बाँके(नरैनापुर) : नेपाली काँग्रेस बाँके क्षेत्र नम्बर १ अन्तर्गत रहेको नरैनापुर गाउँपालिकाका ६ वटै वडामा प्रचार–प्रसार कार्यालय स्थापना गरिएको छ।
आज (बुधबार) वडा नम्बर ४, ५ र ६ मा प्रचार कार्यालय स्थापना गरिएसँगै नरैनापुरका सबै वडामा प्रचार कार्यालय स्थापना गरिएको काँग्रेस क्षेत्र नं. १ का सभापति पोषण केसीले जानकारी दिए। नरैनापुर गाउँपालिका वडा नं. ४ नरैनापुरमा वडा सभापति हरिराम बाहुन, वडा नं. ५ मटेहियामा वडा सभापति पवन मौर्य र वडा नं.६ जमुनीमा वडा सभापति रामअचल मौर्यको अध्यक्षतामा वडा प्रचार कार्यालय स्थापना गरिएको क्षेत्रीय सभापति केसीले बताए ।
कोहलपुर र नरैनापुरमा प्रचार कार्यालय स्थापना गर्ने काम पूरा भएको उल्लेख गर्दै क्षेत्रीय सभापति केसीले भने, “भोलि (बिहीबार) देखि राप्तीसोनारी गाउँपालिकामा प्रचार कार्यालयहरु स्थापना गरिनेछ।” प्रचार कार्यालयको उद्घाटन काँग्रेस बाँकेका सभापति तथा क्षेत्र नं. १ का प्रतिनिधिसभा सदस्य पदका उम्मेदवार नारायण प्रसाद गौडेलले गरेका थिए ।
त्यसक्रममा उनले काँग्रेस बदलिएर आएको र अब देश बदल्ने योजनाका साथ अगाडि बढेकाले मतदाताहरुलाई ढुक्क भएर मतदान गर्न आग्रह गरे। जनताको सबैभन्दा नजिकको सारथी काँग्रेस भएको उल्लेख गर्दै उनले नरैनापुरको डुवान समस्या तथा कृषिमा झेल्दै आएका समस्याहरु समाधान गर्न योजनाबद्ध ढंगले काम गर्ने विश्वास दिलाए ।
नेपाली काँग्रेस लुम्बिनी प्रदेश सदस्य इसाक जोलाहले गौडेल सादगी र जनताको पीरमर्का बुझ्ने नेता भएकाले यो पटक उनलाई जिताउन आग्रह गरे।
काँग्रेस जिल्ला उपसभापति कृष्ण कार्कीले पार्टी एक ढिक्का भएर चुनावी अभियानमा उत्रिएको उल्लेख गर्दै विगतका तिक्तता बिर्सेर गौडेललाई जिताउन आग्रह गरे। क्षेत्रीय सभापति केसीले मुलुकको विषम परिस्थितिमा काँग्रेसले नेतृत्वदायी भूमिका निर्वाह गरेकाले अहिलेको अवस्थामा पनि काँग्रेसले मात्रै मुलुकलाई निकास दिन सक्ने बताए।
कार्यक्रममा जिल्ला सदस्य राजकुमार मौर्य, अग्रज नेता रामचन्द्र मौर्य, महाधिवेशन प्रतिनिधि कृष्ण विक, वडाअध्यक्ष मनोज शर्मा, मुस्लिम नेता इस्रत अली मुकेरी, दलित संघका लुम्बिनी उपाध्यक्ष मौलयआर्य धोबी लगायतका नेताहरुले कार्यकर्ताहरूलाई अलमलमा नपरी काँग्रेसको पक्षमा अडिग रहन आग्रह गरेको पार्टीका प्रवक्ता डिल्ली गिरीले जानकारी दिए।
