नेपालगन्ज : 'जेन-जी' आन्दोलनको फाइदा उठाउँदै आगजनी र लुटपाटका घटना भएका छन् । नेपाली सेनाले शान्ति सुरक्षाको जिम्मा लिन ढिलाई गर्दा देशभरका सरकारी संरचना भने ध्वस्त भएका छन् ।
बाँकेको नेपालगन्ज र कोहलपुर क्षेत्रका प्रायः सबै सरकारी कार्यालयमा आगजनी गरिएको छ । प्रर्दशनकारीले बाँकेमा जनप्रतिनीधि तथा केही राजनीतिक दलका नेताका घरमा समेत आगजनी गरिदिएको खबर प्राप्त भएको छ । जेन-जी आन्दोलनको फाइदा उठाउँदै अराजक समुहले घुसपैठ गरेर मंगलबार दिउँसो आन्तरिक राजश्व कार्यालय नेपालगन्ज, नेपालगन्ज भन्सार कार्यालय, नेपालगन्ज उपमहानगरपालिका कार्यालय लगायत विभिन्न सरकारी कार्यालयबाट केही सामान लुटपाट गरिएको छ ।
आन्तरिक राजश्व कार्यालयले बरामद गरेर राखेको महंगो मुल्यका ठुलो परिमाणको मदिरा( रेडलेभल, ब्ल्याक लेभल, बियर) तथा गुट्का जन्य सामाग्री लुटपाट गरेर लगेका छन् । यस्तै भन्सार कार्यालय भित्र राखिएका र बाहिर राखिएका सामान पनि लुटपाट गरिएको खबर प्राप्त भएको छ ।
आन्दोलनमा सहभागी हुन आएका ब्यक्तिले सरकारी कार्यालयका एसी, फ्रिज, इन्र्भटर, पंखा, कम्प्युटर, ल्यापटप लगायत सामान लुटेको प्रत्यक्षदर्शीले जानकारी दिएका छन् । नेपालगन्जको ट्राफिक चोकमा रहेको ट्राफिक कार्यालय परिसरमा प्रवेश गरेर पनि लुटपाट गर्ने प्रयास भएको छ ।
आगजनी र लुटपाटपछि सेनाले लियो जिम्मेवारी
सरकारी कार्यालयमा आगजनी र लुटपाटपछि मात्र नेपाली सेनाले शान्ति सुरक्षाको जिम्मा लिएको छ । नेपाली सेनाका प्रधानसेनापति अशोकराज सिग्देलको सम्बोधन लगत्तै मंगलबार राती १० बजेदेखी सेना बाहिर निस्केको हो । नेपालगन्ज, कोहलपुर लगायत स्थानमा नेपाली सेना परिचालन भईसकेको छ । अहिले नेपाली सेनाहरु ठाउँ ठाउँमा परिचालन भएका छन् ।
बाँकेका प्रमुख जिल्ला अधिकारीसहित उच्च सुरक्षा अधिकारीहरु पनि नेपाली सेनाको ब्यारेकमा बसेका छन् । नेपाली सेनाले घर बाहिर ननिस्कन माईकिङ गरिरहेका छन् । सेनाले सुरक्षा जिम्मा लिएपछि नगरबासीले शान्ति, सुरक्षाको अनुभुति भने गर्न पाएका छन् ।
