काठमाडौं : गृह मन्त्री सुदन गुरुङले पदबाट राजीनामा दिएकाे घाेषणा गरेका छन् । प्रधानमन्त्री बालेन्द्र शाहसँगको छलफलपछि उनले सामाजिक संजालमार्फत पदबाट राजीनामा दिएको घोषणा गरेका हुन्।
आफूसँग सम्बन्धित विषयमा निष्पक्ष छानबिन गर्न र पदमा रहँदा 'स्वार्थको द्वन्द्व' नदेखियोस् भन्ने उद्देश्यले राजीनामा दिएको उनको भनाइ छ। पदभन्दा नैतिकता र शक्तिभन्दा जनविश्वास ठूलो भएको उल्लेख गर्दै गुरुङले लेखेका छन्, 'कति मिडियाकर्मी साथीहरूको कहाँ-कहाँ स्वीट शेयर छ, त्यो पनि बिस्तारै आउला ।
रामराज्यको चाहना राख्नेहरूले त्याग र नैतिक साहस पनि देखाउन सक्नुपर्छ।' परिवर्तन चाहने हो भने सत्य, इमानदारी र आत्मशुद्धिको बाटोमा उभिन उनले सबै नेपालीलाई अपिल पनि गरेका छन्।
पछिल्लो समय व्यवसायी दिपक भट्टसँग विभिन्न व्यवसायमा साझेदारी रहेको, जेन्जी आन्दोलनपछि ५० लाख बढीको सेयर खरिद गरेको, फेवातालको अतिक्रमित जग्गा भाडामा लिएर व्यवसाय संचालन गरेको लगायतका विषयमा उनी संलग्न रहेको भन्दै चौतर्फी विरोध भइरहेको थियो ।
उनले फेसबुक मार्फत लेखेका राजीनामा यस्तो छ :
'म, सुदन गुरुङ, मिति २०८२ चैत १३ गतेदेखि गृह मन्त्रीको जिम्मेवारीमा इमानदारीपूर्वक काम गर्दै आएको छु। पछिल्ला दिनहरूमा नागरिक स्तरबाट मेरो शेयर लगायतका विषयमा उठेका प्रश्न, टिप्पणी र जनचासोलाई मैले गम्भीर रूपमा लिएको छु ।
मेरो लागि पदभन्दा ठूलो कुरा नैतिकता हो, र जनविश्वासभन्दा ठूलो शक्ति कुनै हुँदैन। आज देशमा सुशासन, पारदर्शिता र जवाफदेहिताको माग गर्दै उठिरहेको न्भल श् आन्दोलनले पनि यही सन्देश दिएको छ सार्वजनिक जीवन स्वच्छ हुनुपर्छ, नेतृत्व उत्तरदायी हुनुपर्छ।
मेरा ४६ जना भाइ बहिनिहरुको रगत र बलिदानी को आडमा बनेको सरकारलाई कसैले प्रश्न गर्छ भने त्यसको जवाफ नैतिकता हो।
त्यसैले, मसँग सम्बन्धित विषयमा निष्पक्ष छानबिन होस् र पदमा रहँदा अयलाष्अित या ष्लतभचभकत नदेखियोस र त्यसमा कुनै असर नपरोस् भन्ने उद्देश्यले मैले आजकै मितिदेखि लागू हुने गरी गृह मन्त्री पदबाट राजीनामा दिएको छु।
मैले आफ्नो तर्फबाट नैतिक जिम्मेवारी निर्वाह गरेको छु। अब मेरो अपिल छ, प्रिय सञ्चारकर्मी मित्रहरू, आम नेपाली दाजुभाइ, दिदीबहिनी र युवाहरू, यदि हामी साँच्चै परिवर्तन चाहन्छौँ भने सत्य, इमानदारी र आत्मशुद्धिको बाटोमा सबै उभिनैपर्छ। कति मिडियाकर्मी साथी हरु को कहा कहा स्वीट शेयर छ बिस्तारै आउला, रामराज्यको चाहना राख्नेहरूले त्याग र नैतिक साहस पनि देखाउन सक्नुपर्छ।'
