नेपालगन्ज : नेपालगन्ज उद्योग वाणिज्य संघलाई व्यवस्थित र पारदर्शी बनाउने एजेण्डा सहित यतिबेला निर्वाचनमा होमिएका छन्, मख्खन धामी । नेपालगन्ज रंगशालामा शनिबार हुन लागेको निर्वाचनमा उनी कोषाध्यक्षको उम्मेदवार हुन् ।
साझा प्रजातान्त्रिक उद्योगी व्यवसायी समुहको तर्फबाट उम्मेदवार रहेका उनी लोकप्रिय उम्मेदवारको सूचीमा पर्छन् । युवा जोश जाँगर र उत्साहका साथ निर्वाचनमा होमिएका धामी युवा व्यवसायीका लागि रोल मोडेल हुन् । उनले व्यवसायिक क्षेत्रमा छोटो अवधिमा निकैं सफलता हासिल गरेका छन्, जुन सहज रुपमा सबैले पाउन सक्दैनन् ।
व्यवसायी मख्खनले उद्योगी, व्यवसायीका हरेक समस्या र दुःखमा साथ दिन्छन् । प्रष्ट बोल्ने स्वभावका धामीले राजनीति हुँदै व्यवसायिक क्षेत्रमा सफलता हासिल गर्दै आएका छन् । उनी २० वर्षदेखि व्यवसायीक क्षेत्रमा छन् ।
व्यवसायका क्षेत्रमा कति व्यवसायीलाई बेकिङ सम्बन्धि ज्ञान छैन, भन्सारमा हुने समस्याको ज्ञान छैन त्यो चेतनादिन संघले नेतृत्वदायी भुमिका निर्वाह गर्नुपर्ने धामीको तर्क छ । बिद्यार्थीकालदेखि उनले राजनीति सुरु गरेका हुन् । कोषाध्यक्षको जिम्मेवारीमा पुगेपछि नेपालगन्ज उद्योग वाणिज्य संघमा आर्थिक सुशासन कायम गराउन चाहन्छन्, उनी ।
धामी सफल व्यवसायीका रुपमा स्थापित भइसकेका छन् । व्यवसायसँगै सामाजिक क्षेत्रमा उनको सक्रियता रहेको छ । सामाजिक सेवाभावले प्रेरित हुँदैं धामीले विभिन्न संघ, संस्थामा आबद्ध भएर ज्ञान हासिल गर्दै व्यवसायिक क्षेत्रमा सक्रिय छन् । उनले विगत २० वर्षदेखि मध्य र सुदुरपश्चिममा खाद्यान्नको थोक बिक्रेता भएर काम गरिरहेका छन् ।
उनी युवालाई सकारात्मक उर्जा दिन चाहन्छन्, युवाले नेपालमै केही गर्नपर्छ भन्ने सन्देश प्रवाह गरिरहेका छन् । उनी भन्छन, ‘प्रत्येक युवा काम गर्नलाई सक्षम छन् । परिश्रम गरेपछि नेपालमै जताततै पैसा छ । तर अहिलेका युवाको रोजाईंमा विदेश परेकाले नेपालमा केही पनि छैन भन्ने मनोवृत्तीको म परिवर्तन गर्न चाहान्छु ।’
अहिलेका युवाहरुमा केही गरेर देखाउनुपर्छ भन्ने जोश र जाँगर हुनुपर्छ भन्ने उनको बुझाई छ । उनी भन्छन्, ‘व्यवसायमा सफल हुनलाई गलनशिता र ईमान्दारिता हुनुपर्छ । पैसा नै ठूलो कुरा हाईन श्रम र ईमान्दारिता ठूलो कुरा हो ।
कसैले म केही गर्छु भन्ने लक्ष्य राख्छ भने त्यसले सफलता हासिल गर्न सक्छ ।’ अहिले व्यवसायका माझ लोकप्रिय उम्मेदवार बनेका धामी भन्छन्, ‘संसारको सबैभन्दा सुन्दर देश नेपाल हो । परिश्रम गरे जताततै पैसा पाउन सकिन्छ, काम सानो र ठूलो हुँदैन । जस्तो पनि व्यवसाय गरे पनि मिहिनेत र इमानदारिताका साथ काम गरे सफल हुन सकिन्छ ।’
धामी निकिता इन्टरप्राइजेज प्रालि, निकिता फुड प्याकेजिङ उद्योगको प्रबन्ध निर्देशक, खाद्यन्नको थोक विक्रेता, चामल चिनीको बिक्रेता हुन् । व्यवसाय संगै उनी नेपालगन्ज वितरक संघको महासचिव,नेपालगन्ज खाद्य तथा किराना संघको कार्यसमिति सदस्य,लायन्स क्लब अफ नेपालगन्जको अध्यक्ष र सामुदायिक प्रहरी सेवा केन्द्र बाँके कार्यसमिति सदस्य लगायत विभिन्न क्षेत्रमा आबद्ध निरन्तर मानविय सेवामा लागिरहेका छन् ।
धामीसहित साझा प्रजातान्त्रिक उद्योगी व्यवसायी समुहका तर्फबाट अध्यक्षमा ललितकुमार रौनियार, उपाध्यक्ष (बाणिज्य) मा विष्णु प्रसाद श्रेष्ठ, उपाध्यक्ष (उद्योग) मा मोहम्मद सफिक बेहना, उपाध्यक्ष (महिला) मा करिष्मा योगी, महासचिवमा टंकप्रसाद शर्मा, उपमहासचिवमा टेकबहादुर खड्का प्रतिस्पर्धामा छन् ।
यस्तै सदस्यहरुमा शिवप्रसाद दाहाल, अतुलकुमार गुप्ता, बिवेक कुमार श्रेष्ठ, सन्तोष कुमार पौडेल, पदम श्रेष्ठ, युवराज ढकाल, प्रमोदकुमार अग्रवाल, कैफुल वरा जोलाहा, सुनिल भण्डारी, बलबहादुर बिष्ट (बबी), प्रदीकुमार गुप्ता सदस्य (एशोसिएट), पुरुषोतम अग्रवाल सदस्य (एशोसिएट), हिमनाथ पौडेल सदस्य, सम्बद्ध (वस्तुगततर्फ) र विनय श्रेष्ठ सदस्य, सम्बद्ध (वस्तुगततर्फ) ले प्रतिस्पर्धा गरिरहेका छन् ।
