नेपालगन्ज : नेपाली कांग्रेसको तर्फबाट बाँके क्षेत्र नम्बर २ का प्रतिनिधि सभा सदस्य पदका उम्मेदवार शुधान्सु कोइरालाले भ्रष्टाचारका विरुद्ध युवालाई साथ लिएर आफूले सधैं आवाज उठाउने प्रतिवद्धता ब्यक्त गरेका छन् । नेपाली कांग्रेस नेपालगन्ज उपमहानगरपालिका वडा नम्बर ८ मा मंगलबार (आज) प्रचार-प्रसार कार्यालय उद्घाटन कार्यक्रमलाई सम्बोधन गर्दै कोइरालाले भ्रष्टाचारका विरुद्ध आवाज उठाउँदै गर्दा कलिला भाईबहिनीले सहादत प्राप्त गरेको स्मरण गर्दै जेननी युवाहरुलाई साथमा लिएर नै भ्रष्टाचारका विरुद्ध आफू सडक र सदनमा बोलिरहने बताए ।
‘भ्रष्टाचारका विरुद्ध आवाज उठाउँदै गर्दा जेनजी आन्दोलनका क्रममा नेपालगन्जका दुई जना भाईहरु शुलभराज श्रेष्ठ र आयुष थापाले सहादत प्राप्त गर्नुभयो, म उहाँहरु दुबै जनाप्रति भावपूर्ण श्रद्धाञ्जली र परिवारमा गहिरो समवेदना प्रकट गर्दछु,’ उम्मेदवार कोइरालाले भने, ‘युवा भाईबहिनीहरुले बगाएको रगतलाई म कत्ति पनि खेर जान दिने छैन, म युवाहरुलाई साथमा लिएर भ्रष्टाचार विरुद्ध आवाज उठाउनेछु, सुशासन कायम गराउन नेतृत्व गर्नेछु ।’
जेनजी आन्दोलनका क्रममा देशले माओवादी द्वन्दको बेला भन्दा पनि अझ दर्दनाक रुपले क्षति ब्यहोरेको उनले स्मरण गरे । नेपाली कांग्रेसले जेनजी आन्दोलन र जेनजी युवाहरुको भावनालाई समेटेर आफ्नो नीति र नेतृत्व परिवर्तन गरिसकेको नेपाली कांग्रेस बाँकेका सचिव समेत रहेका युवा उम्मेदवार कोइरालाले प्रष्ट्याए । प्रतिनिधि सभा निर्वाचनपछि बन्ने सरकारमा नेपाली कांग्रेसले युवाहरुका लागि स्वरोजगार लगायतका विषयमा ठोस योजना ल्याउने उनले बाचा गरे ।
नेपाली कांग्रेसका पूर्व सभापति एवम् पूर्व प्रधानमन्त्री स्वर्गीय सुशील कोइरालाको निर्वाचन क्षेत्र रहेको बाँके–२ मा उम्मेदवार बन्न पाउँदा आफूलाई भाग्यमानी ठानेको बताउँदै उनले भने, ‘नेपाली कांग्रेसका सम्पूर्ण अग्रज नेता गणहरु, संगठनभित्र र बाहिरबाट पनि हाम्रो यस अभियानमा साथ दिनुभएको छ, सबैलाई म सम्मान गर्न चाहन्छु, मलाई निर्वाचित गराउनु भयो भने हजुरहरुको भावनालाई संसदमा पेश गर्नेछु, हजुरहरुलाई कहिल्यै पनि निराश हुन दिने छैन ।’
सादगी, त्यागी र निष्ठाका प्रतिक स्वर्गीय कोइरालाले जस्तै आफूले पनि कुनै दाग लाग्न नदिने उनले अठोट गरे । नेपाली कांग्रेस नेपालगन्ज उपमहानगरपालिका वडा नम्बर ८ का सभापति निजामुद्धिन सिद्धिकी ‘मुन्ना’ को सभापतित्वमा सम्पन्न भएको प्रचार–प्रसार कार्यालय उद्घाटनका क्रममा पार्टीका नेता प्रह्लाद लखेरले उम्मेदवार कोइरालाई मतदान गरेर जिताउन सबै वडाबासीलाई अपिल गरेका थिए ।
