पाठेघरको मुखको क्यान्सर विरुद्ध बैजनाथमा 'एचपिभी खोप अभियान' सुरु

स्वास्थ्य

Home
स्वास्थ्य
पाठेघरको मुखको क्यान्सर विरुद्ध बैजनाथमा 'एचपिभी खोप अभियान' सुरु

पाठेघरको मुखको क्यान्सर विरुद्ध बैजनाथमा 'एचपिभी खोप अभियान' सुरु

बाँके (बैजनाथ) : पाठेघरको मुखको क्यान्सर विरुद्ध बैजनाथ गाउँपालिकामा बुधबारदेखी एचपिभी खोप अभियान सुरु गरिएको छ । प्रमुख अतिथी एवम् बैजनाथ गाउँपालिका अध्यक्ष प्रकाशबहादुर शाहीले बुधबार विभिन्न खोप केन्द्रमा पुगेर अभियानको शुभारम्भ गरेका हुन् । अभियान शुभारम्भ गर्दै उनले लक्षित उमेर समुहका कोही पनि किशोरीहरु खोप लगाउनबाट छुट्न नहुनेमा जोड दिए ।

बैजनाथ स्थानीय सरकारले लक्षित उमेर समुहका शत प्रतिशत किशोरीलाई खोप लगाउन आवश्यक गृहकार्य गरेको अध्यक्ष शाहीले बताए । आफुले एचपिभी खोपका विषयमा नियमित रुपमा चासो राखेर गाउँपालिकाको स्वास्थ्य शाखालाई आवश्यक निर्देशन दिइरहेको उनको भनाई छ । सरकारको राष्ट्रिय अभियान अन्तरगत यही माघ २२ गतेदेखी देशभर खोप लगाउन सुरु गरिएको हो । जिल्लामा दुई चरणमा सञ्चालन गरिएको खोप कार्यक्रम अन्तरगत बैजनाथ सहित केही स्थानीय तहमा भने बुधबारबाट खोप अभियान सुरु गरिएको छ ।

माघ २२ गतेदेखी फागुन १ गतेसम्म नेपालगन्ज, कोहलपुर, खजुरा र जानकीमा सञ्चालन गरिएकोमा बुधबारदेखी बैजनाथसहित राप्ती सोनारी, डुडुवा र नरैनापुरमा सुरु गरिएको छ । आगामी फागुन ८ गतेसम्म चल्ने अभियान अन्तरगत बैजनाथका सामुदायिक र संस्थागत बिद्यालयको कक्षा ६ देखी १० सम्म अध्ययनरत ३ हजार ९ सय ३३ जना र १० देखी १४ वर्ष उमेर समुह (बिद्यालय बाहिर) का ३५ जना किशोरीलाई उक्त खोप लगाउने कार्यक्रम रहेको स्वास्थ्य शाखा प्रमुख लक्ष्मण शाहीले जानकारी दिए ।

बैजनाथका ४७ वटा सामुदायिक र संस्थागत बिद्यालयमा खोप कार्यक्रम सञ्चालन गरिदैछ । खोप अभियान सञ्चालन गर्नुअघि स्वास्थ्य शाखाले बैजनाथका ८ वटै वडाका जनप्रतिनिधि, नागरिक समाज, राजनीतिक दल, सञ्चारकर्मी लगायतसँग छलफल तथा अन्तरक्रिया गरेको थियो ।

प्रकाशित मिति: बुधबार, माघ ३०, २०८१ २२:१९

प्रतिक्रिया दिनुहोस्