नेपालगन्ज : जनता समाजवादी पार्टी नेपाल (जसपा)को तर्फबाट बाँके प्रतिनिधि सभा क्षेत्र नम्बर २ का उम्मेदवार कमरुद्धिन राईले चुनावको मुखमा पैसा बाँड्नेहरुलाई अस्वीकार गर्न मतदातालाई आग्रह गरेका छन् । नेपालगन्जमा बुधबार आयोजित बृहत र्याली तथा कोण सभालाई सम्बोधन गर्दै उनले भने, ‘यो चुनाव केवल चुनाव होइन, भाग्यको फैसला हो ।’
उम्मेदवार राईले फागुन २१ गते हुने निर्वाचनलाई केवल नियमित चुनावको रुपमा नहेर्न आग्रह गरे । उनले भने, ‘यो चुनाव जनताको भाग्य फैसला गर्ने अवसर हो, यसलाई सामान्य चुनावको रुपमा होइन, आफ्नो भविष्य तय गर्ने निर्णयको रूपमा लिनुपर्छ ।’ उनले जनतालाई भावनात्मक रूपमा जोड्दै प्रश्न गर्दै भने, ‘कोरोनाकालमा तपाईंहरूको दुःखमा को साथमा थियो ? अहिले भोट माग्न आउनेहरू त्यतिबेला कहाँ थिए ?’ उम्मेदवार राईले आफु सधैं जनताको साथमा रहेको दाबी गर्दै आगामी दिनमा पनि जनताकै बीचमा रहेर काम गर्ने प्रतिबद्धता व्यक्त गरे ।
नेपालगन्जमा ल्याइएका केही विकास योजनाको श्रेय गलत रूपमा लिइएको आरोप लगाए । ‘पूर्व प्रधानमन्त्री सुशिल कोइरालाले नेपालगन्जमा ल्याएको एडिबीको बजेटलाई इस्तियाक राईले आफैं ल्याएको भन्दै भ्रम फैलाइएको छ, जनताले सत्य बुझ्नुपर्छ,’ उनले प्रश्न गर्दै भने, ‘नेपालगन्जमा आकासे पुल कहाँ छ ?’ उम्मेदवार राईले आफु नेपालगन्ज उपमहानगरपालिकाको उपमेयर हुँदा आफ्नो कार्यकालका केही उपलब्धिहरू प्रस्तुत गर्दै शिक्षा, स्वास्थ्य तथा धार्मिक संरचनामा उल्लेख्य सुधार भएको दाबी गरे ।
नेपालगन्जमा १२ करोड रुपैयाँको लागतमा हनुमान मन्दिर निर्माण भइरहेको र बागेश्वरी मन्दिरको भौतिक संरचनामा सुधार गरिएको उनले जानकारी दिए । यस्तै भेरी अस्पतालको पूर्वाधार विकासमा जसपा नेतृत्वको योगदान रहेको उनले दाबी गरे । उपेन्द्र यादवको पहलमा स्वास्थ्य पूर्वाधार विस्तार भएको राईले उल्लेख गरे ।
कोण सभामा राईले बाँकेको दुडुवा गाउँपालिकाको अवस्था उल्लेख गर्दै अझै पनि खानेपानी र शौचालयजस्ता आधारभूत सुविधाको अभाव रहेको बताए । ‘त्यस्तो अवस्थामा विकास भयो भन्न मिल्दैन, विकास क्रमशः भइरहेको छ तर अझै धेरै काम बाँकी छ,’ उनले भने । राईले चुनावी विकृति र पैसाको प्रभावप्रति असन्तुष्टि व्यक्त गर्दै मतदातालाई सचेत रहन आग्रह गरे । ‘पैसा र बिरियानीमा बिक्ने मत हामीलाई चाहिँदैन,’ उनले भने ।
चुनाव अगाडी जनताको सुख दुःखमा साथ दिने व्यक्तिलाई मात्र समर्थन गर्न उनले आग्रह गरे । राईले आफ्नो उम्मेदवारी मधेशी, दलित, जनजाती तथा मुस्लिम समुदायको हक अधिकार सुनिश्चित गर्न केन्द्रित रहेको बताए । उनले भने, ‘मधेसीको अधिकार रक्षाका लागि मैले नेपालगन्ज उपमहानगरपालिकाको उप-प्रमुख पद त्यागेर आएको हुँ, अब जनताको अधिकार सुनिश्चित गर्ने जिम्मेवारी लिन चाहन्छु ।’
राजनीतिलाई व्यक्तिगत धन आर्जनको माध्यम बनाउने उम्मेदवारलाई परास्त गर्न उनको आग्रह छ । ‘इमान्दारिताका साथ छाता चिन्हमा मतदान गर्नुहोस्, चुनाव अगावै तपाईंको साथमा उभिनेहरूलाई सम्झनुहोस्, तर चुनावको मुखमा पैसा बाँड्नेहरूलाई अस्वीकार गर्नुहोस् ।’