कार्यक्रममा महासमिति सदस्य निरञ्जन सिंह सिंजापति, लुम्बिनी प्रदेशका सांसदद्वय मिना सिद्दिकी र सुशिला नेपाली, नेपालगन्ज उपमहानगरपालिकाका मेयर प्रशान्त विष्ट, कांग्रेस नेता हेमन्त कर्माचार्य, महाधिवेशन प्रतिनिधि मुकुन्द केसी, जिल्ला कार्यसमिति सदस्य अशोक श्रेष्ठ, तरुण दल बाँकेका अध्यक्ष बीरेन्द्रबहादुर शाह, नेपालगन्ज–५ का कांग्रेस वडा सभापति मेराज हलवाई लगायतको उपस्थिती रहेको थियो ।
यसैबीच मंगलबार नै डुडुवा गाउँपालिका वडा नम्बर २ बेतहनी चोकमा आयोजित वडा स्तरिय भेलालाई सम्बोधन गर्दै कोइरालाले राप्ती नदिका कारण उत्पन्न डुवान र कटानको सवाल प्राथमिकतामा रहेको उद्घोष गरे । राप्तीको बाढीका कारण वर्षौदेखि खेती योग्य जमीन डुवान र कटान भइरहेको भन्दै उहाँले डुबान नियन्त्रण र कटान रोकथामका लागि आवश्यक पहलकदमी लिने विश्वास दिलाए ।
यूवा नेता कोइरालाले डुडुवाको समग्र समस्याबारे आफु जानकार मात्र नभई सम्वेदनशिल र जिम्मेवार रहने समेत दाबी गरे । उनले डडुवाको कृषि उत्पादन वृद्धिका लागि उचित सिंचाई र मलखादको व्यवस्थाका लागि समेत आफु प्रतिवद्ध रहेको बताए । राजनीतिमा संस्कार र इमानदारिता पनि जुरुरी रहेको बताउँदै उनले आफु त्यो संस्कारबाट दिक्षित भएको उल्लेख गरे । समाजसेवा गर्नका लागि राजनीतिमा आएकाले जनताको हरेक सवालमा आफु समर्पित रहने उनको जीकीर थियो ।
उनले भने–‘यहाँहरुले विश्वास गरेर मलाई सांसदमा जिताउनुस्, त्यो विश्वासलाई म शीरोधार्य गर्नेछु ।’अनेकन स्वार्थले पार्टीहरु खोल्ने, टुटने र फुटने भइरहेको प्रसंग कोट्याउँदै उनले भने –नेपाली कांग्रेसप्रति जनताको अपार विश्वास र माया रहेकाले आफु जित्नेमा विश्वस्त छु । नेपाली काँग्रेस महासमिति सदस्य राजकुमार बर्माले जनताको समस्या काँग्रेसले नै सम्वोधन गर्न सक्ने भन्दै यूवा उम्मेदवार कोइरालालाई जिताउने अवसर नगुमाउन आहवान गरे ।
कार्यक्रमका प्रमुख अतिथी समेत रहेका बर्माले अन्य दलका झुठा आश्वासनमा विश्वास नगर्न पनि अपील गरे । यस्तै नेपाली काँग्रेस महासमिति सदस्य नरेन्द्र चौधरीले पुरानो र भरपर्दो पार्टी काँगे्रस मात्रै भएकाले काँग्रेसकै उम्मेदवारलाई जिताउन अनुरोध गरे ।
नेपाली काँग्रेस डुडुवा २ का सभापति रामकुमार गोडियाको सभापत्विमा सम्पन्न भएको कार्यक्रममा नेपाली काँग्रेस प्रदेश ‘क’ का सभापति ज्ञानेन्द्रकुमार चौधरीले स्वागत मन्तव्य व्यक्त गरेका थिए । कार्यक्रममा नेपाली काँगे्रस बाँकेका पुर्वसभापति किरण कोइराला लगायतको उपस्थिती रहेको थियो ।
उम्मेदवार कोइरालाले मंगलबार नै नेपालगन्ज उपमहानगरपालिका वडा नम्बर १५ पिप्रहवा चोकमा प्रचार–प्रसार कार्यालय उद्घाटन, नेपालगन्ज उपमहानगरपालिका वडा नम्बर ९ मा प्रचार–प्रसार कार्यालय उद्घाटन र घरदैलो तथा नेपालगन्ज उपमहानगरपालिका वडा नम्बर ३ मा पनि प्रचार-प्रसार कार्यालय उद्घाटन र घरदैलो गरेको नेपाली कांग्रेस बाँके क्षेत्र नम्बर २ को सचिवालयले जनाएको छ ।
