नेपालगन्ज : उपेन्द्र यादव नेतृत्वको जनता समाजवादी पार्टी नेपालका केन्द्रिय सचिव कमरुद्धिन राईले आफ्नो उम्मेदवारीका विषयमा बजारमा अनेक खालका भ्रम फैलाइएको गुनासो गरेका छन् । चुनाव हार्ने मानसिकताले गर्दा केही ब्यक्तिले आफ्नो उम्मेदवारीबारे गलत प्रचार गरेको बताए ।
नेपालगन्ज उपमहानगरपालिकाका निर्वतमान उपमेयर समेत रहेका राईले बाँके क्षेत्र नम्बर २ मा जसपा नेपालको तर्फबाट प्रतिनिधि सभा सदस्य पदमा उम्मेदवारी दिएर मतदाता भेटघाट गरिरहेका छन् । आफु मतदाता भेटघाटमै रहँदा केही उम्मेदवारले हार्ने मानसिकता देखाएर अर्नगल प्रचार गरेको एक अन्तरवार्तामा उल्लेख गरेका छन् ।
‘यो चुनाव हार्ने मानसिकता हो, उहाँ चुनावबाट भाग्नु खोज्नु भएको छ, हिम्मत छ भने म च्यालेन्जका साथ भन्छु, त्रिभुवन चोकमा आमने-सामने हुन तयार छु, मिडियाका मान्छे र भद्र ब्यक्तिका अगाडी मलाई उभ्याएर उहाँलाई सोध्नुस्,’ कमरुद्धिनले भनेका छन् । एमालेका तर्फबाट उम्मेदवार बनेका मोहम्मद इस्तियाक राईप्रति इंगित गर्दै कमरुद्धिनले भने, ‘उहाँ चुनाव हारिराख्नु भएको छ, उहाँले कतै ब्यानरमा केपी ओलीको मात्रै फोटो राख्नु भएको छ । कतै आफ्नो मात्रै फोटो राख्नु भएको छ, कतै जय मधेस भन्नु हुन्छ, कतै लाल सलाम कमरेड भन्नु हुन्छ ।’
आफु एजेण्डामा क्लियर भएको भन्दै आफ्नो भविष्य मतदाताको हातमा रहेको बताए । ‘म चुनाव लडिरहेको छु, म पैसाको भरमा चुनाव लडेको छैन, हामी कम छौं, तर कमजोर छैनौं, ढुक्क भएर सक्षम र भ्रष्टाचार नगर्ने ब्यक्तिलाई मतदान गर्नुस् ।’
