एक अर्ब १६ करोड ४६ लाख रुपैयाँ बराबरको बजेट प्रस्तुत
कोहलपुर : कोहलपुर नगरपालिकाले आर्थिक वर्ष २०७९/८० को नीति तथा कार्यक्रम र बजेट प्रस्तुत गर्यो । ११ औं नगर सभामा नगरप्रमुख पूर्णप्रसाद आचार्यले नीति तथा कार्यक्रम र उपप्रमुख संगिता सुवेदीले बजेट प्रस्तुत गरे ।
सभामा प्रस्तुत भएको नीति तथा कार्यक्रम र बजेट समग्रमा कोहलपुर नगरपालिकाको विकास तथा समृद्धिसँग जोडिएको छ । नगर प्रमुख आचार्यले ‘दिगो शान्ति, सुशासन, विकास तथा समृद्ध नगर निर्माण गर्ने सोच र लक्ष्य’ का साथ नीति तथा कार्यक्रम ल्याएका छन् ।
जनताको गुनासो सम्बोधन गर्न ‘सिधा कुरा मेयरसँग’ कार्यक्रम सञ्चालन गर्ने, ‘युवाको जवानी कोहलपुरमा लगानी’, किशोरी प्रजनन स्वास्थ्यका लागि ‘मेरो पहिलो रजश्वला’, विद्यार्थी टिकाउन ‘विद्यालय शिक्षामा ल्याउने, टिकाउने र सिकाउने’, मेरो विद्यालय मेरो जिम्मेवारी’ वातावरण संरक्षणका लागि ‘एक घर दुई विरुवा, हामी आफै कुरुवा’ जस्तो लोकप्रिय कार्यक्रम ल्याइएको छ ।
यस्तै नगर उप-प्रमुख संगीता सुवेदीले एक अर्ब १६ करोड ४६ लाख रुपैयाँ बराबरको बजेट प्रस्तुत गरेकी छन् । संघीय सरकारबाट प्राप्त ५८ करोड एक लाख, प्रदेश सरकारबाट प्राप्त हुने अनुदान पाँच करोड १६ हजार र आन्तररिक राजश्वबाट २० करोड ३१ लाख ९५ हजार गरी ८३ करोड ३३ लाख ११ हजार, नगर विकास कोषको ऋण अनुदान ५ करोड र संचित कोषमा मौज्दात हुन आउने अनुमान १२ करोड गरेर कुल एक अर्ब १६ करोड ७६ लाखको आय लक्ष्य लिइएको उप-प्रमुख सुवेदीले बताएकी छन् ।
संघीय सरकारको निःर्शत तर्फको बजेट ७१ करोड दुई लाख र संघीय सरकारबाट प्राप्त सशर्ततर्फ ३४ करोड ८४ लाख र लुम्बिनी प्रदेश सरकारबाट प्राप्त हुने सशर्त एक करोड दश लाखलाई विभिन्न क्षेत्रगत विनियोजन गरिएको छ ।
प्रशासनिक खर्च १७ करोड ८० लाख, सामाजिक विकासतर्फ ८ करोड ५२ लाख रहेको छ । नगरपालिकाले शिक्षा क्षेत्रमा ६ करोड ३५ लाख, स्वास्थ्यमा एक करोड ३५ लाख, महिला बालबालिका तथा समाज कल्याणमा १८ लाख ५० हजार, आयुर्वेदमा ११ लाख र सामाजिक विकास शाखामा ५२ लाख ५० हजार बजेट विनियोजन गरिएको छ । आर्थिक विकास शाखामा एक करोड ६० लाख बजेट विनियोजन गरिएको छ ।
