नेपालगन्ज : नेपालगन्जमा बनाउन लागिएको ‘स्ट्रीट फुडलेन’ लाई चाडो कार्यान्वयनमा ल्याउनुको विकल्प नभएको निस्कर्ष निकालिएको छ । स्थानीय परिकारलाई एकै ठाउँबाट ब्यवस्थित रुपले बिक्री गर्ने उद्देश्यले नेपाल एशोसिएसन अफ टुर एण्ड ट्राभल एजेन्ट्स (नाट्टा) बाँकेको अग्रसरतामा त्रिभुवन चोक क्षेत्रमा ‘स्ट्रीट फुडलेन’ बनाउन लागिएको हो ।
नेपालगन्जमा मंगलबार सरोकारवाला पक्षसँग गरिएको छलफलमा सम्वद्धहरुले यहाँको आर्थिक अवस्थालाई माथी उठाउन ‘स्ट्रीट फुडलेन’ महत्वपूर्ण रहेको बताए । नेपालगन्ज उपमहानगरपालिकाका मेयर प्रशान्त विष्टले यहाँका स्थानीय परिकारलाई एकैठाउँमा ब्यवस्थित रुपले बिक्री गर्नका लागि ‘स्ट्रीट फुडलेन’ बनाउन आवश्यक देखिएको बताए ।
नाट्टा बाँकेले ल्याएको अवधारणालाई उपमहानगरपालिकाले सहर्ष रुपमा स्वीकार गरी कार्यान्वयनको चरणमा लगेको मेयर विष्टले सुनाए । तत्कालका लागि त्रिभुवन चोक क्षेत्रमा ‘स्ट्रीट फुडलेन’ बनाउने योजना अनुसार उपमहानगरपालिकाले शान्ति सुरक्षाका सवालमा स्थानीय प्रहरी प्रशासनसँग छलफल अगाडी बढाइसकेको बताए ।
‘स्ट्रीट फुडलेन’ बाट उत्पादन हुने फोहोर ब्यवस्थापन, शौचालयको ब्यवस्था, ‘स्ट्रीट लाईट जडान गर्ने जिम्मा उपमहानगरपालिकाको भएको र यसमा स्थानीय ब्यवसायीले पनि साथ दिनुपर्ने बताए । फुडलेन बनाउने विषयमा सरोकारवालाबीच पटक पटक छलफल हुँदै आएको छ ।
नेपालगन्ज फुडलेन व्यवस्थापन समितिका संयोजक समेत रहेका परिकल्पनाकार श्रीराम सिग्देलले नेपालगन्जको आर्थिक अवस्था माथी उठाउन ‘स्ट्रीट फुडलेन’ बनाउन आवश्यक रहेको बताए । ‘नेपालगन्जमा बिक्री भइरहेका स्थानीय खानेकुरालाई ब्यवस्थित तरिकाले स्ट्रीट फुडलेनमा पस्किन्छौं, स्वास्थ्य मापदण्ड अपनाएर राती अबेरसम्म आफ्ना परिकार बेच्न सक्यौं भने यहाँको स्थानीय परिकारको राष्ट्रिय तथा अन्र्तराष्ट्रिय स्तर सम्म प्रचार-प्रसार हुन्छ,’ उनले भने ।
भिडियो हेर्नुस् :
नेपालगन्जका विभिन्न अस्पतालमा भर्ना भएका करिव एक हजार बेडका बिरामी र तिनका कुरुवा, दिवाकालिन सेवाका बसमा रातको समयमा नेपालगन्ज आईपुग्ने यात्रु र यहाँका क्यासिनोमा आउने भारतीय पर्यटकले रातको समयमा पनि स्ट्रीट फुडलेनमा स्थानीय परिकार खान पाउने हुँदा आर्थिक अवस्था माथी उठ्ने सिग्देलको विश्वास छ ।
‘स्ट्रीट फुडलेन’ लाई आगामी जेठ १२ गतेदेखी औपचारिक रुपमा कार्यान्वयनमा लैजाने तयारी रहेको सुनाउँदै त्यसअघि सम्वद्ध ब्यवसायीलाई तालिम दिइने बताए । नेपालगन्ज उद्योग वाणिज्य संघका अध्यक्ष एवम् उद्योग वाणिज्य महासंघका केन्द्रिय सदस्य अब्दुल वाहिद मन्सुरीले नेपालगन्जको स्थानीय परिकारको प्रचार भएपनि ब्यवस्थित हुन नसकेको भन्दै स्ट्रीट फुडलेन बनाएपछि थप आर्कषण बढ्ने बताए । ‘बाहिरको मान्छे आएपछि नेपालगन्जको स्थानीय परिकार खान खोज्छ, त्यसका लागि त्रिभुवन चोकमा आउँछ, तपाईहरुले बेचिरहेको परिकारलाई ब्यवस्थित मात्रै गर्न खोजिएको हो,’ उनले भने ।
सो क्रममा वरिष्ठ पत्रकार हेमन्त कर्माचार्य, नेपालगन्ज उद्योग वाणिज्य संघका पुर्वअध्यक्ष कृष्णप्रसाद श्रेष्ठ, नेपालगन्ज उपमहानगरपालिका वडा नम्बर ८ का वडाअध्यक्ष रजनीश वाजपेयी र वडा नम्बर ११ का नन्दकिशोर कश्यपले पनि स्ट्रीट फुडलेनको महत्व र आवश्यकताका बारेमा आफ्नो धारणा राखेका थिए ।
नेपाल पत्रकार महासंघ बाँकेका पुर्वअध्यक्ष झलक गैरेले सहजीकरण गरेको उक्त छलफलमा उपस्थित त्रिभुवन चोक क्षेत्रका ठेला ब्यवसायीले आफुहरु स्ट्रीट फुडलेनमा समेटिन तयार रहेको बताए । अधिकांस ब्यवसायीहरु स्ट्रीट फुडलेन बन्ने भएपछि आफुहरुको ब्यापार, ब्यवसाय बढ्नेमा आशावादी देखिन्छन् ।
सम्बन्धित समाचार पढ्नुस् :
‘स्ट्रीट फुडलेन’ को यसरी बुझाइँदैछ महत्व र आवश्यकता-(भिडियो सहित)
नेपालगन्जको त्रिभुवन चोक क्षेत्रमा ‘स्ट्रीट फुड लेन' बनाइने
