नेपालगन्ज : नागरिक समाजका अगुवाले स्थानीय तहको निर्वाचन स्वतन्त्र, निष्पक्ष र भयरहित बनाउन आचार संहिता पालनासँगै आवश्यक खवरदारी गर्ने प्रतिबद्धता व्यक्त गरेका छन् ।
बाँकेस्थित नागरिक समाजको प्रतिनीधीत्व गर्ने पेशागत संघ संगठनका प्रमुख, निर्वाचन पर्यवेक्षक, अधिकारकर्मी, सञ्चारकर्मी, गैससकर्मी लगायतको सहभागिता रहेको कार्यक्रममा वैशाख ३० गते हुने स्थानीय तहको निर्वाचन शान्तिपूर्ण बनाउन सर्व प्रथम स्वयंले आचार संहिताको पालना गर्ने र दल लगायत अन्यलाई पनि आचार संहिता कार्यान्वयनका लागि सचेत गराउने प्रतिबद्धता व्यक्त गरिएको हो ।
संवाद समूह बाँकेले आइतबार नेपालगन्जमा आयोजना गरेको संवाद कार्यक्रममा यस्तो प्रतिवद्धता व्यक्त गरिएको हो । निर्वाचन स्वच्छ, शान्तिपूर्ण र विश्सनीय बनाउन आचार संहिता कार्यान्वयन नै प्रमुख दायित्व हुनु पर्र्ने कुरामा सबै एकमत देखीएका हुन् ।
चुनावी प्रचार प्रसारको नाममा आचारसंहिता विपरित व्यानर र झण्डाको व्यापक प्रयोग गरिएको भन्दै सहभागी अधिकांसले नागरिकस्तरबाट सचेततासँगै खवरदारीमा पनि जोड दिएका थिए । राष्ट्रिय मानव अधिकार अयोग नेपालगन्जका प्रमुख झंकर रावलले निर्वाचन आचार संहिता र मतदाता शिक्षालाई व्यापक र प्रभावकारी नबनाइएको भन्दै मतदान गर्ने शान्त र सहज बातावरण बनाइनु पर्ने आवश्यक्ता औल्याए ।
उच्च अदालत बार एशोसीएशन नेपालगन्जका अध्यक्ष शिव श्रेष्ठले निर्वाचनको मौन अवधीमा आचार संहिता उल्लघंन हुने सम्भावना रहेको भन्दै मतदातालाई प्रभावित पार्ने काम कही कतैबाट गर्न नहुनेमा जोड दिए ।
इन्सेक लुम्विनी प्रदेश प्रमुख भोला महतले आचार संहिता पालना गर्नुपर्नेले नै आचार संहिता उल्लंघन गर्न उद्धत देखिएको भन्दै पालना भए÷नभएको नियमन गर्नुपर्नेमा जोड दिए । राष्ट्रिय अपांग महासंघका सचिव भावुकजंग थापाले अपांगता भएका, असक्त व्यक्तिहरुका लागि सहज मतदान गर्ने व्यवस्था मिलाइनुपर्ने आवश्यक्ता औल्याए ।
उक्त कार्यक्रममा नेपाल बार एशोसीयशनका पुर्ववरिष्ठ उपाध्यक्ष सुनिल श्रेष्ठ, सिविन नेपालगन्जका प्रमुख सिद्धराज पनेरु, जिल्ला बारका अध्यक्ष जनकबहादुर शाही, नियोकका प्रतिनिधी बसन्त गौतम, सूचना तथा मानव अधिकार अनुसन्धान केन्द्रका अध्यक्ष विश्वजित, तिवारी, थर्ड एलायन्सका क्षेत्रीय संयोजक आलम खान, महिला अधिकारकर्मी कमला पन्त, फातिमा फाउण्डेशन नेपालकी अध्यक्ष मैमुना सिद्धिकी लगायतले दलका प्रचार-प्रसारमा बालबालिका प्रयोग, पैंसा खर्च गरेर मतदाता प्रभावित पार्ने कार्य, सञ्चार माध्यमको हुन सक्ने दुरुपयोग, आचार संहिताको प्रभावकारी अनुगमन तर्फ निर्वाचन आयोगको ध्यानाकर्षण गराए ।
संवाद समूह बाँकेका सहजकर्ता शुक्रऋषि चौलागाईद्धारा सहजीकरण गरिएको कार्यक्रमको उद्देश्य र महत्वमाथि संवाद समूहका सदस्य एवं अधिवक्ता प्रहलाद कार्कीले प्रकाश पारेका थिए । संवाद समूह बाँकेले स्थानीय तह निर्वाचन आचार संहिता पालनाका सन्दर्भमा सरोकारवालासँग विभिन्न चरणमा आवश्यक संवाद गर्दै आएको छ ।
