काठमाडौं : करोडौं रुपैयाँ राजश्व छलि गरेको अभियोगमा मुद्दा खेपेका उद्योगीलाई सरकारले पदक दिएको तथ्य बाहिर आएको छ । गृहमन्त्री बालकृष्ण खाँणको सिफारिसमा राजश्व छल्ने रुपन्देहीका उद्योगीलाई जनसेवाश्री पदक दिइएको हो ।
संबिधान दिवसको अवसरमा बुटवलस्थित श्रीराम टोबाको कम्पनीका सञ्चालक कमलकिशोर मालपानी, चुन्नुप्रसाद शर्मा पौडेल र नरिश्वर पौडेललाई पदले विभुषित गरिएको हो । राष्ट्रपति बिद्यादेवी भण्डारीले उनीहरुलाई संबिधान दिवसका दिन विशेष समारोहमा पदक हस्तान्तरण गरेकी थिईन् । उनीहरु तीनै जना राजश्व छलीमा मुद्दा खेपेका उद्योगीहरु रहेको राजश्व अनुसन्धान विभागले जनाएको छ ।
उनीहरुविरुद्ध ११ करोड ८१ लाख १६ हजार ७ सय ८५ रुपैयाँ राजश्व छलीमा विभागले मुद्दा चलाएको थियो । श्रीराम टोबाको कम्पनीले गुट्खा र सुर्ती उत्पादन गरी राजश्व छली गरेको प्रमाण भेटिएपछि विभागले २०७६ पुसमा काठमाडौं र रुपन्देहीमा मुद्दा दायर गरेको थियो । विभागले बुटवल नगरपालिका-१२ मा रहेको श्रीराम टोबाको उद्योग प्रा.लि.लाई १० करोड ७३ लाख बिगो कायम गरी रुपन्देही जिल्ला अदालतमा मुद्दा दायर गरिएको थियो ।
उक्त कम्पनीका सञ्चालक कमलकिशोर मालपानी, चुन्नुप्रसाद शर्मा पौडेल लगायतले कम्पनीबाट उत्पादन हुने अन्तःशुल्क लाग्ने सुर्तीजन्य पदार्थको उत्पादन कम देखाई विभिन्न विक्रेताको सहयोगमा स्टीकर र कर बिजक बिना मालवस्तु विक्री गरेको पाइएको विभागको अनुन्धानबाट खुलेको छ ।
भोला र करेन्ट ब्राण्डका अलावा कमल किशोर मालपानी र पौडेल बन्धुले नेपाली बजारमा अन्य विभिन्न नामका गुट्खा र सुर्ती विक्री गरी राजश्व छल्ने काम गर्दै आएको आरोप छ । भारतीय राज्य विहार र उत्तर प्रदेशमा प्लाष्टिकको प्याकेटमा सुर्ती र गुट्खा बिक्री गर्न प्रतिवन्ध लागेपछि मालपानीले नेपालबाट भारततर्फ सुर्ती र गुट्खा तस्करी समेत गर्दै आएको स्रोतले जनाएको छ ।
भारतीय बजारमा गुट्खाको माग बढी छ । मालपानी र पौडेलले आफ्नो कर्तुत ढाकछोप गर्नकै लागि गृहमन्त्री खाँणलाई प्रभावमा पारेर पदक फुत्काउन सफल भएको बताइन्छ । ‘यो घटनाले समग्र रुपमा पदककै अपमान गरेको महसुस भएको छ,’ एक कर्मचारीले भने ।
