नेपालगन्ज : नेपाली काँग्रेसका सहमहामन्त्री किशोरसिंह राठौंर पहिलो पटक प्रत्यक्ष रुपमा जनताबाट अनुमोदित भएका छन् । बाँके क्षेत्र नम्बर ३ बाट उनी प्रतिनिधि सभा सदस्य पदमा बिहीबार निर्वाचित भए । उनले नेकपा एमालेका किस्मतकुमार कक्षपतिलाई ४ हजार ७ सय ९३ मतान्तरले पराजित गरे ।
राठौरले २९ हजार ४० मत ल्याउँदा निकटतम प्रतिस्पर्धी कक्षपतिले २४ हजार २ सय ४७ मत प्राप्त गरेका छन् । २०७० सालको संविधान सभा निर्वाचनमा बर्दियाको तत्कालिन क्षेत्र नम्बर ३ बाट प्रत्यक्षतर्फ चुनाव लडेका राठौंर त्यतिबेला भने निर्वाचित हुन सकेनन् ।
संविधान जारी भएपछि उक्त क्षेत्रलाई २ नम्बर बनाइयो । सोही क्षेत्रबाट नेता राठौंरलाई पार्टीले २०७४ सालको निर्वाचनमा भने समानुपातिक सांसद बनायो । पाँच दलिय गठबन्धनबीचको सहमती अनुसार बर्दियाको उक्त क्षेत्र नेकपा (माओवादी केन्द्र) को भागमा परेपछि सहमहामन्त्री राठौर यसपटक बाँके क्षेत्र नम्बर ३ बाट चुनाव लडेका हुन् ।
जनताबाट पहिलो पटक प्रत्यक्ष अनुमोदित भएका राठौंरले यतिखेर थप जिम्मेवारी महसुस गरेका छन् । उनले किसान र समग्र जनताका कामहरु गर्न आफु निरन्तर खटिने प्रतिवद्धता ब्यक्त गरे ।
‘हिजो सुशिल दाईले बाँके जिल्लाको नेतृत्व गर्नु भएको थियो, बाँकेमा जतिपनि ठुला विकासका आयोजना भए, सुशिल दाईको नेतृत्वमा भएको थियो,’ निर्वाचित भएपछि बिहीबार राठौरले भने ‘बाँकेका जनताले नेता खोजिरहेका बेला म बाँके क्षेत्र नम्बर ३ बाट निर्वाचित भएको छु, म बाँके र बर्दियाको विकासलाई जोड्न चाहन्छु ।’
२०२६ बैशाख १५ गते दुर्गम पहाडी जिल्ला सल्यान, बडागाउँमा जन्मेका राठौंरले गाउँमा प्रारम्भिक शिक्षा लिएर माध्यमिक तहसम्मको शिक्षा भने काठमाडौंस्थित सिद्धार्थ वनस्थलीमा पुरा गरेका थिए ।
सोही विद्यालयबाट एसएलसी उत्तीर्ण गरेका उनलाई उच्च अध्ययनका लागि काठमाडौंस्थित त्रिचन्द्र कलेजमा भर्ना भएपछि विद्यार्थी राजनीतिको नसाले छोयो । ‘२०४१ साल तिर क्याम्पसमा पढ्दा पढ्दै म नेविसंघको राजनीतिमा लागेको हुँ,’ उनी भन्छन् ।
त्रिचन्द्रबाट स्नातक तह उत्तीर्ण राठौंर २०४९ सालमा स्वतन्त्र विद्यार्थी युनियन (स्ववियु) सचिवमा निर्वाचित भए । २०५१ सालमा सोही कलेजको स्ववियु सभापतिको जिम्मेवारीमा पुगेका उनी २०५२ सालमा स्वतन्त्र विद्यार्थी युनियनहरुको छाता संगठन स्ववियु फोरमको संस्थापक सभापति समेत भए ।
