कर्णालीको बजेट सर्वसम्मत पारित

अर्थ

Home
अर्थ
कर्णालीको बजेट सर्वसम्मत पारित

कर्णालीको बजेट सर्वसम्मत पारित चालूतर्फ सात अर्ब ७९ करोड र पूँजीगततर्फ १९ अर्ब ९८ करोड बजेट

सुर्खेत : कर्णाली प्रदेश सभाको शुक्रबारको बैठकले कर्णाली प्रदेश सरकारको आगामी आर्थिक वर्ष २०८२/०८३ को बजेट सर्वसम्मतले पारित गरेको छ । उक्त बैठकमा सभामुख नन्दा गुरुङले कर्णाली प्रदेश सभा नियमावली २०८१ नियम १४१ को उपनियम १२ बमोजिम आर्थिक मामिला तथा योजनामन्त्री राजीवबिक्रम शाहलाई आगामी आर्थिक वर्ष २०८२/०८३ को समग्र बजेट पारित गरियोस् भनी सभामा प्रस्ताव गर्न समय दिएका थिए ।

योजना मन्त्री शाहले कर्णाली प्रदेश विनियोजन विधेयक र आर्थिक विधेयक, २०८२ लाई पारित गरियोस् भनी प्रस्ताव प्रस्तुत गरेका थिए । उक्त प्रस्तावसँगै आगामी आर्थिक वर्ष २०८२/८३ को बजेट सर्वसम्मतले पारित भएको सभामुख गुरुङले घोषणा गरेकी हुन् । बैठकमा मन्त्री शाहले जलस्रोत तथा ऊर्जा विकास मन्त्रालयअन्तर्गत अर्थ वित्तीय व्यवस्थामा विनियोजित ११ करोड ५० लाख रकमलाई विभिन्न योजनाहरूमा विनियोजन गरी कार्यान्वयन गर्न प्रदेशसभामा विशेष प्रस्ताव पेस गरेका थिए ।

आगामी आर्थिक वर्षका लागि प्रदेश सरकारले असार १ गते ३२ अर्ब ९९ करोड ६६ लाख ५५ हजारको बजेट ल्याएको थियो । कुल विनियोजित बजेटमध्ये चालूतर्फ सात अर्ब ७९ करोड ९१ लाख एक हजार (२३.६४ प्रतिशत) र पूँजीगततर्फ १९ अर्ब ९८ करोड २७ लाख १३ हजार (६०.५५ प्रतिशत) बजेट सरकारले विनियोजन गरेको छ ।

प्रकाशित मिति: शनिबार, असार २१, २०८२ ०८:२२

प्रतिक्रिया दिनुहोस्