बाँके (बैजनाथ) : नेपाली कांग्रेसका तर्फबाट बाँके क्षेत्र नम्बर ३ का उम्मेदवार अमर सिंह पुनले आफ्नो चुनावी प्रचारलाई घरदैलो तथा टोल भेटघाट मार्फत तीव्र बनाएका छन् । कांग्रेसको लुम्बिनी प्रदेश सभापति समेत रहेका उनी समुदायका विभिन्न समूहसँग प्रत्यक्ष संवाद गर्दै स्थानीय समस्या र अपेक्षाहरू बुझ्न सक्रिय देखिएका छन् ।
पुनले भेटघाटका क्रममा त्यस क्षेत्रका युवाहरूलाई रोजगारी र उद्यमशीलताका अवसरहरू प्रदान गर्ने योजना प्रस्तुत गरे । साथै, महिला अधिकार, शिक्षा पहुँच, स्वास्थ्य सेवा सुधार र पूर्वाधार विकास जस्ता विषयमा आफ्नो प्रतिबद्धता दोहोर्याएका छन् । उनी स्थानीय बासिन्दासँगको अन्तरक्रियामा कांग्रेसले विगतमा गरेका विकास योजनाहरूको प्रगति देखाउँदै आगामी दिनमा थप सुधार गर्ने योजनाहरू सार्वजनिक गरेका छन् ।
उनका समर्थकहरू भन्छन्, पुनको सक्रिय र जनसहभागी शैलीले मतदातामा सकारात्मक प्रभाव पारेको छ । यसै क्रममा पुनले शुक्रबार बैजनाथ गाँउपालिका वडा नम्बर २ मकैबारी, पितमारी, डाँडा गुम्बा, गुननपुर लगायत गाउँमा मतदातासँग भेटघाट तथा अन्तरक्रिया गरेका छन् । सो क्रममा पार्टीका महासमिति सदस्य एवम बैजनाथ गाउँपालिका अध्यक्ष प्रकाशबहादुर शाही, पार्टीका बैजनाथ गाउँपालिका सभापति देवबहादुर केसी लगायत नेता तथा कार्यकर्ता, सर्बसाधारणको उपस्थिति रहेको थियो ।
नेपाली कांग्रेस लुम्बिनी प्रदेशका सभापति समेत रहेका उम्मेदवार पुनले ठाउँ-ठाउँमा विभिन्न पार्टी परित्याग गरेका व्यक्तिलाई कांग्रेसमा प्रवेश समेत गराईरहेका छन् । पुनले मतदातासँगको विश्वास र सहकार्यलाई आफ्नो सफलता सुनिश्चित गर्ने मुख्य आधार बनाउने दाबी गरेका छन् । बाँके क्षेत्र नम्बर ३ मा बैजनाथ, खजुरा, जानकी गाउँपालिकाका सबै वडा तथा नेपालगञ्ज उपमहानगरपालिकाको १६ र १७ नम्बर वडाहरु पर्दछन् ।
