बाँके (बैजनाथ) : बाँकेको बैजनाथमा बन्न लागेको लुम्बिनी प्रदेश स्तरको ‘नौवस्ता औद्योगिक क्षेत्र’ निर्माण सँग–सँगै बस्ती ब्यवस्थापन गर्ने बाटो खुलेको छ । निर्माणाधिन औद्योगिक क्षेत्र आसपासको मानव बस्तीका कारण औद्योगिक क्षेत्र निर्माणको काम लामो समयदेखी रोकिएको थियो ।
मानव बस्तीलाई ब्यवस्थापन गरेर औद्योगिक क्षेत्र निर्माणका लागि पुनः नक्सांकन गरिएकोमा कुल ३ सय ३८ विघा मध्ये भोग चलन गरिरहेका स्थानीय बासिन्दालाई ५५.६ विघा जग्गा उपलब्ध गराइने भएको हो । उक्त जग्गा उपलब्ध गराउन बैजनाथ स्थानीय सरकार, जनप्रतिनिधि, संघ र प्रदेशका सांसद, स्थानीय राजनीतिक दल, औद्योगिक क्षेत्र ब्यवस्थापन लिमिटेड लगायत सहमत भएका छन् ।
स्थानीयलाई जग्गा उपलब्ध गराउनका लागि छुट्याइएको ५५.६ विघा जग्गा राष्ट्रिय भूमी आयोगमा लैजान नेपाल सरकार मन्त्री परिषद बैठकले चाडै निर्णय गर्नेछ । मन्त्री परिषदको निर्णयपछि आयोगले उपभोग गरिरहेकाहरुलाई जग्गा प्रदान गर्ने निर्णय गर्नेछ । बैजनाथ गाउँपालिका अध्यक्ष प्रकाशबहादुर शाहीले योसँगै औद्योगिक क्षेत्र आसपासको मानव बस्ती ब्यवस्थापनमा बाटो खुलेको बताए ।
निर्माणाधिन औद्योगिक क्षेत्रमा रहेको जग्गा मध्ये सशस्त्र प्रहरी बल नौवस्तालाई २० विघा र क्षेत्रीय कारागारलाई १० विघा जग्गा छुट्याइएको छ । ‘मानव बस्ती ब्यवस्थापन हुन नसक्दा औद्योगिक क्षेत्र निर्माणको कामले गति लिन नसकिरहेको अवस्थामा अब चाडै काम अगाडी बढ्ने हामीलाई विश्वास छ,’ अध्यक्ष शाहीले भने ।
साविकको क्षेत्रफल घटेपछि नौवस्ता औद्योगिक क्षेत्रको नाममा अब २ सय ५३ विघा जग्गा कायम हुने भएको छ । बैजनाथ गाउँपालिका वडा नम्बर ३ का वडाअध्यक्ष निखिल बैगारले तिहार लगत्तै बस्तीको नक्सांकन कायम गरेर बाटो निकाल्ने बताए । उनले भने, ‘स्थानीय बासिन्दाका लागि छुट्याएको जग्गाको विषयमा नेपाल सरकारको क्याबिनेट बैठकले निर्णय गर्छ, त्यसपछि राष्ट्रिय भूमी आयोगमार्फत जग्गा हस्तान्तरण गरिन्छ ।'
