नेपालगन्ज : स्वदेशी तथा विदेशी पर्यटकलाई स्वागत गर्न बाँके राष्ट्रिय निकुञ्ज तयारी अवस्थामा रहेको छ । निकुञ्जले स्वदेशी तथा विदेशी पर्यटकलाई घुमाउन आफ्ना सबै वनपथ (बाटो) खुला राखेको जनाएको छ । पर्यटकको आगमनलाई ध्यानमा राख्दै निकुञ्ज मुख्यालय ओभरी र कोहलपुरस्थित सेक्टर कार्यालयबाट जुनसुकै समयमा पनि टिकट काट्ने व्यवस्था मिलाइएको कार्यालयले जनाएको छ ।
निकुञ्जका प्रमुख संरक्षण अधिकृत मनोजकुमार शाहले निकुञ्ज क्षेत्रमा पर्यटकले दुर्लभ पाटेबाघसहित आहारा प्रजातिका वन्यजन्तु अवलोकन गर्नसक्ने अवस्था रहेको सुनाए । ‘निकुञ्जभित्रका प्रायः वनपथ अहिले चालु अवस्थामा छन, पर्यटक घुम्न आउनुभयो भने हामी कुनै पनि कुराको कमी हुन दिँदैनौं,’ उनले भने, ‘निकुञ्जभित्र बाघको संख्या चारबाट बढेर अहिले २५ वटामा पुगेको छ, आहारा प्रजातिको संख्या पनि बढेको छ ।’
गर्मी याममा निकुञ्जभित्र वन्यजन्तुलाई पिउने पानी अभाव हुन नदिन चालु आवमा पनि थप दुईवटा पोखरी निर्माण गर्न लागेको शाहले जानकारी दिए । ‘निकुञ्जको जलसैनी क्षेत्रमा बाघले पौडी खेलेको चाँडै हेर्न पाइयोस् भन्ने अपेक्षामा छौं, हामीले जलाशय र सिमसारको विकास गर्दै जाने योजना अगाडि बढाइरहेका छौं,’ उनले भने ।
स्थापनाको १३ वर्षसम्म निकुञ्ज क्षेत्रमा संरक्षणसँगै पूर्वाधार निर्माणको काम भएको र अब भने पर्यटन प्रवद्र्धनको कामलाई केन्द्रमा राखिएको प्रमुख संरक्षण अधिकृत शाहले बताए । निकुञ्जभित्र वन्यजन्तु अवलोकनका लागि मँचान, घाँसे मैदान, कृत्रिम पोखरी, वनपथजस्ता पूर्वाधार निर्माण गरिएको कार्यालयले जनाएको छ ।
उनले भने, ‘यसअघि कुनै पनि वर्षमा पाँच सयभन्दा बढी पर्यटक यहाँ घुम्न आएको अवस्था छैन, अब भने कम्तीमा दुई हजारभन्दा बढी पर्यटकको संख्या र्पुयाउने प्रयासमा छौं, पर्यटनलाई हामी केन्द्रबिन्दुमा राखेर काम गरिरहेका छौं ।’ दुर्लभ पाटेबाघ संरक्षण गर्ने उद्देश्यले २०६७ सालमा स्थापना भएको यो मुलुककै कान्छो राष्ट्रिय निकुञ्ज हो ।
