नेपालगन्ज : ओलीका कुलदेवता 'चित्रालेखी' को उद्गमस्थल अन्ततः कर्णाली प्रदेशको रुकुममा पत्ता लागेको छ । रुकुम पश्चिम, आठविसकोट नगरपालिका वडा नम्बर ४ को गोतामकोट अन्तरगत पर्ने 'चित्रीपाटन' मा हालै उद्गमस्थल पत्ता लागेको हो ।
धामी र पुजारीसहित पुगेका ओली वंश समन्वय समाजको टोलीले यही कात्तिक १० गते बिहान ठाउँ पत्ता लगाएको समाजका कर्णाली प्रदेश अध्यक्ष गंगाराम ओलीले जानकारी दिए । चित्रालेखी कुलदेवताको उद्गम स्थल कुन ठाउँ भन्ने खोज अनुसन्धान भइरहेका बेला आधार प्रमाणित गर्न धामी र पुजारीसहितको टोली चित्रीपाटन पुगी कुलदेवता आफैले अनुसन्धान गरेर चिन्ह राख्न धजा र त्रिशुुल गाडिएको उनले बताए ।
‘चित्रालेखी कुलदेवताको उद्गम स्थल चित्रीपाटनमा कुन ठाउँ भन्ने खोज अनुसन्धानका क्रममा आधार प्रमाणित गर्न आवश्यक भएकोले त्यहाँ पुगेर धजा बाँधेर त्रिशुल गाड्ने काम यही कात्तिक १० गते बिहान १०ः१० बजे सम्पन्न गरेका छौं,’ अध्यक्ष गंगारामले भने ।
सो कार्यका लागि ओली वंश समन्वय समाज कर्णाली प्रदेशका अध्यक्ष गंगारामसहित केन्द्रीय सदस्य टेकबहादुर ओली, कुल पुजारी धनीराम ओली, कुल धामी ऐभान ओली, सहयोगीहरु बमबहादुर ओली, शेरबहादुर ओली, लखन बोहरा, खड्कबहादुर केसी, विकरोजन मल्ल, नरेश भण्डारी, शक्ति खत्री, टेकराज बुढा, शितल बिष्ट र विशाल थापा पुगेका थिए ।
चित्रालेखीको उद्गमस्थल पत्ता लागेपछि आगामी दिनमा त्यहाँसम्म सहज रुपमा पुग्ने बाटो, मन्दिर तथा थान निर्माण गर्ने बाटो खुलेको समाजका कर्णाली प्रदेश अध्यक्ष गंगारामले बताए । ‘यो त्रिशक्ती देवताको स्थान पनि भएकाले यहाँ पुगेर भाकल गर्ने, पुजा गर्ने हिसाबले चर्चित हुनेछ, चित्रालेखीसँग भाकल गरेपछि अवश्य पनि मनले चिताएको पुरा हुनेछ, यसलाई पर्यटनसँग जोडेर पनि लैजान सकिन्छ,’ उनले भने ।
समाजले आफ्नो वंशावली तयार गरिरहेका बेला उद्गमस्थल पत्ता लागेपछि सहज भएको समाजका अगुवा बताउँछन् । ‘यही बेलामा हाम्रो वंशावली तयार हुँदैछ, वंशावली तयार हुदै गर्दा चित्रालेखी कुलदेवताको उद्गमस्थल पत्ता लागेको हुँदा अब वंशावलीमा पनि यो कुरालाई खुलाउन पक्कै पनि सहज हुनेछ,’ केन्द्रीय सदस्य टेकबहादुरले भने ।
चित्रीपाटनसम्म कसरी जाने ?
कोहलपुरबाट सुर्खेतको छिन्चु हुँदै सल्यानको सल्लीबजार, सल्लीबजार हुदै जाजरकोट सदरमुकाम खलंगा, खलंगा बजार हुँदै जाजरकोटको रिम्ना, रिम्नाबाट चिसापानी हुँदै राडी बजार, राडी बजारबाट तल्लु बगर हुँदै छहरे बगर, छहरे बगरबाट गोतामकोट हुँदै नयाँ डाँडासम्म मोटसाईकल वा चारपांग्रे सवारी साधनमार्फत पुग्न सकिन्छ । त्यसपछि नयाँ डाँडाबाट करिव ७ देखी ९ घण्टाजति पैदल हिडेर चित्रीपाटन पुग्न सकिन्छ ।
आठविसकोटको राडीबजार :
आठविसकोटको गोतामकोट :
