कालिकोट : पहिरो जादाँ कालिकोटमा २२ जना बेपत्ता भएका छन् । जिल्लाको तिलागुफा नगरपालिका, सानी त्रिवणी गाउँपालिका र पचालझरना गाउँपालिकामा पहिरो जादाँ २२ जना बेपत्ता भएका हुन् ।
जिल्ला प्रहरी कार्यालय कालिकोटका अनुसार तिलागुफा नगरपालिका-७ बालीगाउँमा पहिरो जाँदा स्थानीय धु्रवराज विष्टको ५ जनाको परिवारनै बेपत्ता भएको छ । आइतबार बिहान साढे १० बजे घरमाथिबाट खसेको पहिरोले घर बगाउँदा विष्टकी ३५ वर्षीया पत्नी ममता, १५ वर्षीय छोरा भरत, १३ वर्षीय छोरा कृपेश र ११ वर्षीया छोरी ज्यानी विष्ट बेपत्ता भएको प्रहरी जनाएको छ ।
घरमाथिबाट आएको पहिरोले धु्रवराजका दुई घर र छिमेकीको घर पनि पहिरोले बगाएको जिल्ला प्रहरी प्रमुख जयश्वर रिमालले बताए । विगत ६ दिनदेखि लगातार वर्षाका कारण बेपत्ता भएकाहरूको खोजी गर्न कठिनाई भएको प्रहरीले जनाएको छ । घटनास्थलमा ८ जनाको प्रहरी टोली गएपनि पहिरो बगिरहेकाले खोजी गर्न सकेको छैन ।
यस्तै तिलागुफा नगरपालिका-६ भैसैगोडा स्थित जोरासिंह शाहीको घर पहिरोले पुरिँदा उनकी ८० वर्षीया आमा लालका शाही बेपत्ता भएको प्रहरीले जनाएको छ । स्थानीयका अनुसार उनीहरु घर भित्रै रहेको बताईएको छ ।
तिलागुफा नगरपालिका-४ राँचुलीमा पहिरो जाँदा १३ जना बेपत्ता भएका छन् । मलामी गएका १३ जना सम्पर्क विहीन भएको प्रहरीले जनाएको छ । उनीहरु को-को थिए भन्ने खुलेको छैन । तिलागुफा नगरपालिका वडा नम्बर ७ र ८ को टाकुला खोलामा आएको बाढीले बगाउँदा एक जना प्रहरी जवान वेपत्ता भएका छन् । सुर्खेत गणमा कायएरत प्रहरी जवान पदम रावत जुम्ला घरबाट दसैं मनाएर फर्किँदै गर्दा उनलाई टाकुला खोलाले बगाएको हो ।
यसैगरी सानी त्रिवणी गाउँपालिका-८ मा पहिरो जाँदा १४ वर्षका केबुल केसीको मुत्यु भएको छ, भने दुई जना घाईते भएका छन् । अन्य धेरैको घरमा धनजनको क्षति भएको गाउँपालिका अध्यक्ष मोहनबहादुर केसीले जानकारी दिए । पचाल झरना गाउँपालिका-७ का ४७ वर्षका परिलाल बोहरा गरि २२ जना बेपत्ता भएको प्रहरीले जनाएको छ ।
