नेपालगन्ज : नेपाली कांग्रेसको तर्फबाट बाँकेको प्रतिनिधि सभा क्षेत्र नम्बर २ का उम्मेदवार शुधान्सु कोइरालासँग युवाहरुले आफुहरुको भावना अनुसार काम गर्न सुझाव दिएका छन् । नेपालगन्जमा बिहीबार विभिन्न क्षेत्रबाट प्रतिनिधित्व गरेका युवाहरुले नेपालको राजनीतिप्रति नयाँ पुस्तालाई आर्कषित गर्ने गरी काम गर्न आग्रह पनि गरे ।
विगतमा केही नेताले गल्ती गर्दा जेन–जी आन्दोलन उत्पन्न भएको स्मरण गराउँदै उनीहरुले नेपाली कांग्रेसले भने आफुलाई परिवर्तन गरेर यो निर्वाचनमा नयाँ अनुहारलाई उम्मेदवार बनाएकोमा खुसी ब्यक्त गरे । ‘यो निर्वाचन सामान्य हुँदै होइन, युवाले परिवर्तन खोजिरहेका छन्, यस्तो बेलामा नेपाली कांग्रेस जस्तो पुरानो पार्टीले आफुलाई परिवर्तन गरेर नयाँ पुस्तालाई नेतृत्व सुम्पियो र निर्वाचनमा बाँकेको क्षेत्र नम्बर २ मा जस्तै अरु धेरै ठाउँमा नयाँ अनुहारलाई उम्मेदवार बनाएको छ, यो सकारात्मक कुरा हो,’ एक युवाले भने ।
कार्यक्रममा बोल्ने अधिकांस युवाले सरकारी र प्राइभेट स्कुल तथा कलेजको शिक्षामा भइरहेको फरक, युवाहरुमा ब्याप्त रहेको लागु औषध दुब्र्यशनी, बेरोजगारी समस्या लगायत विषयमा नीतिगत रुपमा पहल गर्न उम्मेदवार कोइरालालाई आग्रह गरेका थिए । सो क्रममा नेता कोइरालाले गत भदौं २३ र २४ गते भएको जेनजी आन्दोलनपछि सबैभन्दा पहिले नेपाली कांग्रेसले नै नेतृत्व र आफ्नो नीतिमा परिवर्तन गरेको स्मरण गराए ।
आफुले जेनजी युवा भाई बहिनीको भावना अनुसार काम गर्ने प्रतिवद्धता पनि जनाए । जेनजीको रगतलाई आफुले कत्तिपनि खेर जान नदिने उनको भनाई छ । निर्वाचनमा आफुलाई जिताउने अभियानमा लाग्न युवाहरुलाई कोइरालाले आग्रह गरे । सो क्रममा थुप्रै युवाहरुले सुझाव, जिज्ञासा तथा विभिन्न अपेक्षाहरु राखेका थिए । कार्यक्रममा नेपाली कांग्रेस बाँकेका कार्यबाहक सभापति गोपालप्रसाद अधिकारी, महासमिति सदस्य उमा थापामगर लगायत नेताहरुको पनि उपस्थिती रहेको थियो ।
उम्मेदवार कोइरालाले बिहीबार नै बाँके क्षेत्र नम्बर २ का दलित अगुवाहरुसँग छलफल गरेर आफुलाई निर्वाचनमा सहयोग गर्न अपिल गरेका थिए । दलितका लागि आवाज उठाउने र अवसर दिने पार्टी नेपाली कांग्रेस मात्र भएको उनले बताए । सो क्रममा दलित समुदायबाट प्रतिनिधित्व गर्दै नेपाली कांग्रेसकी नेतृ एवम लुम्बिनी प्रदेश सभाकी सांसद सुशिला नेपाली(वादी) लगायत दलित समुदायका प्रतिनिधिले उम्मेदवार कोइरालालाई जितको अग्रिम शुभकामना दिएका थिए ।
कोइरालाले महिला स्वास्थ्य स्वयं सेविकालाई पनि बिहीबार भेट गरेर महिला स्वास्थ्य स्वयं सेविकाको भूमिका महत्वपूर्ण रहेपनि राज्यले उनीहरुको योगदानलाई उचित ढंगले कदर गर्न नसकेको बताएका थिए । मातृ तथा शिशु मृत्युदर कम गर्न तथा स्वास्थ्य सचेतना फैलाउनमा महिला स्वास्थ्य स्वयं सेविकाको भूमिका महत्वपूर्ण रहेको बताए ।
कोइरालाले बिहीबार नै नेपालगन्ज उपमहानगरपालिका वडा नम्बर ४, वडा नम्बर १ र वडा नम्बर १८ मा मतदाता भेटघाट तथा घरदैलो गरेका छन् । घरदैलोमा नेपाली कांग्रेसका वडादेखी जिल्ला स्तरका नेता तथा कार्यकर्ताहरुको उल्लेख्य मात्रामा उपस्थिती रहेको थियो । कोइराला बिहीबार महेन्द्र पुस्तकालयमा आयोजित संवाद कार्यक्रममा पनि सहभागी भएका थिए ।
