नेपालगन्ज : बाँके, राप्ती सोनारी निवासी १६ वर्षीया सिर्जना (नाम परिर्वतित) र बैजनाथका हेमराज थारुबीच करिब एक वर्षअघि फेसबुकमार्फत चिनजान भयो । त्यसपछि उनीहरु दुबैले कुराकानी गर्ने माध्यम फेसबुकलाई नै बनाउन थाले ।
फेसबुक म्यासेन्जरबाटै भिडियो र अडियो कल गरेर उनीहरुबीच कुराकानी हुन थाल्यो दुबै जना परिचित नहुदै हेमराजले सिर्जनालाई माया गर्ने आश्वासन समेत बाँड्न थाले । सिर्जनाले भने हेमराजको प्रस्ताव र कुरालाई सहजै पत्याइनन, तर फेसबुकमा कुराकानी गर्न भने छाडिनन् ।
हेमराजले गत शनिबार (जेठ २१ गते) का दिन सिर्जनालाई एउटा निम्तो गरे । ‘आज मेरो जन्मदिन परेको छ, तिमी जसरी भएपनि म कहाँ आउनुपर्छ र जन्मदिन सँगै मनाउँला ।’ संयोगले त्यसदिन खजुरास्थित आफन्त कहाँ पुगेकी थिइन । जन्मदिनको निम्तो स्वीकार गर्दै हेमराजले बोलाएको ठाउँमा उनी पुगिन । अपरान्ह करिव ४ बजेतिर उनीहरुबीच भेटघाट गर्ने समय तोकियो।
हेमराजले सिर्जनालाई खजुरा गाँउपालिका वडा नम्बर ६ मानखोला नजिक भेट्न बोलाए । सिर्जनालाई बोलाएको ठाउँमा हेमराज एक्लै भने थिएनन । हेमराजसहित उनका साथीहरु विक्रान्त थारु, राजकुमार थारु, प्रविण थारु र निराजन थारु पनि थिए।
त्यहाँबाट उनीहरुले सिर्जनालाई मोटरसाईकलमा राखेर मानखोला (बाँके र बर्दियाको सिमा) नजिक बर्दियाको बढैयाताल गाउँपालिका वडा नम्बर ५ मा पर्ने फुलवारी सामुदायिक वन क्षेत्रमा पुर्याए । साथमा उनीहरुले मदिरा पनि बोकेका थिए । सामुदायिक वन क्षेत्रमा पुगेपछि उनीहरु सबैले मदिरा सेवन गरे र सिर्जनालाई पनि जवरजस्ती खान बाध्य बनाए ।
मदिराको नसाले उनी जब लठ्ठ परिन, त्यही मौका छोपेर युवाहरु उनीमाथी आइलागे । त्यहाँ रहेका पाँचै जना युवाले बेलुका करिव ६ बजेदेखी राती १२ बजेसम्म पालैपालो बलात्कार गरे । ‘म नसाले लठ्ठ परेको मौका छोपेर उनीहरुले मलाई पालैपालो बलात्कार गरेछन, मेरो शरिरमा कपडा नै थिएन, मैले वान्ता समेत गरेछु, वान्ता गरेको कपडा पनि उनीहरुले नै धोइदिएका रहेछन,’ पीडितले भनिन् ‘जब म होसमा आएँ, मेरो शरिरमा कपडा नै थिएन ।’
नसाले लठ्ठ परेकी सिर्जनाको होस खुलाउन युवाहरुले उनको शरीरमा पानी छर्किएका थिए । केही होस खुलेपछि सिर्जनालाई निराजन र विक्रान्तले मोटरसाइकलमा राखेर बैजनाथ-८ पिपरीस्थित एउटा बंगुरपालन फर्ममा पुर्याए । त्यहाँ पनि राती करिव १ बजेतिर विक्रान्त र निराजनले पालैपालो उनलाई बलात्कार गरे ।
बलात्कार गरिसकेपछि विक्रान्तले आफ्ना साथी विश्वनाथ थारु र निर्देश थारुलाई बोलाए । उनीहरुले पनि पालैपालो बलात्कार गरिसकेपछि युवतीलाई घरमा लगेर छाड्ने निधोमा पुगे । उनीहरुले भे ३ प ३५२७ नम्बरको पल्सर मोटरसाईकलमा बसालेर खजुरास्थित सिर्जनाको आफन्तको घरमा लैजादै गर्दा बाटोमा करिव ४ बजेतिर प्रहरीको चेकजाँच चलिरहेको थियो ।
विश्वनाथले चलाएको मोटरसाईकलको बीचमा सृजना र पछाडी निर्देश बसेका थिए । किशोरीको अवस्था हेर्दा उनी निकै थकित मुद्रामा थिइन, प्रहरीलाई शंका लागेर सोधपुछ गर्दा घटना सार्वजनिक भयो । प्रहरीले तत्कालै दुबै जना युवालाई पक्राउ गर्यो, भने युवतीलाई उद्धार गरेर ईलाका प्रहरी कार्यालय खजुरामा राख्यो ।
प्रहरीका अनुसार पीडित युवती मोटरसाईकलमा बसिरहेका बेलामा पनि आँखा लठ्ठ पारेकी थिइन, त्यही बेलामा प्रहरीलाई शंका लागेर उनीहरुलाई धेरै बेरसम्म केरकार गरेको थियो । प्रहरीले अन्य पाँच जनालाई पनि विभिन्न स्थानबाट पक्राउ गरिसकेको छ ।
पक्राउ परेका युवाहरुले बलात्कार गरेको प्रहरी समक्ष स्वीका गरेका छन । पीडित किशोरीले आफुमाथी सामुहिक बलात्कार गर्ने युवालाई कडा भन्दा कडा कारबाही गर्न माग गरेकी छन । ‘मलाई जन्मदिन मनाउन भनेर जसरी बोलायो, उसले विश्वास घात गरेको छ र मेरो इज्जत लुट्ने काम गराएको छ,’ उनले भनिन् ‘यस्ता अपराधीलाई कडा भन्दा कडा सजाय दिइयोस् ।’
पक्राउ परेका सबै ७ जना अभियुक्तलाई जिल्ला प्रहरी कार्यालय बाँकेले सोमबार जिल्ला अदालतबाट म्याद थप गराएर आवश्यक अनुसान सुरु गरिसकेको छ । जिल्ला प्रहरी कार्यालय बाँकेका प्रमुख (एसपी) श्यामकृष्ण अधिकारीले नाबालिका माथी भएको अत्यन्त जघन्य घटना भएकाले प्रहरीले सुक्ष्म रुपले अनुसन्धान सुरु गरेको बताए ।
‘कानुनी रुपले हदैसम्मको सजाय माग गरेर प्रहरीले पीडितलाई न्याय दिलाउने काम गर्नेछ,’ उनले भने । पीडित युवतीको स्वास्थ्य परिक्षण गराएर एक गैर सरकारी संस्थाको संरक्षणमा राखिएको बाँके प्रहरीले जनाएको छ । -नागरिकन्युजबाट
