थमन विक हत्याका फरार यादवलाई दिएको सदस्यता खारेज

राजनीति

Home
राजनीति
थमन विक हत्याका फरार यादवलाई दिएको सदस्यता खारेज

थमन विक हत्याका फरार यादवलाई दिएको सदस्यता खारेज

काठमाडौं : सशस्त्र प्रहरीका तत्कालिन असई थमन विक हत्याका फरार अभियुक्त महोत्तरीका देवेन्द्र यादवलाई दिएको पार्टी सदस्यतालाई नेपाली कांग्रेसले खारेज गरेको छ । उनीमाथि फौजदारी कानूनी कारबाही प्रक्रियामा रहेकाले को सदस्यता खारेज गरिएको कांग्रेसले जनाएको छ । बाँकेको राप्ती सोनारी-२ मदुई निवासी बिकको मधेस आन्दोलनका क्रममा हत्या भएको थियो ।

'बुझिँदै गर्दा निज व्यक्तिउपर फौजदारी कानूनी कारबाही प्रक्रिया रहेको भन्ने थाहा हुन आएको हुँदा निजले प्राप्त गरेको पार्टी सदस्यता खारेज गरिएको जानकारी गराइन्छ,’ शुक्रबार जारी गरिएको विज्ञप्तिमा कांग्रेसका मुख्यसचिव कृष्णप्रसाद पौडेलले उल्लेख गरेका छन् ।

उनका अनुसार बिहीबार बिहान ९ः४५ मा नेपाली कांग्रेसका सभापति शेरबहादुर देउवा र महामन्त्री विश्वप्रकाश शर्माले पार्टी केन्द्रीय कार्यालयमा सभापतिको कार्यकक्षमा समसामयिक राजनीतिक विषयका सन्दर्भमा छलफल गरिरहेका बेला पार्टीका केही साथीहरूले महोत्तरीका देवेन्द्र यादवलाई लिएर कार्यकक्षभित्र प्रवेश गरी पार्टी सदस्यता प्रदान गर्न आग्रह गरेबमोजिम सभापति देउवा र महामन्त्री शर्माले सदस्यता प्रदान गरेका थिए ।

यादवलाई कानूनी कारबाहीको प्रक्रियामा ल्याउने सन्दर्भमा गृह प्रशासनको ध्यानाकर्षणसमेत गराइएको जनाइएको छ । देउवा र शर्माले सदस्यता प्रदान गरेपछि उनीहरुको तीव्र आलोचना समेत भएको थियो । त्यसपछि कांग्रेसले तथ्य जाँच गरेर उनको सदस्यता खारेज गरिएको जनाएको छ ।

प्रकाशित मिति: शुक्रबार, साउन ३०, २०८२ १८:२१

प्रतिक्रिया दिनुहोस्