नेपालगन्ज : श्रम र यौन शोषणमा परेर बेपत्ता भएका ३ सय ७० जनाको अवस्था अज्ञात रहेको छ । सन् २०२४ मा हराइरहेका ति ब्यक्तीको खोजीका लागि माइती नेपाल नेपालगन्जमा निवेदन परेको हो । कुल ७ सय ७७ जनाको खोज तलासका लागि निवेदन परेकोमा ४ सय ७ जना मात्र फेला परेको माइती नेपाल नेपालगन्जका प्रमुख केशव कोइरालाले जानकारी दिए ।
नेपालगन्जमा मंगलबार वार्षिक तथ्यांक सार्वजनिक गर्दै कोईरालाले यस्तो जानकारी दिएका हुन् । मानब बेचबिखनका घटना सम्बन्धी ३ वटा मुद्धा दर्ता भएका छन् । प्रमुख कोइरालाका उनका अनुसार जोखिमपूर्ण यात्रामा परेका ५ सय ९८ जनालाई सिमानाका क्षेत्रबाट उद्धार गरिएको छ । यसैगरी ६ सय १३ जनालाई मानव बेचबिखन र सुरक्षित बसाई सराईबारे जानकारी दिई पारिवारीक पुर्नमिलन गराइएको छ ।
यस्तै श्रम र यौन शोषणमा परेका १३ जनालाई उद्धार गरिएको कोइरालाले जानकारी दिए । सिमाबाट परामर्श दिएर ४ सय ३८ जनालाई घर फिर्ता गरिएको छ । त्यसैगरी घरेलु हिंसा सम्बन्धी १२ वटा घटनाको निवेदन परेकोमा १० वटा घटना समाधान भएको छ । माइती नेपालले ३ जना किशोरीलाई सिपमुलक तालिम प्रदान गरेको छ ।
प्रमुख कोईरालाले पछिल्लो समयमा सामाजिक सञ्जाल फेसबुक, टिकटक, इन्ष्ट्राग्राम जस्ता माध्यमको दुरुपयोग गरेर दलालहरु मानव बेचबिखनमा सक्रिय रहेको बताए । माइती नेपालले मानव बेचबिखन नियन्त्रण गर्नका लागि सिमा नाकामा चेकजाँच गर्नुका साथै भारत लगायतका मुलुकमा बेचिएका र बेचबिखनको जोखिममा परेका महिला तथा बालबालिकालाई उद्धारका निम्ति काम गर्दै आएको कोइरालाले सुनाए । उनले तीनै तहका सरकारसँग समन्वय गरेर मानव बेचबिखन नियन्त्रण सम्बन्धी काम गरिरहेको बताए ।
नेपाल पत्रकार महासंघ बाँकेको समन्वयमा गरिएको अन्तरक्रियामा शाखा अध्यक्ष नविन गिरीले मानव बेचबिखन विरुद्ध पत्रकार तथा सञ्चारकर्मीले आवाज बुलन्द गर्नुपर्ने बताए । मानब बेचबिखन विरुद्ध प्रत्येक नागरिक सजग हुन जरुरी रहेको उनको भनाई छ । सो क्रममा वरिष्ठ पत्रकार निरज गौतम, अर्जुन ओली, दुर्गा रोकाय, विजय मल्ल लगायतले जिज्ञासा राखेका थिए ।
