नेपालगन्ज : नेपालगन्जस्थित नेपाल–भारत सिमानाका जमुनाहामा स्थापना गरिएको पर्यटन सूचना केन्द्र प्रयोगविहिन बन्न पुगेको छ । भारतबाट नेपालगन्ज हुदै भित्रिने पर्यटकलाई लक्षित गरेर गतवर्ष उक्त केन्द्र स्थापना गरिएको थियो । लुम्बिनी प्रदेश सरकारको बजेटमार्फत नेपालगन्ज उपमहानगरपालिकाको प्राविधिक सहयोगमा भवन निर्माण कार्य सम्पन्न गरिएको थियो ।
केन्द्र स्थापना भएपनि प्रयोगमा आउन नसकेको पर्यटन डिभिजन कार्यालय बाँकेका प्रमुख माधव ज्ञवालीले बताए । ‘पर्यटन सूचना केन्द्र भवन निर्माण भएको धेरै भईसक्यो, तर अहिलेसम्म त्यो भवन कस्ले प्रयोग गर्ने भन्ने टुंगो लाग्न सकेको छैन,’ उनले भने ।
प्रमुख ज्ञवालीले पर्यटन सूचना केन्द्र पर्यटन डिभिजन कार्यालय वा पर्यटन बोर्ड मध्ये कस्लाई प्रयोग गर्न दिने भन्नेमै टुंगो लाग्न नसकेको बताए ।
पर्यटन सूचना केन्द्र सञ्चालनका लागि आवश्यक पर्ने बजेट र कर्मचारीको ब्यवस्थापन हुन नसकेको उनको भनाइ छ । पर्यटन प्रर्वद्धन मञ्च बाँकेका संयोजक कृष्णप्रसाद श्रेष्ठले एक वर्षअघि स्थापना पर्यटन सूचना केन्द्र स्थापना भएकोमा
भएको एक वर्ष पहिले सूचना केन्द्र स्थापना भएको सूचना केन्द्र सञ्चालनमा नआउँदा भारतबाट आउने पर्यटकले सेवा पाउन नसकेको बताए ।
‘यो नाकाबाट आउने पर्यटकलाई यस क्षेत्रका पर्यटकीय गतिविधी जान्न, बुझ्न सहजा होस् भनेर नै स्थापना गरिएको थियो, तर कर्मचारी नरहेको अवस्था छ,’ उनले भने । भारतबाट आउने पर्यटकका लागि नेपालका पर्यटकीय स्थलका बारेमा केन्द्रले डिसप्लेसहित जानकारी गराउने मन्त्रालयको अवधारणा छ ।
‘प्रदेश सरकारको यो एकदमै राम्रो अवधारणा हो, सूचना केन्द्रका लागि भवन त बन्यो, तर केन्द्रले कर्मचारी र बजेट नपाउँदा प्रयोगविहिन बन्न पुग्यो,’ पर्यटन ब्यवसायी भन्छन् । लुम्बिनी प्रदेश सरकारले चाडो भन्दा चाडो पर्यटन सूचना केन्द्र सञ्चालनमा ल्याउनुपर्ने यहाँका पर्यटन ब्यवसायीको माग छ ।
भिडियो हेर्नुस् :
