नेपालगन्ज : बाँकेमा प्रतिनिधि सभा सदस्य निर्वाचनको सम्पूर्ण तयारी पूरा भएको छ । जिल्ला निर्वाचन कार्यालय बाँकेका प्रमुख टेकबहादुर शाहीले बिहीबार(भोलि) हुने निर्वाचनको सबै तयारी पूरा भएको बताए । उनका अनुसार बिहान ७ बजेदेखी जिल्लाका सबै मतदान केन्द्रमा एकैसाथ मतदान सुरु भएर बेलुका ५ बजेसम्म चल्नेछ ।
मतदानका लागि जिल्लाभर २ हजार ४ सय जना कर्मचारी खटिएका छन् । कार्यालयका अनुसार जिल्लाका तीन वटै निर्वाचन क्षेत्रबाट गरेर ३ लाख ५० हजार ३ सय ७१ जना मतदाताले मतदान गर्दैछन् । जिल्लाका ८१ वटा वडासँगै कारागारहरुमा पनि मतदान केन्द्र राखिएको छ । यसका साथै ३ वटा अस्थायी मतदान केन्द्र राखिएको छ ।
नेपालगन्ज कारागार, नौबस्ता कारागार र पशु सेवा कार्यालय परिसरमा पनि अस्थायी मतदान केन्द्र राखिएको छ । नेपालगन्ज कारागारबाट १ सय ५७ जना, नौबस्ता कारागारबाट ४६ जना कैदी बन्दीले मतदान गर्नेछन् । पशु सेवा कार्यालय परिसरमा निजामति कर्मचारी र सुरक्षाकर्मीले समानुपातिकमा मतदान गर्न पाउनेछन् ।
जिल्लाका १ सय ३९ मतदान स्थलमा ४ सय वटा मतदान केन्द्र स्थापना भएका छन् । कार्यालय प्रमुख शाहीले यसपटक सबै मतदान केन्द्रहरु अशक्त, अपांगतामैत्री र जेष्ठ नागरिकमैत्री बनेका छन् । मतदान स्थलमा खटिएका कर्मचारीले आफ्नो तयारी पुरा गरिसकेको बताएका छन् ।
नेपालगन्ज–१२ स्थित उपमहानगरपालिका कार्यालयको ‘क’ मतदान केन्द्रकी मतदान अधिकृत सुनिता शर्माले आयोगबाट प्राप्त गरेको जिम्मेवारी अनुसार आफुहरु निश्पक्ष रुपमा मतदान गराउन खटिएको बताइन् । ‘हामीले आफ्नो जिम्मेवारी निश्पक्ष रुपमा निभाउनेछौं,’ उनले भनिन् ।
सोही स्थलमा रहेको ‘ङ’ मतदान केन्द्रका मतदान अधिकृत लवजंग थापाले सम्पूर्ण तयारी पुरा भईसकेकाले अब मतदान गराउने तयारीका साथ आफुहरु मतदाताको पर्खाईमा रहेको बताए । ‘हामी सबै तयारीका साथ बसेका छौं, मतदाताहरु बिहान ७ बजे आएर ढुक्कसँग मतदान गर्न सक्नु हुनेछ,’ उनले भने ।
