर' दुर्गा प्रसाई पक्राउ

दुर्गा प्रसाई । फाईल तस्बिर

काठमाडौं : राजावादी आन्दोलनका 'कमाण्डर' दुर्गा प्रसाई भारतबाट पक्राउ परेका छन् । राजसंस्था पुनः स्थापनाको मागसहित भएको प्रदर्शनमा प्रसाईले हिंसात्मक गतिविधिको नेतृत्व गरेका थिए । नेपाल प्रहरीले भारतको आसाम राज्यमा उनलाई ट्रयाक गरी भारतीय प्रहरीको सहयोगमा पक्राउ गरेको हो ।

भारतीय सुरक्षा अधिकारीसँग समन्वय गरेर उनलाई काँकडभिट्टा नाका हुँदै नेपाल ल्याउने तयारी भइरहेको नेपाल प्रहरीको उच्च स्रोतले जनाएको छ । गत चैत १५ गते काठमाडौंको तीनकुनेमा ‘राजवादी जनआन्दोलन’ का नाममा भएको प्रदर्शन हिंसात्मक बनेपछि दुई जनाको मृत्यु भएको थियो ।

उक्त प्रदर्शनमा सरकारी र निजी सम्पत्तिमा व्यापक तोडफोड, आगजनी र लुटपाट गरिएको थियो । आन्दोलनको नेतृत्व प्रसाईले नै गरेका थिए । उक्त दिनको घटनापछि प्रसाई फरार थिए । तीनकुनेमा प्रहरीलाई नै गाडीले ठक्कर दिँदै अघि बढेको भिडियो सार्वजनिक भएपछि उनी सम्पर्कविहीन बनेका थिए ।

फरार भएका प्रसाईले सामाजिक सञ्जालमार्फत दुई वटा भिडियो सन्देश सार्वजनिक गरेका थिए । उनले आफूलाई असुरक्षित महसुस भएको र त्यसकारण ‘लुकेर बसेको’ दाबी गरेका थिए । तीनकुने घटनापछि राप्रपाका वरिष्ठ उपाध्यक्ष रविन्द्र मिश्र, महामन्त्री डा. धवलशमशेर राणा लगायतलाई प्रहरीले नियन्त्रणमा लिएर अनुसन्धान अघि बढाइरहेको छ ।

प्रकाशित मिति: बिहीबार, चैत २८, २०८१ २२:०८

प्रतिक्रिया दिनुहोस्