राईको आग्रह, 'कामको मुल्यांकन गरेर मतदान गर्नुस्'

राजनीति

Home
राजनीति
राईको आग्रह, 'कामको मुल्यांकन गरेर मतदान गर्नुस्'

राईको आग्रह, 'कामको मुल्यांकन गरेर मतदान गर्नुस्'

नेपालगन्ज : आसन्न प्रतिनिधि सभा निर्वाचनमा नेकपा एमालेको तर्फबाट बाँके क्षेत्र नम्बर २ मा उम्मेदवार बनेका मोहम्मद इश्तियाक राईले कामको मुल्यांकन गरेर मात्र मतदान गर्न आग्रह गरेका छन् । नेपालगन्ज-२१ पुरैनीमा शुक्रबार नेकपा एमालेको निर्वाचन लक्षित कार्यालय उद्घाटन गर्दै पूर्व मन्त्री राईले स्थानीय स्तरमै युवाले काम पाउने र मनग्य आम्दानी गर्न सक्ने गरी आफूले योजना बनाइरहेको बताए ।

युवाहरूलाई कामकाजी बनाउँदै आवश्यक आयआर्जन गर्न सक्षम गराउन आफू प्रयत्नरत रहेको उनको भनाई छ । अरूले जस्तो झुठो आश्वासन र अति महत्वाकांक्षी कुराहरू आफूले नगर्ने बताएका उम्मेदवार राईले किसानहरूले सहज र सस्तो मल पाउने वातावरण बनाउने दाबी गरे । उनले भने “चुनाव जित्नकै लागि अरूले जस्तो मल फ्याक्ट्री खोल्छु भनेर म झुठो आश्वासन दिँदैन । तर, यत्ति चाहिँ भन्छु कि किसानले चाहिएको बेलामा सहज र सस्तोमा मल पाउने वातावरण बनाउन म अग्रसर हुन्छु ।”

निर्वाचन क्षेत्र नम्बर २ मा २०७४ सालमा आफू सांसद भएपछिको ५ वर्षे कार्यकाल र आफू पराजित भएपछिको पछिल्लो ३ वर्ष तुलना गरेर मूल्यांकन गर्न पनि मतदातासमक्ष राईले आग्रह गरे । ‘‘मेरो जित हुँदाको समय र मेरो पराजय भएपछिको समय तुलना गर्दा नै स्पष्ट हुन्छ यहाँ कसले काम गर्छ, कसले काम गर्दैन ?’’ राईले भने ।

पछिल्लो तीन बर्षमा समाजमा झगडा गराउने र विभाजन ल्याउने थुप्रै घटनाहरू बाँकेमा भएको उदाहरणहरू दिँदै राईले आफू सधैं नै धार्मिक सद्भाव र एकताको पक्षमा अडिग रहेको बताए । निर्वाचन जित्नका लागि समाजमा विभाजन ल्याउन चाहनेहरूलाई समाजले चिन्नुपर्ने उनको भनाई थियो । आफूले यस पटक उल्लेख्य मत ल्याएर विजयी हुने संकेत गर्दै राईले २०७९ को निर्वाचनमा २०७४ सालको भन्दा धेरै मत ल्याए पनि अन्य सबै दलहरू मिल्दा आफू पछि परेको बताए ।

२०७४ सालमा २१ हजार ५ सय ७५ मत ल्याएर प्रतिनिधिसभा सदस्य निर्वाचित राई २०७९ मा २३ हजार ५ सय २० मत ल्याएर पराजित भएका थिए । बाँकेका केही राजनीतिज्ञ र विरोधी व्यक्तिहरू सधैं नै आफूलाई अनावश्यक बदनाम गर्न लागिपरेको आरोप पनि राईले लगाए । “इश्तियाक राईले जित्यो भने आफूहरू पछि परिन्छ भन्ने डरले केही मानिसहरू असम्बन्धित कुराहरूमा पनि मलाई जोडिदिन्छन् । स्थानीय तहका कामहरूमा समेत त्यहीँका जिम्मेवार व्यक्तिलाई केही नभनेर मलाई देखाइन्छ । यस्ता गलत कुराहरू जनताले बुझ्नु जरुरी छ,” राईले भने ।

प्रकाशित मिति: शुक्रबार, माघ २३, २०८२ १९:३८

प्रतिक्रिया दिनुहोस्