नेपालगन्ज : नेपाली कांग्रेसको शुभेच्छुक संस्था डेमोक्रेटिक लयर्स एशोसियशन नेपाल (डिएलए) बाँकेको नयाँ नेतृत्व चयन प्रक्रिया लम्बिएको छ । अघिल्लो शनिबार डिएलए बाँकेको अधिवेशनको उद्घाटन शत्र गरिएको थियो । अधिवेशन भएको एक हप्ता पुग्नै लाग्दा पनि नयाँ नेतृत्व चयन हुन सकेको छैन ।
डिएलए बाँकेको अध्यक्ष पदका लागि वर्तमान अध्यक्ष जनकबहादुर शाही, उच्च अदालत बार एशोसियशन नेपालगन्जका पुर्वअध्यक्ष बलबहादुर चन्द, उच्च अदालत बारका निर्वतमान अध्यक्ष चित्रबहादुर शाही, नेपाली कांग्रेस बाँकेका पुर्व जिल्ला सचिव समेत रहेका अधिवक्ता कपिलदेव शर्मा र डिएलए बाँकेका वर्तमान उपाध्यक्ष निर्दिपकुमार श्रेष्ठले आकांक्षा राखेका छन् ।
नयाँ कार्यसमिति पदाधिकारी निर्वाचित गर्न डिएलएले यसअघि वरिष्ठ अधिवक्ता भोलासिंह हमाललाई प्रमुख निर्वाचन अधिकृतमा मनोनित गरेको थियो । निर्वाचन प्रक्रिया अगाडी बढाउन हमालकै संयोजकत्वमा सदस्यहरु वरिष्ठ अधिवक्ता सुनिलकुमार श्रेष्ठ, डिएलएका पुर्वकेन्द्रिय उपाध्यक्ष प्रह्लादबहादुर कार्की, उच्च अदालत बार नेपालगन्जका अध्यक्ष पवनकुमार गुप्ता र डिएलए बाँकेका सचिव राकेश सोनी (सदस्य सचिव) रहेको निर्वाचन मण्डल पनि बनेको छ ।
नयाँ नेतृत्व चयन प्रक्रिया लम्बिदाँ लोकतन्त्रवादी कानुन ब्यवसायीहरु बीच अन्यौलता सिर्जना भएको छ । उनीहरुले लोकतान्त्रिक विधि, पद्धति र प्रक्रिया अवलम्बन गरेर डिएलएलाई नयाँ नेतृत्व दिनुपर्ने सुझाव दिएका छन् ।
‘नेपालको सबैभन्दा पुरानो र लोकतान्त्रिक पार्टी नेपाली कांग्रेसको शुभेच्छुक संस्था भएको नाताले गर्दा पनि नयाँ नेतृत्व चयन प्रक्रियामा लोकतान्त्रिक विधि, पद्धति र प्रक्रिया अवलम्बन हुनेछ भन्ने हाम्रो विश्वास छ, एक कानुन कानुन ब्यवसायीले भने । नेतृत्वका लागि आकांक्षीहरु धेरै देखिएकाले सर्वसम्मत टुंग्याउन समस्या भईरहेको निर्वाचन मण्डलका एक सदस्यले बताएका छन् ।
