बाँके (नौवस्ता) : बैजनाथमा रहेको नौवस्तामा बस्ती ब्यवस्थापनसँगै औद्योगिक क्षेत्रमा नक्साङ्कनको तयारी अन्तिम चरणमा पुगेको छ । बैजनाथ गाउँपालिकाका जनप्रतिनिधि, औद्योगिक क्षेत्र ब्यवस्थापन लिमिटेड र स्थानीय समाजसेवीले आइतबार स्थलगत रुपमा अध्ययन गरेका हुन् ।
यसअघि औद्योगिक क्षेत्र लिमिटेडका प्राविधिकले ड्रोन क्यामेरामार्फत गरेको नक्सा सर्वेको कामलाई अन्तिम रुप दिन आइतबार पुनः स्थलगत अध्ययन गरिएको हो । सो क्रममा बैजनाथ गाउँपालिका अध्यक्ष प्रकाशबहादुर शाही, औद्योगिक क्षेत्र ब्यवस्थापन लिमिटेड सञ्चालक समितिका अध्यक्ष बाबुराम पन्त, बैजनाथ गाउँपालिका वडा नम्बर ३ का वडाअध्यक्ष निखिल बैगार, औद्योगिक क्षेत्र ब्यवस्थापन लिमिटेडका कर्मचारी, सुरक्षा निकाय, स्थानीय समाजसेवी लगायतले स्थलगत रुपमा अध्ययन गरेका हुन् ।
स्थलगत रुपमा निरीक्षण गरेपछि अध्यक्ष शाहीले नेपाल सरकारले विगतमा औद्योगिक क्षेत्र सञ्चालन गर्ने प्रयास गरेपनि दोहोरो विवादका कारण समाधान हुन नसकेको स्मरण गर्दै बैजनाथ गाउँपालिकाको वर्तमान सरकारको पटक पटकको प्रयासले अहिले सार्थकता पाउन थालेको बताए ।
‘सुरुको चरणबाट जाने सहमती अनुसार नक्सांकन गर्ने र बस्तीलाई बचाएर कसरी सम्पन्न गर्न सकिन्छ भनेर हामी लागेका छौं,’ शाहीले भने ‘२०७९ बैशाख ३० गतेको चुनावमा पनि हामीले यो समस्या समाधान गर्ने प्रतिवद्धता जनाएका थियौं, अब यो सफल हुन्छ जस्तो लागेको छ ।’ मानव बस्ती बचाएर नौवस्ता औद्योगिक क्षेत्र चाडो सञ्चालन गर्नुपछ भनी पटक-पटक केन्द्रमा धाएको उनले स्मरण गरे ।
‘फिल्डमा खटिएर हेरेपछि अझ क्लियर हुन्छ भनेर स्थलगत अध्ययनमा निस्केका हौं, यसमा कुनै दुई चार वटा घर पर्न सक्लान्, तिनीहरुको पनि ब्यवस्थापन हुन्छ, हामी सर्बपक्षिय छलफल गरेर जनतासँग पनि बसेर फेरी राय लिन्छौं र समझदारी गरेर मात्र अगाडी बढ्छौं,’ अध्यक्ष शाहीले भने ।
औद्योगिक क्षेत्र ब्यवस्थापन लिमिटेड सञ्चालक समितिका अध्यक्ष बाबुराम पन्तले विगतमा थुप्रेै कारणले ढिला भएपनि अब यसले छिट्टै गति लिने बताएका छन् । ‘जहाँ विवाद देखिएको थियो, त्यो क्षेत्रको सिमांकनका लागि स्थलगत अध्ययन गरेका हौं,’ उनले भने ‘यो वर्ष नौवस्ता औद्योगिक क्षेत्रको लागि केही बजेट सरकारले छुट्याएको छ, त्यो बजेटबाट जमिन मिलाउने कामको टेण्डर हुन्छ ।’
नौवस्ता औद्योगिक क्षेत्र बहुवर्षिय आयोजना भएको र आगामी तीन वर्षभित्रमा काम सम्पन्न हुने जानकारी दिए । सरकारले २०७२ चैत १ गतेको मन्त्रि परिषद बैठकबाट बाँकेको नौवस्तामा लुम्बिनी प्रदेश अन्तर्गतको औद्योगिक क्षेत्र स्थापना गर्ने घोषणा गरेको थियो । घोषणा पश्चात सरकारले २०७५ कात्तिक ७ गते औद्योगिक क्षेत्र परियोजना कार्यालय स्थापना गरेको थियो ।
