कहाँ खपत हुन्छ मलेसियन हाँसको मासु ?

अर्थ

Home
अर्थ
कहाँ खपत हुन्छ मलेसियन हाँसको मासु ?

कहाँ खपत हुन्छ मलेसियन हाँसको मासु ?

नेपालगन्ज : वडा प्रहरी कार्यालय नेपालगन्जले शुक्रबार बिहान ठूलो परिणाममा मलेसियन हाँसको फ्रोजन मासु बरामद गर्यो । वडा प्रहरी कार्यालयका इन्चार्ज एवम् प्रहरी निरीक्षक डिल्ली खड्काले दिएको अनुसार उक्त मासु बाँकेको जानकी गाउँपालिका वडा नम्बर १ साइगाउँ क्षेत्रबाट बरामद गरिएको थियो ।

प्रहरी टोली पुग्दा बेवारिसे अवस्थामा २८÷२८ किलोका पाँच कार्टुन फ्रोजन गरिएको हाँसको सिंगो मासु फेला पारिएको उनले बताएका छन् । मासुको प्याकिङमा प्रोडक्ट अफ मलेसिया लेखिएको खड्काले जानकारी दिएका छन् । एक सय ४० किलो सिंगो हाँसको मासुलाई अबैध नाकाबाट नेपालगन्ज भित्र्याइदै थियो ।

डेनाभेष्ट फुड इण्डष्ट्रिजले उत्पादन र निर्यात गरेको उक्त मासु भारतको मुम्बइस्थित इम्पायर इन्डष्ट्रिज लिमिटेडले आयात गरेर नेपाल पठाएको पाइएको छ । तर, नेपालमा कसले मगाएको हो भन्नेबारे पत्ता लाग्न नसकेको प्रहरी निरीक्षक खड्का बताउँछन् ।

यति ठूलो परिणाममा अवैध रुपमा मलेसियन हाँसको मासु फेला परेपनि यसको सम्बन्धित फर्म वा उपभोक्ताको पहिचान हुन सकेको छैन । ‘यो मासु नेपालगन्जकै लागि ल्याइएको हो वा नेपालगन्जबाट अन्यत्रै लैजाने उद्देश्य राखिएको हो, त्यो कुरा पत्ता लाग्न सकेको छैन,’ उनले भने ।

मलेसियन हाँसको मासु यसरी बरामद भएको घटना सम्भवतः पहिलो हो । तस्करले मासु भित्र्याउन अबैध नाका प्रयोग गर्दै आएका हुन या पहिलो पटक भित्र्याउन खोज्दा प्रहरीले बरामद गरेको हो, यसको एकिन भने हुन सकेको छैन । नेपालगन्ज भन्सार कार्यालयले मलेसियन हाँसको मासु अहिलेसम्म कानुनी रुपमा नभित्रिएको जनाएको छ ।

प्रकाशित मिति: शनिबार, फागुन १४, २०७८ ०९:५८

प्रतिक्रिया दिनुहोस्