नेपालगन्ज : बाँके क्षेत्र नम्बर २ का जसपा नेपाल उम्मेदवार कमरुद्दिन राई मतदातासँग भेटघाटमा ब्यस्त देखिएका छन् । क्षेत्र नम्बर २ अन्तरगत बुधबार नेपालगन्ज उपमहानगरपालिकाको त्रिवेणीमोड, सुनार मन्डी, पानी टंकी, बागेश्वरी मन्दिर लगायत क्षेत्रमा पुगेका राईलाई मतदाताले स्वागत गरेका थिए ।
‘मतदाताको माया, स्नेह, सद्भाव र आतिथ्यताले हामीलाई हौसला मिलेको छ,’ राईले भने, ‘हामी पुगेको ठाउँमा अहिलेसम्म निराश बन्न परेको छैन ।’ उम्मेदवार कमरुद्दिनले नेपालगन्ज र डुडुवाका धेरै मतदातालाई भेटेर अन्तरक्रिया गरिसकेका छन् ।
नेपालगन्ज उपमहानगरको उपमेयर भएर काम गरेका उनी संसदिय निर्वाचनमा अहिले उम्मेदवार बनेपछि मतदाता भेटघाटलाई झनै तीव्रता दिएका हुन् । ‘हामी निरन्तर भेटघाटमा छौँ, हामी जान नसकेको ठाउँबाट किन नआएको भन्ने गुनासो आउँछ, हामीलाई मतदाताले आफै फोन गरेर बोलाउँछन,’ जसपा नेता राजनराना मगरले भने ।
नेपालगन्जको उपमेयर हुँदा जनताको काम गरेका कारण कमरुद्दिनलाई सांसदको निर्वाचनमा सहज भएको उनले बताए । मधेसको मुद्धा अन्य दलसँग नभएकोले मधेसी र मुस्लिम समुदायमा उनको पकड राम्रो भएको विश्लेषण गरिएको छ । ‘मधेसी, मुस्लिमको आवाज बोल्ने उम्मेदवारलाई भोट दिने योजना बनाएका छौँ,’ त्रिवेणी मोडमा भेटिएका एक मतदाताले भने ।
मतदाताले देखाएको सौहार्दताले आत्मवल बढेको जसपा नेपालका उम्मेदवार राईले बताए । उनले मधेसी, मुस्लिममात्र नभई अन्य समुदायका मतदाताले समेत माया गरेको बताए । ‘मतदाताले हामीलाई सोँचेभन्दा धेरै साथ दिनु भएको छ, यसले हामीलाई हौसला मिलेको छ,’ कमरुद्धिनले भने ।
