बाँके(चिसापानी) : नेपाली कांग्रेसका सह-महामन्त्री किशोरसिंह राठौंरले पार्टीको १४ औं महाधिवेशनले संगठन निर्माण गर्ने अभियानमा सबैलाई अवसर दिएको बताएका छन् । पार्टीमा काम गर्न चाहनेले अवसर पाउने पनि उनको भनाई छ ।
नेपाली कांग्रेस बैजनाथ गाउँपालिकाले सोमबार चिसापानीमा आयोजना गरेको स्वागत तथा सम्मान कार्यक्रमलाई सम्बोधन गर्दै राठौंरले भने, ‘जो काम गर्न चाहनु हुन्छ, त्यसले अवसर पाउने कुराको ज्ञारेन्टी लिन म तयार छु, कांग्रेसभित्र जुन किसिमको रोग छ, अधिवेशन हुदै गर्दाखेरी पदका लागि मरिहत्ते गर्ने, तर जिम्मेवारी पाइसकेपछि बैठकमा नआउने जुन किसिमको संस्कार छ, यो संस्कारको अन्त्य गर्नुस् ।’
पार्टी संगठनको बेस लाईन भनेकै वडा कार्यसमिति भएकाले गतिशिल हुन सहमहामन्त्री राठौंरले निर्देशन पनि दिए । उनले भने, ‘बाँके र बर्दियामा जो नेताले आफ्नो वडा जिताउन सक्दैन, त्यो नेताको कुरा म धेरै सुन्ने वाला छैन, उसको कुरालाई कार्यान्वयन गर्ने पक्षमा म छैन ।’ कांग्रेसलाई बलियो बनाउन भाषण गरेर मात्र नहुने भन्दै त्यसलाई ब्यवहारमा उतार्न जरुरी रहेको उनले बताए । राठौंरले भने, ‘२४ घण्टामा सुत्ने समय बाहेक बाँकी समय म तपाईहरुलाई दिन तयार छु, वडामै बोलाउनु हुन्छ भने पनि म वडामा खटिन तयार छु, त्यसकारण पार्टीको काममा तपाईहरु खटिने कि नखटिने ?’
पार्टीभन्दा ठुलो कोही नहुने भन्दै पार्टी बलियो भएपछि मात्र नेता कार्यकर्ताको राजनीतिकदेखी सामाजिक सुरक्षा हुने बताए । पार्टीको अवस्था बलियो भएमा कोहीसँग मिलेर चुनाव लड्नु नपर्ने बताए । तर, एक्लै लड्दा विगतमा बेहोर्नु परेको परिणामको समिक्षा पनि गर्न जरुरी रहेको उनको भनाई छ ।
अहिले पनि परिस्थती ज्युका त्युँ रहेकाले कम्युनिष्टहरु एक ठाउँमा उभिए भने कांग्रेसका नेतालाई गाह्रो हुने अवस्था भएको प्रतिनिधी सभाका सांसद समेत रहेका राठौंरले बताए । ‘पार्टी एक्लै जाने हो कि यो गठबन्धनलाई लिएर जाने हो भन्ने बारेमा केन्द्रदेखी वडासम्म बहस चलिरहेको छ, म भन्न चाहन्छु, कांग्रेस एक्लै जादाँखेरी जित्न सक्ने अवस्थाको निर्माण तपाईहरुले गर्न सक्नु भयो भने कांग्रेस अरु पार्टीसँग मिल्न जरुरी छैन,’ उनले भने ‘हामी पनि मिल्न चाहदैनौं, हाम्रो केन्द्रिय सभापति मिल्न चाहनुहुन्न, तर हिजोका दिनमा माओबादी र एमाले मिल्दाखेरी हाम्रो के परिस्थिती भयो, के परिणाम आयो, त्यो कुराको पनि हामीले समिक्षा गर्न जरुरी छ ।’
