एमालेको विरोधपछि राष्ट्रिय सभाको बैठक स्थगित

राजनीति

Home
राजनीति
एमालेको विरोधपछि राष्ट्रिय सभाको बैठक स्थगित

एमालेको विरोधपछि राष्ट्रिय सभाको बैठक स्थगित

काठमाडौं : नेकपा (एमाले) का सांसदहरुले अवरोध गरेपछि राष्ट्रिय सभाको बैठक आज स्थगित भएको छ । बैठक सुरु हुनासाथ राष्ट्रिय सभाका ध्यक्ष गणेशप्रसाद तिमिल्सिनाले दलका सांसद भैरव सुन्दर श्रेष्ठलाई बोल्नका लागि अनुमति दिए ।

राष्ट्रिय सभाको अर्को बैठक यही असार २२ गते शुक्रबार १२.२९ बजे बस्ने भएको छ । सांसद श्रेष्ठले केही दिन पहिलेको एक कार्यक्रममा प्रधानमन्त्री पुष्पकमल दाहालले दिएको अभिव्यक्ति राष्ट्रियहितविपरीत रहेको आरोप लगाए । उनले प्रधानमन्त्रीको भनाइ गलत भएको तर्क गर्दै त्यसविरुद्ध विरोध गर्ने आफ्नो संसदीय दलको निर्णय भएको बताए ।

सभाध्यक्ष तिमिल्सिनाले पटक–पटक एमालेका सांसदलाई आसन ग्रहण गर्न आग्रह गरे । तर, उनीहरुले उभिए विरोध जनाइरहेका थिए । सभाध्यक्ष तिमिल्सिनाले प्रधानमन्त्री पुष्पकमल दाहाललाई बोलाएर उनको धारणा सुन्ने वातावरण बनाउने र बजेटको संवेदनशीलतालाई ध्यानमा राखेर बैठक सञ्चालनका लागि आग्रह गरेका थिए ।

राष्ट्रियसभाको आजको बैठकमा उद्योग वाणिज्य तथा आपूर्तिमन्त्री रमेश रिजालले ‘विद्युतीय व्यापार विधेयक, २०८०’ सभा समक्ष पेस गर्ने कार्यसूची रहेको छ । त्यस्तै, विनियोजन विधेयक, २०८० का विभिन्न शीर्षकमध्ये अर्थ, श्रम रोजगार तथा सामाजिक सुरक्षा, शिक्षा, विज्ञान तथा प्रविधि, कानुन, न्याय तथा संसदीय मामिला र कृषि तथा पशुपक्षी विकास मन्त्रालयमाथि छलफल हुने कार्यसूची तय गरिएको छ ।

प्रकाशित मिति: बिहीबार, असार २१, २०८० १४:०५

प्रतिक्रिया दिनुहोस्