कोहलपुर : बाँकेको कोहलपुर नगरपालिका वडा नम्बर १४ स्थित ‘योयो प्लाइउड’ इण्डष्ट्रिज प्रा.लि.मा ट्रेड युनियन गठन गर्न खोजेपछि उद्योगका मजदुर नै बिरोधमा उत्रिएका छन् । विगत ४ वर्षदेखि सञ्चालनमा रहेको उक्त उद्योगमा कोहलपुर नगरपालिका वडा नम्बर १४ ढोरपुर र ठाडागाउँ लगायत भारतका गरी ३ सय बढी मजदुरले काम गर्दै आएका छन ।
उद्योगमा हाल कार्यरत नरहेका गैरमजदुरको समेत नाम राखेर जबरजस्ती ट्रेड युनियन गठन गर्न खोजेपछि उद्योगमा कार्यरत अधिकांस मजदुर बिरोधमा उत्रिएका हुन् । मजदुरको सहमति बिना नै उद्योगमा कार्यरत नरहेका व्यक्तिको फर्जी नाम राखेर गठन गरिएको ट्रेड युनियन खारेजीको माग गर्दै उद्योगका मजदुरले सोमबार दिनभर नेपालगन्जस्थित श्रम कार्यालय घेराउ गरेका थिए । उद्योगमा कार्यरत मजदुर सुर्जा कार्की भण्डारीले आफुलाई ट्रेड युनियन नभई रोजगारी चाहिएको बताइन् ।
‘ट्रेड युनियन गठन भएर धेरै सेवा सुविधा मागेपछि उद्योग बन्द भयो, उद्योग बन्द हुँदा हाम्रो रोजगारी पनि बन्द हुन्छ,’ उनले भनिन् ‘हामीलाई ट्रेड युनियन चाहिएको होईन, रोजगारी चाहिएको छ, त्यसैले ट्रेड युनियन खारेजीको माग गरेका हौं ।’ उद्योगमा कार्यरत स्थानीय युवा राधेश्याम खटिकले ट्रेड युनियनका नाममा आन्दोलन गरेर बल्ल तल्ल चलेको उद्योग बन्द गराउने षडयन्त्र भएकाले आफुहरु ट्रेड युनियन खारेजीको माग गर्दै श्रम कार्यालय पुगेको बताए ।
स्थानीय रामछबिले खटिकले उद्योग बन्द हुँदा सबैभन्दा बढि मारमा आफुहरु पर्ने भएकाले भर्खर सञ्चालनमा आएको उद्योगमा कुनैपनि राजनीतिक आस्थाका आधारमा ट्रेड युनियन गर्न भन्दापनि उद्योगलाई स्थापित गर्न मजदुर लाग्नुपर्ने बताए । उक्त उद्योगमा नेकपा माओवादी केन्द्र निकट अखिल नेपाल औद्योगिक मजदुर संघले शान्ति रानाको नेतृत्वमा मजदुर संघ गठन गरेको छ । उद्योगका प्रबन्धक पूर्णबहादुर बिष्टले संघको नेतृत्व गरेकी राना सहितका अधिकांश सदस्यहरु उद्योगमा कार्यरत नै नरहेको बताए ।
उद्योगमा कार्यरत नै नरहेका फर्जी नामको छानविन नै नगरी श्रम कार्यालयले ट्रेड युनियन गठन गरेकोमा उनको आपत्ति छ । उद्योगमा कार्यरत सबैजसो मजदुरले ट्रेड युनियन खारेजीको माग गर्दै श्रम कार्यालयमा पुग्दा समेत कार्यालय प्रमुखले कमल पौडलले गैरजिम्मेवार व्यवहार देखाएको उनको आरोप छ ।
ट्रेड युनियनकी अध्यक्ष रानाले मजदुरहरुको हकहितकै लागि आफुहरुले ट्रेड युनियन खोलेको बताएकी छन् । ट्रेड युनियनको पक्षमा लाग्ने मजदुरलाई उद्योगले कामबाट निकालेको उनको आरोप छ । ट्रेड युनियन गठनसँगै उद्योगका मजदुरहरु नै विभाजित भएका छन् । अधिकांश मजदुरहरु उद्योग नियमित सञ्चालन गरी आफ्नो रोजगारी सुनिश्चित हुनुपर्ने माग गर्दै ट्रेड युनियन खारेजीको पक्षमा लागेका छन् ।
ट्रेड युनियन खारेजीको माग गर्ने मजदुरलाई ट्रेड युनियनका नेताले डरत्रास र धम्की दिने गरेको उद्योगमा कार्यरत मजदुर कोहलपुर १५ निवासी शोभाराम यादवले दुखेसो पोखे । ट्रेड युनियन गठनका नाममा आन्दोलन र धम्कीले कथमकदाचित उद्योग बन्द भएमा यहाँका ३ सय बढी मजदुरको रोजगारी गुम्ने भएकाले आफुहरु चिन्तित रहेको यादवले सुनाए ।
