फरार अभियुक्त कोइरीलाई समितिमा राख्न सभामुखको प्रस्ताव

राजनीति

Home
राजनीति
फरार अभियुक्त कोइरीलाई समितिमा राख्न सभामुखको प्रस्ताव

फरार अभियुक्त कोइरीलाई समितिमा राख्न सभामुखको प्रस्ताव

काठमाडौं : कर्तव्य ज्यान मुद्दाका आरोपी सांसद लक्ष्मी महतो कोइरीलाई संसदको उद्योग तथा वाणिज्य समिति सदस्यमा राख्न सभामुखले नै प्रस्ताव गरेका छन् । सभामुख देवराज घिमिरेले शुक्रबार बसेको प्रतिनिधिसभाको बैठकमा एमालेका सांसद कोइरीलाई समितिको सदस्यमा मनोनयन गर्न प्रस्ताव गरेका हुन् ।

सांसदको सपथ लिएपछि कोइरी फरार छन् । संसद बैठकमा नेपाली कांग्रेसका सांसद रामहरि खतिवडा लगायतले कोइरीलाई निलम्बन नगर्नुको कारणबारे प्रश्न उठाएका छन् । खतिवडाले कोइरी निरन्तर प्रतिनिधिसभाका १० वटा बैठकमा अनुपस्थित हुँदापनि संसदीय समितिमा समेत राखिएको भन्दै आपत्ति जनाए ।

प्रहरीले थुनामा राख्नुपर्ने व्यक्तिलाई सभामुखले सांसदबाट निलम्बन नगराएर जोगाएर राख्नुको कारण समेत खतिवडाले माग गरे । मधेश आन्दोलनका बेला आन्दोलनकारीको निर्घात आक्रमणबाट गम्भीर घाइते भएका सशस्त्र प्रहरीका सहायक निरीक्षक थमन बि.कलाई उपचारका लागि जनकपुर लैजाने क्रममा एम्बुलेन्सबाट थुतेर हत्या गरिएको आरोप सांसद कोइरीमाथि लागेको छ ।

२०७२ भदौं २५ गते उक्त घटना भएको थियो । हत्या प्रकरणमा कोइरीसहित २९ जनाविरुद्ध जिल्ला अदालतमा मुद्दा चलेको थियो । जिल्ला अदालत महोत्तरीले २०७६ असोज २ गते १ लाख रुपैयाँ धरौटीमा छाड्ने आदेश दिएपछि कोइरी तारेखमा छुटेका थिए ।

सरकारी वकिलको निवेदनमा जनकपुर उच्च अदालतले जिल्लाको आदेश उल्ट्याएर थुनामै राखेर मुद्दाको पुर्पक्ष गर्न आदेश दियो । २०७७ मंसिर १९ गते जिल्लाको आदेश उल्ट्याउँदै उक्त आदेश भएको थियो । उच्च अदालतले थुनामा राख्न पक्राउ आदेश समेत जारी गरेको छ ।

फरार अबस्थामै उनी चुनाव लडेका थिए । उच्च अदालतले आदेश दिए यता कोइरी हाजिर भएका छैनन् । फरार रहेकै अवस्थामा उनी प्रतिनिधिसभा सदस्य पदमा निर्वाचित भएर शपथ समेत खाएका थिए ।

प्रकाशित मिति: शुक्रबार, वैशाख १५, २०८० १९:४९

प्रतिक्रिया दिनुहोस्