अर्को प्रसंगमा उनले देशमा लोकतन्त्र बचाउनका लागि नेपाली जनताले नेपाली कांग्रेसलाई जिताउन जरुरी रहेको धारणा राखे । ‘यो देशमा आएको संघीय ब्यवस्था, यो संविधानले हरेक वर्ग, हरेक जात, धर्म मान्नेहरुको सुरक्षा गरेको छ, सबैको समावेशीकरण गरेको छ, यो ब्यवस्थालाई बचाउनको लागि नेपाली कांग्रेसलाई जिताउनुपर्छ,’ उनले थपे । कांग्रेसले विगतमा कमैया र सुकुम्बासीका समस्या समाधान गर्नमा नेतृत्व गरेपनि कामको प्रचार गर्न नसकेको बताए ।
उक्त कार्यक्रमलाई सम्बोधन गर्दै केन्द्रिय सदस्य मैकुलाल बाल्मिकीले आसन्न निर्वाचनमा नेपाली कांग्रेसले जित्ने सुनिश्चित भइसकेको दाबी गरे । ‘तपाईहरुको यो उपस्थिती, तपाईहरुको यो उत्साहले कांग्रेसले आगामी निर्वाचत जित्छ, जित्छ,’ उनले भने । पार्टी र कार्यकर्तालाई चलायमान गराउन पालिका स्तरमा प्रशिक्षण कार्यक्रम चलाइने बताए ।
अर्का केन्द्रिय सदस्य जावेदा खातुनले आम जनताको जीवनसँग जोडिएको पार्टी नै कांग्रेस भएको बताइन् । ‘जनताको आशा र भरोसा कांग्रेसमाथी छ, यो देशका जनताले कम्युनिष्टलाई विश्वास गरेर पठाएका थिए, तर कम्युनिष्टले जनतालाई विश्वास घात गरे,’ उनले भनिन् ।
नेपाली कांग्रेस बैजनाथ गाउँपालिका अध्यक्ष देवबहादुर केसीको सभापतित्वमा सम्पन्न उक्त कार्यक्रमलाई लुम्बिनी प्रदेशका सांसद मोहम्मद याकुव अन्सारी, कांग्रेस बाँकेका पुर्वसभापति एवम् राष्ट्रिय सभा सदस्यका उम्मेदवार युवराज शर्मा, संविधान सभा सदस्यद्धय बादशाह कुर्मी र आशा बिक, कांग्रेस बाँकेका सचिव कपिलदेव शर्मा, क्षेत्र नम्बर ३ का सभापति मोहम्मद नक्की खाँ, महाधिवेशन प्रतिनिधी देवबहादुर खत्री, प्रकाशबहादुर शाही लगायतले पनि सम्बोधन गरेका थिए । कार्यक्रममा कांग्रेस बैजनाथका युवा नेता एवम् तरुण दल बाँकेका कोषाध्यक्ष केशर खड्काले स्वागत गरेका थिए ।
सो क्रममा नेकपा एमाले, माओबादी केन्द्र र राप्रपा परित्याग गरेर १ सय १५ जना कांग्रेसमा प्रवेश गरेको कांग्रेस बैजनाथ गाउँपालिकाले जनाएको छ । कार्यक्रममा कांग्रेस सहमहामन्त्री राठौंर, केन्द्रिय सदस्यद्धय बाल्मिकी र खातुनलाई सम्मान पत्रसहित सम्मान गरिएको थियो । यस्तै नेपाली कांग्रेसमा आवद्ध जेष्ठ नागरिक तथा पार्टीका नवनिर्वाचित बैजनाथ गाउँपालिका स्तरिय कार्यसमिति पदाधिकारी, महाधिवेशन र प्रदेश प्रतिनिधीलाई पनि सम्मान गरिएको थियो । कार्यक्रम सञ्चालन प्रदेश प्रतिनिधी शरदकुमार रेग्मीले गरेका थिए ।
भिडियो हेर्नुस् :
