बाँके (डुडुवा) : आर्थिक वर्ष सुरु भएको पाँच महिनापछि डुडुवा गाउँपालिकाले सोमबार आफ्नो १२ औं गाउँसभा गरेको छ । सभामा चालु आर्थिक वर्ष २०७९/८० का लागि नीति तथा कार्यक्रम र बजेट प्रस्तुत गरिएको छ । गाउँपालिका अध्यक्ष नरेन्द्रकुमार चौधरीले प्रस्तुत गरेका हुन् । सभामा अध्यक्ष चौधरीले ६५ करोड ३१ लाख ९३ हजार रुपैयाँको बजेट प्रस्तुत गरे ।
जस अनुसार पूर्वाधार विकासतर्फ (गाउँपालिका) १४ करोड ४६ लाख, पुर्वाधार विकास (वडातर्फ) ३ करोड, चालू कार्यक्रम खर्च १४ करोड २४ लाख ५३ हजार र सशर्त अनुदान २४ करोड २० लाख ४० हजार, आर्थिक विकासमा १ करोड ५० लाख, सामाजिक विकासमा ५ करोड ६५ लाख, वन वातावरण र विपद व्यवस्थापनतर्फ ४२ लाख, संस्थागत विकास र सेवा प्रवाहमा १ करोड ८४ लाख रुपैयाँको बजेट रहेको छ ।
सभामा गाउँपालिका उपाध्यक्ष साहिदा बानो, प्रमुख प्रशासकीय अधिकृत कृष्णप्रसाद पौडेल तथा सभाका सदस्यहरु (वडाअध्यक्ष, कार्यपालिका सदस्य तथा वडासदस्य) को सहभागिता रहेको थियो । सभा बस्नुअघि कार्यपालिका बैठकले नीति तथा कार्यक्रम र बजेटलाई स्वीकृत गरेको थियो । यसअघि समयमा गाउँसभा नहुँदा सबै सेवा ठप्प भएका थिए । गत बैशाखमा सम्पन्न स्थानीय तह निर्वाचनमा गाउँपालिका अध्यक्ष र उपाध्यक्षसहित नेपाली काँग्रेसले एउटा मात्र वडा जितेको थियो ।
कुल ६ वटा वडा रहेको गाउँपालिकामा जनता समाजवादी पार्टी (जसपा) ले ३ र नेकपा एमालेले २ वटा वडा जितेको थियो । गत असारमा तीन पटक गाउँसभा र ६ पटक कार्यपालिका बैठक आब्हान गरेपनि जसपा र एमालेका जनप्रतिनिधीले ‘बहुमतको दम्भ’ देखाएर सभा अवरुद्ध गरेको अध्यक्ष चौधरीले आरोप लगाउँदै आएका थिए ।
सभाले चालु आर्थिक वर्षको नीति तथा कार्यक्रम र बजेट स्वीकृत नगर्दा कर्मचारीले पाँच महिनाको तलब खान पाएका थिएनन्, भने गाउँपालिकाले अत्यावश्यक सेवा र विकास निर्माणका कार्यहरु अगाडी बढाउन सकेको थिएन ।
केहीदिन अघि गाउँपालिकाका जनप्रतिनिधी बीच भएको सहमती अनुसार सोमबार गाउँसभा डाकिएको हो । गाउँसभा स्थलमा सुरक्षाकर्मी तथा सञ्चारकर्मीको ठुलो संख्यामा उपस्थिती रहेको थियो । प्रस्तुत गरिएको नीति तथा कार्यक्रम र बजेटका विषयमा छलफल गर्न मंगलबार (भोली) दिउँसो २ बजे गाउँसभा पुनः बस्ने बताइएको छ ।
