बाँके(राप्ती सोनारी) : राप्ती सोनारी गाउँपालिकाले आगामी आर्थिक वर्ष २०७९/८० का लागि ८८ करोड ३१ लाख ४८ हजार बजेट प्रस्तुत गरेको छ । गाउँपालिकाको ११ औं गाउँ सभामा मंगलबार उक्त बजेट प्रस्तुत गरिएको हो ।
सभामा गाउँपालिका अध्यक्ष एवम् सभाध्यक्ष तप्तबहादुर पौडेलले नीति तथा कार्यक्रम र उपाध्यक्ष मनिषासिंह थारुले बजेट प्रस्तुत गरेका हुन् । सभामा प्रस्तुत भएको नीति तथा कार्यक्रमलाई सुझाव सहित सर्वसम्मत रुपमा पारित गरिएको छ ।
प्रस्तुत नीति तथा कार्यक्रममा शिक्षा, स्वास्थ्य, कृषि, पर्यटन, पुर्वाधार तथा सामाजिक विकास लगायतलाई उच्च प्राथमिकतामा राखिएको छ । गाउँपालिकाले बादी, थारु, मधेसी लगायत समुदायका लागि पनि लक्षित गरेर कार्यक्रम ल्याएको छ । बिद्यालय शिक्षाको शैक्षिक गुणस्तरमा प्रमुख भुमिका अभिभावक नै हुने हुँदा शिक्षक, विद्यार्थी र अभिभावक बीचको त्रिकोणात्मक सम्बन्धलाई प्राथमिकता दिइने, नमुनाको एउटा विद्यालयमाा अभिभावक सचेतकको ब्यवस्था गरिने नीति तथा कार्यक्रममा उल्लेख छ ।
गाउँपालिका भित्र सञ्चालित सामुदायिक क्याम्पसको लागि अनुदानको ब्यवस्था गरिनेछ । एक घर एक धाराको नीतिलाई आत्मसात गर्दै प्रत्येक घरमा स्वच्छ खानेपानीको लागि धारा ब्यवस्थापन गरिने, कृषकहरुलाई ब्यावसायिक खेती पद्धतीतर्फ उन्मुख गराउन खेतीयोग्य जमिनको चक्लाबन्दी गर्ने कार्यमा उत्पेैरित गर्ने खालका कार्यक्रम सञ्चालन गरिने नीति तथा कार्यक्रममा समेटिएको छ ।
सिपालु राप्ती सोनारी कार्यक्रम लागु गरी बैदेशिक रोजगारीबाट फर्किएका तथा विदेश तथा स्वदेशमै जागिर गुमाएका तथा बेरोजगार युवाहरुलाई ब्यवसायिक कृषि तथा पशुपालनमा तथा मागमा आधारित तालिममार्फत युवा स्वरोजगारीका कार्यक्रम सञ्चालन गरिने नीति तथा कार्यक्रममा उल्लेख छ ।
जनतासँग अध्यक्ष कार्यक्रमलाई प्रभावकारी रुपमा सञ्चालन गर्न हेलो अध्यक्ष कक्ष स्थापना प्रक्रिया अगाडी बढाइनेछ । कहाँ जाने सफारी घुमौ राप्ती सोनारी कार्यक्रममार्फत पर्यटन गुरुयोजना बनाई मुख्य मुख्य पर्यटकीय क्षेत्रको विकास, प्रर्वद्धन र प्रचार प्रसार गर्ने लगायत नीति तथा कार्यक्रम ल्याइएको छ । सभामा प्रस्तुत भएको नीति तथा कार्यक्रमका विषयमा सभाका सदस्य रमेश खनाल लगायतले आ-आफ्नो सुझाव दिएका थिए ।
उपाध्यक्ष थारुले प्रस्तुत गरेको उक्त बजेटमा पुर्वाधार विकासतर्फ २ करोड ८७ लाख ४८ हजार, आर्थिक विकासमा ८२ लाख, सामाजिक विकासतर्फ १ करोड ९७ लाख, संस्थागत विकास र सुशासनतर्फ १२ करोड ८० लाख र वातावरण तथा विपद व्यबस्थापनतर्फ १० लाख गरी १८ करोड ५६ लाख ४८ हजार रुपैयाँ विनियोजन गरिएको छ ।
यस्तै शाखागत तर्फ कृषिमा १ करोड ६२ लाख, पशुमा १ करोड, शिक्षामा ७ करोड ८० लाख, स्वास्थ्यमा ५ करोड ३८ लाख, महिला विकासमा १ करोड १० लाख, वडागतमा १५ करोड ३० लाख बजेट प्रस्तुत गरिएको छ ।
यसैगरी सशर्त अनुदान(संघ)को ३४ करोड ६५ लाख, सशर्त अनुदान (प्रदेश) ८० लाख, समपूरक(प्रदेश) १ करोड ५० लाख र विशेष अनुदान(प्रदेश)को ६० लाख बजेट उपाध्यक्ष थारुले प्रस्तुत गरेकी छन् । गाउँ सभाको तेस्रो बैठक यही असार २१ गते दिउँसो १ बजे पुनः बस्ने भएको छ । उक्त सभामा प्रस्तुत बजेटबारे छलफल हुने कार्यक्रम रहेको प्रमुख प्रशासकीय अधिकृत सिंहराज डाँगीले जानकारी दिए ।
यसअघि असार १० गते बसेको सभामा गणपुरक संख्या नपुगेपछि असार १४ गतेसम्मका लागि स्थगित भएको थियो । एमाले निकट जनप्रतिनिधीले बजेटका विषयमा असन्तुष्टी जनाउँदै सभामा अनुपस्थित भएका थिए । असन्तुष्ट जनप्रतिनिधीसँग भएको छलफलमा सहमती जुटेपछि सभा सञ्चालन भएको हो ।
भिडियो हेर्नुस् :
