देउखुरी : विभिन्न माग राख्दै नेपाल एशोसिएसन अफ टुर एण्ड ट्राभल एजेन्ट्स (नाट्टा) बाँकेले लुम्बिनी प्रदेशका मुख्यमन्त्री डिल्लीबहादुर चौधरीलाई ज्ञापन पत्र बुझाएको छ । मुख्यमन्त्री तथा मन्त्री परिषदको कार्यालय राप्ति उपत्यका (देउखुरी) मा नाट्टा बाँके च्याप्टर अध्यक्ष श्रीराम सिग्देलले ११ बुँदे ज्ञापन पत्र बुझाएका हुन् ।
उक्त ज्ञापन पत्रमा द्वन्द्वकाल देखि हालसम्म ट्राभल एजेन्सीहरु, होटल तथा रिसोर्टहरु नविकरण नहुनसकेकाले न्युनतम शुल्क लिई एउटै मापदण्ड कायम गरी नवीकरण गरिनुपर्ने, नेपालगन्ज-दिल्ली हवाई उडान सञ्चालन सम्बन्धमा हाल भइरहेको कारबाहीलाई केन्द्रिय सरकारसँग समन्वय गरि आवश्यक पहल गरिनुपर्ने, नेपाल पर्यटन तथा होटल व्यवस्थापन प्रतिष्ठान नेपालगन्जमा स्थापना भए पश्चात पनि बजेट अभावको कारण देखाई तहाँ कार्यरत कर्मचारीहरुलाई फिर्ता बोलाइएको र पुनः सञ्चालनको कुनै पहल नभएकोले त्यसतर्फ आवश्यक कारबाही गरिनुपर्नेमा माग गरिएको छ ।
यस्तै बैंक ग्यारेन्टी, झन्झटिलो दर्ता तथा नवीकरण प्रक्रिया सहजता ल्याउनुपर्ने, ट्राभल एजेन्टको अनुमति पत्र नलिई हवाई टिकट जारी गर्ने, कार्यलय खोली कारोबार गर्ने गराउने कार्य तत्काल रोकिनुपर्ने, अनलाइन तथा वित्तीय संस्थाहरुको अबैध पर्यटकिय कारोबार बन्द गरिनुपर्ने, पर्यटन मन्त्रालयले बजेट विनियोजन गर्दा विभिन्न पर्यटन व्यवसायीका छाता संगठनहरुसँग परामर्श गरि बजेट तर्जुमा गर्ने परंपराको थालनी गर्नुपर्ने, प्रदेश अन्तर्गतका सीमा नाका, अध्यागमन, भन्सार पर्यटकमैत्री एवं नेपालगन्ज लगायत पर्यटकीय गन्तव्य भएका जिल्लामा पर्यटन प्रहरी गठन गरि परिचालन गर्नुपर्ने नाट्टा बाँकेको माग छ ।
यसैगरी पर्यटनलाई अन्य उद्योग सरह मान्यता दिई विद्युत महसुल तथा अन्य शुल्क मिनाहा गरिनुपर्ने, जमुनाहा नाकामा हाल बन्द अवस्थामा रहेको पर्यटक सूचना केन्द्रमा आवश्यक दरबन्दी कायम गरि पुनः सञ्चालन गर्नुपर्ने, भारतीय सिमामा भारतिय इमिग्रेशन चेकपोष्टबाट सडक मार्गद्धारा विदेशी पर्यटकहरुलाई आवत/जावत हाल सुनौली नाकाबाट मात्र दिईएको अवस्थामा नेपालगन्ज सीमा नाकाबाट पनि खुल्ला गर्न पहल गर्नुपर्ने, पर्यटन व्यवसायीहरुको अग्रणी संस्था नाट्टा र नेपाल पर्यटन बोर्डद्वारा आयोजना गरिदै आएका बुद्ध इन्टर नेश्नल ट्राभल मार्ट, नेपालगन्जमा हुदै आएको वेष्टर्न ट्राभल मार्ट र प्रशिद्ध शक्तीपिठ बागेश्वरीमा प्रारम्भ गरिएको महाआरतीको स्थायित्वका लागि प्रदेश सरकारबाट बजेट विनियोजन गरि अभिभावकत्व ग्रहण गरिनुपर्ने ज्ञापन पत्रमा उल्लेख गरिएको छ ।
‘नेपालगन्ज देशकै ठूलो सहर मध्ये एक हो, पश्चिम नेपालको आर्थिक समृद्धिसँग जोडिएको नेपालगन्ज पर्यटकीय दृष्टिकोणले गेट-वे र हब दुबै हो, यहाँका पर्यटकिय प्रतिष्ठानहरुले सेवा प्रबाह गर्दै पर्यटकीय गतिविधिलाई चलायमान गराउदै आएका छन्, तर राज्यले पर्यटन ब्यबसायीहरुका गुनासा र समस्याहरु सुन्ने गरेको छैन,’ ज्ञापन पत्रमा भनिएको छ ‘तसर्थ, नयाँ सरकार नयाँ जिम्मेवारी लिएर आउनु भएको माननीय मुख्यमन्त्री ज्यु समक्ष हामी पर्यटन व्यवसायीका तपशिल बमोजिमका विद्यमान समस्याहरु समाधानका निम्ति यो ज्ञापन पत्र बुझाएका छौं ।’
ज्ञापन पत्र बुझिसकेपछि मुख्यमन्त्री चौधरीले नेपालगन्जको विकासका लागि आफुले आवश्यक पहल गर्ने प्रतिवद्धता जनाए । सो क्रममा नाट्टा बाँकेका महासचिव झविलाल शर्मा लगायतको उपस्थिती रहेको थियो ।
