बाँके(कुसुम) : कुसुम ग्रामिण विद्युत सहकारी संस्था लिमिटेडको निर्वाचनको मैदानमा उत्रिएको प्रजातान्त्रिक/प्रगतिशील समुहले लोकप्रिय एजेण्डा ल्याएको छ । यही साउन ३२ गते नयाँ नेतृत्व चयनका लागि निर्वाचन हुदैछ ।
प्रजातान्त्रिक/प्रगतिशील समुहको तर्फबाट अध्यक्ष पदमा तेजबहादुर सुवेदी मैदानमा छन् । यस्तै उपाध्यक्षमा गेहेन्द्रकुमार खड्का र सचिवमा मनोजकुमार बैश्य प्रतिस्पर्धा गरिरहेका छन् । यसैगरी लेखा समिति संयोजकमा टिकाराम बस्नेत, सदस्यमा केशवबहादुर खड्का, मिनकुमार देवकोटा र अम्मरराज ओली उम्मेदवार बनेर मतदातासँग भोट भागिरहेका छन् ।
कुसुम ग्रामिण विद्युत सहकारी संस्था लिमिटेडको निर्वाचन सरगर्मी निकै बढेको छ । यतिबेला कुसुमेली नागरिकहरु बिद्युतको सक्षम नेतृत्व छान्ने कसरतमा छन् । ग्रामिण विद्युत सहकारी संस्थालाई हाँक्न सक्ने अनुभवी नेतृत्व छान्न कुसुमेली नागरिकहरु एकमत देखिन्छन् । निर्वाचनका लागि दुई वटा प्यानल खडा भएका छन् । अर्को प्यानलको नेतृत्व देवबहादुर केसीले गरेका छन् । कोषाध्यक्ष पदमा भने धु्रब घर्तीमगर निर्विरोध भइसकेका छन् ।
यस्ता छन्, प्रजातान्त्रिक/प्रगतिशील समुहको संकल्प
सुवेदी नेतृत्वको समुहले कुसुम ग्रामिण विद्युत सहकारी संस्था लिमिटेडको विधान र नियमावली बमोजिम वार्षिक रुपमा साधारण सभा र सार्वजनिक सुनुवाई गर्ने संकल्प गरेको छ । कुसुम ग्रामिण विद्युत सहकारी संस्थाको अधुरो कार्यालय भवनको निर्माण कार्य यथाशिघ्र सम्पन्न गर्ने उक्त समुहको प्रतिवद्धता छ ।
किसानहरुको लागि कृषि मिटर वितरण गर्न आवश्यक पहल गर्ने, घरेलु तथा साना उद्योग व्यवसाय सञ्चालनका लागि सुविधायुक्त विद्युत मिटर वितरण गर्ने, अति गरिब उपभोक्ताहरुको पहिचान गरी विद्युत शुल्कमा छुटको व्यवस्था गरिने, शेयर सदस्यताको प्रमाणपत्र ६ महिना भित्र उपलब्ध गराइने प्रजातान्त्रिक/प्रगतिशील समुहले चुनावी एजेण्डा तय गरेको छ ।
यसैगरी बिद्युत लाईन बिस्तार हुन बाँकी ठाउँमा लाईन बिस्तार गरिने, बिद्युत संस्थाले तिर्दै आएको जग्गा बहाल कर मिनाहा गर्न पहल गरिने, अतिगरिब, एकल महिला, अपांगता भएका तथा असक्तलाई निःशुल्क बिद्युत मिटर वितरण गरिने, ग्राहकहरुलाई बिद्युतबाट हुन सक्ने सम्भावित दुर्घटना जोखिम बिमा बनाउन पहल गरिने, विधान अनुसार थप शेयर सदस्यता वितरण गर्ने प्रक्रिया प्रारम्भ गरिने उक्त समुहले मतदातामाझ संकल्प गरेको छ ।
यो पनि पढ्नुस् :
कुसुम ग्रामिण विद्युत सहकारी संस्थाको निर्वाचन सरगर्मी बढ्यो
