नेपालगन्ज : नेपालगन्ज उद्योग वाणिज्य संघ निर्वाचनका लागि मैदानमा उत्रिएको ‘साझा प्रजातान्त्रिक समुह’ उद्योगी, व्यवसायीका समस्या सुन्न घरदैलोमा पुगेको छ । नेपाल-भारत खुल्ला सिमाका कारण नेपालगन्जका उद्योगी, ब्यवसायी अत्यन्त मारमा छन् ।
यस्तै सिमा क्षेत्रबाट बिभिन्न मालसामान, जडिबुटी निकासी तथा पैठारी गर्न पनि उद्योगी, व्यवसायीलाई नीतिगत समस्या रहँदै आएको छ । यस विषयमा लामो समयदेखी उद्योगी, व्यवसायीले आवाज उठाएपनि अहिलेसम्म समस्या समाधान हुन सकेको छैन ।
सामान आयात–निर्यातमा भारत र नेपालको भन्सार कार्यालयले विभिन्न बहानामा अतिरिक्त शुल्क असुल्ने, अनावश्यक दुःख दिने गरेको उद्योगी, व्यवसायीले गुनासो गर्दै आएका छन् । संघको आगामी भदौं २ गते नेपालगन्जमा हुन लागेको निर्वाचनको संघारमा उद्योगी, व्यवसायीका यि सवाल चर्चामा आएका छन् ।
उक्त निर्वाचनका लागि साझा प्रजातान्त्रिक समूहबाट चुनावी मैदानमा उत्रिएका अध्यक्ष पदका उम्मेदवार ललितकुमार रौनियार सहित उम्मेदवारको टोली उद्योगी, व्यवसायीको घरदैलोमा पुगेर सिमा क्षेत्रमा उत्पन्न समस्याबारे आवश्यक पहल गर्ने प्रतिवद्धता जनाएको हो ।
अध्यक्ष पदका उम्मेदवार रौनियारले आफुलाई यसपटक उद्योगी, ब्यवसायीका हकहितका निम्ति काम गर्ने अवसर दिन आग्रह गर्दै निर्वाचित भएपछि सिमाक्षेत्रका समस्या, उद्योगी व्यवसायीले भोग्नु परेका अन्य समस्या समाधान गर्न आवश्यक पहल गर्ने प्रतिवद्धता जनाए ।
उपाध्यक्ष पदका उम्मेदवार विष्णुप्रसाद श्रेष्ठले खुल्ला सिमानाका कारण नेपालगन्जका उद्योगी, व्यवसायीले भोग्नु परेका समस्यालाई आफुहरुले नजिकबाट हेरिरहेको र निर्वाचित भएपछि समस्या समाधानका लागि पहल गर्ने प्रतिवद्धता ब्यक्त गरेका छन् ।
महासचिव पदका उम्मेदवार टंकप्रसाद शर्माले नेपालगन्जका उद्योगी, व्यवसायीले लामो समयदेखी भोग्दै आएको समस्या समाधान गर्न आफुहरुले नेपाल र भारतका उच्च अधिकारीलाई दवाव सिर्जना गर्ने बताएका छन् । उनी नेपाल जडिबुटी व्यवसायी संघ नेपालगन्जका केन्द्रीय अध्यक्ष पनि हुन् ।
यसक्षेत्रका उद्योगी, व्यवसायीले विभिन्न मालसामान, जडिबुटी निकासी पैठारी गर्दा भोग्नु परेका समस्यालाई आफुहरुले नजिकबाट हेरेको बताउँदै समस्या समाधानका लागि जिम्मेवारी पदमा पुर्याउन अपिल गरेका छन् ।
यस्तै कोषाध्यक्ष पदका उम्मेदवार मख्खन धामीले नेपालगन्जका उद्योगी, व्यवसायीका समस्या सुन्दै टिपोट गरिएको बताए । ‘हामीले उहाँहरुका समस्यालाई एक एक गरेर टिपोट गरेका छौं, निर्वाचित भएपछि उद्योगी, व्यवसायीका सुझाव अनुसार काम गर्छौ र उत्पन्न समस्या समाधान गर्नतर्फ ध्यान दिन्छौं,’ धामीले भने ।
उम्मेदवारका प्रतिवद्धता सुनेपछि उद्योगी, व्यवसायीले आफुहरुले काम गर्ने नेतृत्वलाई जिताउने आश्वासन दिएका छन् । साझा प्रजातान्त्रिक समुहका उम्मेदवारहरु मतदातालाई आफ्ना एजेण्डा सुनाउँदै घर घरमा पुगिरहेका छन् । अधिकांस ठाउँमा उम्मेदवारलाई मतदाताले स्वागत गर्ने गरेका छन् ।
