बाँके(टिटिहिरिया) : नेपाली कांग्रेसका लुम्बिनी प्रदेश सभापति अमरसिंह पुनले सिक्टा सिंचाइँ आयोजनाको अधुरा नहरलाई पुरा गराउन आफु अग्रसर रहने प्रतिवद्धता जनाएका छन् । नेपाली कांग्रेसको तर्फबाट बाँके क्षेत्र नम्बर ३ को प्रतिनिधि सभा सदस्य उम्मेदवार समेत सभापति पुनले कतिपय ठाउँमा सिक्टा सिंचाइँ आयोजनाले नहर निर्माणको काम तत्कालका लागि अधुरै छाडेको पाइएकाले स्थानीय किसानहरुको माग अनुसार अधुरो नहरलाई पूर्णता दिन अग्रसर रहने स्पष्ट पारेका हुन् । सिक्टाको पश्चिम मूल नहरले समेट्न नसक्दा टिटिहिरिया लगायत त्यस क्षेत्रका थुप्रै गाउँहरु सिंचाइँबाट बञ्चित छन् ।
क्षेत्र नम्बर ३ अन्तरगत बैजनाथ गाउँपालिका वडा नम्बर ८ टिटिहिरियामा मंगलबार(आज) पार्टीको प्रचार कार्यालय उद्घाटन कार्यक्रमलाई सम्बोधन गर्दै उनले किसानका हरेक समस्यालाई समाधान गर्न आफुले आवश्यक पहल गर्ने प्रतिवद्धता जनाए । आगामी फागुन २१ गते हुने निर्वाचनका लागि नेपाली कांग्रेस आफ्नो नीति र नेतृत्व परिवर्तन गरेर जनतामाझ आईसकेकाले अहिले सबैभन्दा नयाँ दल भनेकै नेपाली कांग्रेस भएको दाबी गरे ।
निर्वाचनपछि कांग्रेसले पार्टी सभापति गगन थापालाई देशको प्रधानमन्त्री बनाउने घोषणा नै गरिसकेको र अब बन्ने कांग्रेसको सरकारले किसानका हरेक समस्यालाई उच्च प्राथमिकतामा राखेर नयाँ र वैज्ञानिक हिसाबले काम गर्ने बताए । किसानलाई सिंचाइँ सुविधाका साथै समयमै मल, बीउ आवश्यक पर्ने भएकाले अब बन्ने सरकारले किसानका समस्यालाई समाधान गर्ने विश्वास दिलाए ।
२०७९ सालको प्रतिनिधि सभा निर्वाचनपछि बाँकेमा सबैभन्दा बढी ३ नम्बर क्षेत्रमा संघिय सरकारको बजेट आएको कांग्रेस प्रदेश सभापति पुनले जानकारी दिए ।
२०७९ सालमा क्षेत्र नम्बर ३ का बासिन्दाले कांग्रेस सह-महामन्त्री किशोरसिंह राठौंरलाई जिताएका कारण अन्य क्षेत्रभन्दा धेरै बजेट यहाँ आएको उनको भनाई छ । क्षेत्र नम्बर ३ को बैजनाथ, खजुरा र जानकी गाउँपालिका तथा नेपालगन्ज १६ र १७ मा तत्कालिन सांसद राठौंरको अग्रसरतामा सडक, पुल, कल्भर्ट, भवन, कटान नियन्त्रण जस्ता थुप्रै कामहरु भएको उम्मेदवार पुनले जानकारी दिए । ‘हाम्रो नेता आदरणीय किशोरसिंह राठौंर ज्यूले सकेजति यो क्षेत्रमा काम गर्नु भएकै हो, कतिपय कामहरु यस वर्ष सम्पन्न गर्ने उहाँको योजना थियो, तर जेन-जी आन्दोलनपछि संसद नै विघटन भएपछि उहाँका दिर्घकालिन योजनाहरु अहिले अधुरो हुन पुगेका छन्,’ सभापति पुनले भने, ‘अब मैले उहाँका अधुरा कामहरुलाई अवश्य पुरा गर्नेछु ।’
अर्को प्रसंगमा कांग्रेस प्रदेश सभापति पुनले २०५२ सालदेखी बाँकेसँग आफ्नो सम्बन्ध जोडिएको बताए । तत्कालिन माओवादी द्धन्द्धका कारण आफु रोल्पाबाट बाँकेको जानकी गाउँपालिकामा आएर बसोबास गर्दै आएको र बाँके क्षेत्र नम्बर ३ को भुगोलसँग आफु नजिक रहेको बताए । कार्यक्रममा नेपाली कांग्रेसका समानुपातिक उम्मेदवार दुखीराम लोनिया, लुम्बिनी प्रदेशका सांसद बादशाह कुर्मी, कांग्रेस नेता चन्तराम थारु, नेपाली कांग्रेसका महासमिति सदस्य एवम् बैजनाथ गाउँपालिका उपाध्यक्ष निर्मला रोकाय लगायतले पनि क्षेत्र नम्बर ३ मा कांग्रेसबाट निर्वाचित भएका स्थानीय, प्रदेश र संघीय जनप्रतिनिधिको नेतृत्वमा धेरै विकासका कामहरु भएको बताए ।
सो क्रममा कांग्रेस महासमिति सदस्य एवम् बैजनाथ गाउँपालिका अध्यक्ष प्रकाशबहादुर शाही, क्षेत्रीय सभापति मोहम्मद नक्की खाँ, महासमिति सदस्य लक्ष्मीनारायण शाह, देबबहादुर खत्री, जिल्ला सहसचिव बिनोद थारु, क्षेत्रीय सचिव ज्ञानबहादुर ओली, पार्टीका बैजनाथ गाउँपालिका सभापति देवबहादुर केसी, कांग्रेस नेता एवम् बैजनाथ-८ का वडाअध्यक्ष भग्गन थारु सहित पार्टीका विभिन्न तहमा रहेका नेता, कार्यकर्ता तथा स्थानीय बासिन्दाको सहभागिता रहेको थियो ।
बैजनाथका सबै वडामा प्रचार कार्यालय स्थापना
बाँकेको क्षेत्र नम्बर ३ अन्तरगत रहेको बैजनाथ गाउँपालिकाका सबै(८ वटै) वडामा मंगलबारसम्म नेपाली कांग्रेसको प्रचार प्रसार कार्यालय स्थापना गरिएको छ । नेपाली कांग्रेस बैजनाथ गाउँपालिका सभापति देवबहादुर केसीका अनुसार यही माघ १६ गतेबाट बैजनाथका वडाहरुमा प्रचार कार्यालय उद्घाटन गर्न सुरु गरिएको थियो ।
बैजनाथका सबै वडामा प्रचार कार्यालय उद्घाटन भएसँगै वडा तहमा रहेका नेता, कार्यकर्ताहरु जनताको घर-घरमा पुगेर मत माग्नेछन् । बैजनाथपछि क्रमशः खजुराका ८ वटा वडा, जानकीका ६ वटा वडा र नेपालगन्जका २ वटा वडामा पनि प्रचार कार्यालय स्थापना गर्ने नेपाली कांग्रेस क्षेत्र नम्बर ३ का सभापति मोहम्मद नक्की खाँले जानकारी दिए । केहीदिन अघि क्षेत्र नम्बर ३ अन्तरगत बाँकेको खजुरा, बैजनाथ र जानकी गाउँपालिका स्तरिय प्रचार कार्यालय स्थापना भईसकेका छन् ।
