बाँके (राप्ती सोनारी) : एक्सिलेण्ट पेपर रिसाईकल कन्सर्न प्रा.लि.ले आइतबार चौथो विशेष भेला तथा शेयर सदस्यता वितरण कार्यक्रम गरेको छ । ‘आफै श्रमिक, आफै मालिक-उत्पादन हाम्रै नेपालको’ भन्ने नाराका साथ कम्पनीले राप्ती सोनारी गाउँपालिका वडा नम्बर २ महेन्द्रपुर गाउँमा उद्योग स्थापना गर्ने तयारी गरिरहेको छ ।
कम्पनीका प्रमुख ज्योतिलाल भण्डारीको सभापतित्व एवम् राप्ती सोनारी गाउँपालिका अध्यक्ष तप्तबहादुर पौडेलको प्रमुख आतिथ्यतामा सम्पन्न भेलामा शेयर सदस्यहरुलाई प्रमाणपत्र वितरण गरिएको थियो । यो नेपालमै पूर्ण रुपमा पाइने कच्चा पदार्थबाट बन्ने देशकै गौरवको परियोजना भएको कम्पनीले जनाएको छ ।
खेर गएका पेपर, प्याकेजिङ उद्योगबाट र छापाखानाबाट निस्कने पेपरका झुरा, पुराना पत्रपत्रिका, पुराना किताव, पुराना कापी, पुराना कपडा, प्लाष्टिकका झोला, धानको भुस तथा काम नलाग्ने फाईवरयुक्त वस्तुहरुलाई पल्प तथा पेपर मेसिनबाट रिसाईकल्ड पेपर उत्पादन गरिने कम्पनीले जनाएको छ ।
सो भेलालाई सम्बोधन गर्दैै प्रमुख अतिथी समेत रहेका गाउँपालिका अध्यक्ष पौडेलले स्थापना हुने उद्योगलाई काम गर्ने वातावरण आफुले बनाईदिने बताए । उद्योगले सरकारको नीति नियममा रहेर काम गर्नेमा विश्वास ब्यक्त गरे ।
यस्तै कम्पनीका प्रमुख भण्डारीले उद्योग सञ्चालन भएपछि नेपालीलाई आत्मनिर्भर बनाउने बताए । आफै मालिक र आफै मजदुर भएर उद्योग सञ्चालन गर्ने अवधारणा ल्याइएको उनले सुनाए । २०७६ सालमा दर्ता भएपनि कम्पनीलाई विस्तार गरेर बृहत रुपमा काम गर्नका लागि उद्योग स्थापना गर्न लागिएको बताए । ३० टन कागज उत्पादन गर्ने लक्ष्य राखिएको छ ।
उद्योगले दैनिक रुपमा उद्योगले करिव १ हजार जनालाइ प्रत्यक्ष र अप्रत्यक्ष रुपमा रोजगारी प्रदान गर्ने अपेक्षा गरिएको छ । कम्पनीको २६ करोड अधिकृत पुँजी रहेको बताइएको छ । कम्पनीले हालसम्म १६ विघा जमिन खरिद गरिसकेको छ । बैंकिङ प्रक्रिया सबै मिलेमा अबको ६ महिना भित्रमा पुर्वाधार निर्माणको काम सम्पन्न गरेर उत्पादन कार्य सुरु गर्ने कम्पनीले लक्ष्य लिएको छ ।
सो क्रममा कम्पनीका तर्फबाट राजन चौधरी, शेयर सदस्य भिमबहादुर रानाक्षेत्री, नेपाल पत्रकार महासंघका पुर्वकेन्द्रीय सदस्य झलक गैरे लगायतले पनि आफ्नो धारणा राखेका थिए ।