लगतै २०५३ सालमा नेपाली काँग्रेसको भातृ संगठन नेपाल विद्यार्थी संघको केन्द्रीय सहमहामन्त्री र २०५८ सालमा नेविसंघको केन्द्रीय अध्यक्षमा निर्वाचित भएर राठौंरले संगठनको नेतृत्व सम्हाले । त्यतिबेला नेपाली काँग्रेसका नेता सुशील कोइराला बाँके क्षेत्र नम्बर २ लाई केन्द्रविन्दुमा राखी राजनीति गरिरहेका थिए ।
आफ्नो घर नेपालगन्ज फुल्टेक्रामा भएपनि बर्दियाको राजापुर क्षेत्रलाई राजनीति गर्ने केन्द्र बनाएका उनी २०५८ सालतिर त्यतै सक्रिय भए । ‘नेविसंघमा रहँदासम्म पार्टीको राजनीति गर्नु मैले उपयुक्त ठानिनँ,’ उनी भन्छन् ‘एक जनाले एउटा मात्र पद लिनुपर्छ भन्ने मान्यता राख्ने नेता हुँ म । तर, बर्दियामा कांग्रेस सुदृढ गर्न भने म लागि नै रहेँ ।’
नेविसंघको नेतृत्व हस्तान्तरण गरिसकेपछि काँग्रेस पार्टीको राजनीतिमा पूरै होमिएका राठौंरका निम्ति बर्दियामा संगठन निर्माण गर्नु निकै चुनौतिपूर्ण थियो । सरकार-माओवादी द्वन्द्व कालको त्यस बेला ‘मिनी रोल्पा’ भनेर चिनिने राजापुरमा कांँग्रेसले सांगठनिक काम गर्न सक्ने अवस्था सहज थिएन पनि । त्यसबेला राजापुर क्षेत्रमै बसेर पार्टीको संगठनलाई चलायमान बनाउन उनी प्रयत्नशील रहे ।
जुझारु र कुशल संगठनकर्ताको रुपमा आफुलाई चिनाउन सफल भएका राठौंर नेपाली कांग्रेसको १२ औं महाधिवेशनबाट केन्द्रीय सदस्यमा निर्वाचित भए । द्वन्द्वरत माओवादी शान्ति प्रक्रियामा आईसकेपछि २०६४ सालमा पहिलो संविधान सभा निर्वाचन भयो ।
काँग्रेसले राठौंरलाई पनि समानुपातिक सभासदको उम्मेदवार बनाएको थियो । गतवर्ष सम्पन्न १४ औं महाधिवेशनबाट राठौंर काँग्रेसको केन्द्रिय सहमहामन्त्री पदमा निर्वाचित भएका थिए ।
बाँके क्षेत्र नम्बर ३ मा चुनाव लड्ने निश्चित भएपछि उनीविरुद्ध विपक्षीले ‘टुरिष्ट उम्मेदवार’ भन्दै अनर्गल प्रचारबाजी गरे । तर, आफुविरुद्ध गरिएको प्रचारबाजीलाई चिर्न सफल भए ।
निर्वाचनका क्रममा उनले कहिल्यै पनि जनतालाई उधारो आश्वासन दिएनन् । र कार्यकर्तालाई पनि उधारो आश्वासन नदिन निर्देशन दिए । जितेपछि गर्न सक्ने काम मात्र उनले जनतालाई बताए । राठौंरले सबैभन्दा जोडदार रुपमा उठाएको एजेण्डा थियो, 'भुमिहिन सुकुम्बासी समस्या समाधान ।'
आफु निर्वाचित भएपछि पाँच वर्षभित्रमा क्षेत्र नम्बर ३ मा भुमिहिन, सुकुम्बासी समस्या समाधान गर्ने र यि समस्या समाधान गर्न नसकेमा अर्को पटक भोट माग्न समेत नआउने समेत बताए । ब्यक्तित्व, लोक प्रियतासँगै राठौरको स्पष्ट बोलीका कारण पनि जनताले पाँच वर्षका लागि अनुमोदन गरेका हुन् ।
यो पनि पढ्नुस् :
केही नयाँ गरि देखाउने किशोरको अठोट
भिडियो हेर्नुस् :
