नेपालगन्ज : बाँके प्रतिनिधि सभा क्षेत्र नम्बर २ मा नेपाली कांग्रेसका उम्मेदवार शुधान्सु कोइरालाले आफुले अग्रजको सम्मानमा कहिल्यै कमी हुन नदिने प्रतिवद्धता जनाएका छन् । नेपाली कांग्रेसमा थुप्रै अग्रजले योगदान गरेको स्मरण गर्दै उनले आफुले जहिले पनि अग्रजको सम्मान गर्ने बताए ।
नेपालगन्ज उपमहानगरपालिका वडा नम्बर २ घरबारीटोलमा नेपाली कांग्रेसको प्रचार कार्यालय उद्घाटन कार्यक्रमलाई सम्बोधन गर्दै उनले कांग्रेस बाँकेका पुर्वसभापति एवम् चर्चित नेता स्वर्गिय रणेन्द्रबहादुर हमालको आर्दशलाई पछ्याउने प्रतिवद्धता जनाए ।नेपाली कांग्रेसभित्र थुप्रै अग्रज नेताहरु हुँदा हुदै पनि पार्टीले आफुलाई प्रतिनिधि सभा सदस्य पदको उम्मेदवार बनाएको स्पष्ट पार्दै भने, ‘हजुरको आर्शिवादले नै नेपाली कांग्रेसको जित सुनिश्चित भईसकेको मैले विश्वास लिएको छु, नेपाली कांग्रेसले जुन क्षेत्रबाट टिकट दिएको छ, यो क्षेत्र सुशिल कोइरालाको क्षेत्र हो, देशलाई संविधान दिएको सादगी नेताको क्षेत्र पनि हो ।’
नेपाली राजनीतिमा स्वर्गिय सुशिल कोइरालाले आफुलाई सादगी र निष्ठावान नेताको रुपमा चिनाएर गएको बताउँदै भने, ‘तपाईहरुलाई म विश्वास दिलाउन चाहन्छु, शुधान्सु कोइरालाले स्वर्गिय सुशिल कोइरालाको निष्ठामा कुनै दाग लाग्न दिनेछैन ।’ आफु प्रतिनिधि सभा सदस्य पदमा निर्वाचित भएपछि सुशासनको पक्षमा र भ्रष्टाचारका विरुद्ध आवाज उठाउने प्रतिवद्धता दोहोर्याए ।
‘संसदमा म हजुरहरुको भावनाको कदर गर्नेछु, म मा कहिल्यै पनि घमण्ड नआओस्, हामीले धेरै क्षेत्रका लागि काम गर्नुपर्नेछ, हजुरको सेवक भएर काम गर्नेछु,’ उनले भने । नेपाली कांग्रेस नेपालगन्ज-२ का वडासभापति प्रदिप श्रेष्ठको सभापतित्वमा सम्पन्न कार्यक्रममा नेपाली कांग्रेस बाँकेका कार्यबाहक सभापति गोपालप्रसाद अधिकारी, नेपाली कांग्रेस क्षेत्र नम्बर २ का सभापति रमेशकुमार गुप्ता, महिला संघ बाँकेका सभापति नारायणी रुपाखेती लगायतले बोलेका थिए ।
कार्यक्रममा प्रजातन्त्र सेनानी रहमत अलि अन्सारी ‘मोलहे बाबा’ लाई सम्मान गरिएको थियो । मतदाता भेटघाटका क्रममा उम्मेदवार कोइरालाले बुधबार नै डुडुवा गाउँपालिकाको वडा नम्बर ३ को बाबुपुरुवा, तिवारीपुरुवा, वनकटवा, बनकट्टी, सुर्यलाल पुर लगायत गाउँमा मतदातालाई भेट गरे । यस्तै नेपालगन्ज उपमहानगरपालिका वडा नम्बर ६ सहित विभिन्न वडा तथा पेशागत संगठनका पदाधिकारीलाई पनि भेटेर सहयोग गर्न अपिल गरेका छन् ।
