कांग्रेस लुम्बिनी प्रदेश समिति सदस्य पोखरेल पदमुक्त

राजनीति

Home
राजनीति
कांग्रेस लुम्बिनी प्रदेश समिति सदस्य पोखरेल पदमुक्त

कांग्रेस लुम्बिनी प्रदेश समिति सदस्य पोखरेल पदमुक्त

देउखुरी : नेपाली कांग्रेस लुम्बिनी प्रदेश समितिले प्रदेश समिति सदस्य विष्णु पोखरेल जिम्मेवारीबाट मुक्त भएका छन् । निर्वाचनका बेला प्रतिनिधि सभा सदस्य पदका उम्मेदवार भरत कुमार शाहलाई हराउन भूमिका खेलेको भन्दै पार्टी केन्द्रमा उनी विरुद्ध उजुरी परेको थियो । केन्द्रीय निर्देशन अनुसार नेपाली कांग्रेस लुम्बिनी प्रदेश सभापति अमरसिंह पुनले पोखरेललाई जिम्मेवारीबाट मुक्त गरेका हुन् । पोखरेललाई साउन ११ गते जिम्मेवारीबाट मुक्त गरिएको हो ।

‘उहाँका विरूद्ध रूपन्देहीको निर्वाचन क्षेत्र नम्बर ५ बाट प्रतिनिधि सभा सदस्यमा उम्मेदवार बनेका भरत कुमार शाहले उजुरी गर्नु भएको थियो, त्यसै कारण पदमुक्त गर्न भनेको हुनुपर्छ,’ पुनले भने । २०७९ सालको निर्वाचनमा शाहले २७ हजार १ सय २० मत पाएपनि नेकपा एमाले उम्मेदवार वासुदेव घिमिरेसँग पराजित भएका थिए । शाहले आफूलाई हराउन पोखरेलले भूमिका खेलेको आरोप लगाउँदै आएका छन् ।

२०७४ सालको निर्वाचनमा पोखरेल सोही निर्वाचन क्षेत्रको प्रदेशसभा निर्वाचन क्षेत्र क बाट प्रदेश सभा सदस्यमा उम्मेदवार बनेका थिए । २०७९ मा पनि सोही निर्वाचन क्षेत्रमा उम्मेदवारका आकांक्षी थिए । तत्कालीन सत्ता गठबन्धनका बीचमा भएको सहमति अनुसार उक्त निर्वाचन क्षेत्र नेकपा माओवादी केन्द्रको पोल्टामा परेपछि पोखरेल उम्मेदवार बन्नबाट बञ्चित भएका थिए । यता पदमुक्त गरिएका पोखरेलले आफूलाई अहिलेसम्म कसैले कारबाही गरेको र पदमुक्त गरेको भन्ने जानकारी नदिएको प्रतिक्रिया दिएका छन् ।

प्रकाशित मिति: बिहीबार, भदौ १२, २०८२ १५:२६

प्रतिक्रिया दिनुहोस्