बैजनाथका किसानलाई ७० प्रतिशत अनुदानमा ई-लोडिङ रिक्सा वितरण

अर्थ

Home
अर्थ
बैजनाथका किसानलाई ७० प्रतिशत अनुदानमा ई-लोडिङ रिक्सा वितरण

बैजनाथका किसानलाई ७० प्रतिशत अनुदानमा ई-लोडिङ रिक्सा वितरण

बाँके (बैजनाथ) : बैजनाथ गाउँपालिकाले किसानसँग पालिका प्रमुख कार्यक्रम अन्तर्गत ११ जना किसानलाई ई-लोडिङ रिक्सा वितरण गरेको छ । आर्थिक वर्ष २०८१/०८२ मा किसानसँग पालिका प्रमुख कार्यक्रमका लागि विनियोजन गरिएको बजेटबाट छनोटमा परेका किसानलाई ७० प्रतिशत अनुदानमा रिक्सा प्रदान गरिएको हो ।

ई-लोडिङ रिक्सामा अनुदान दिनका लागि गाउँपालिकाले उक्त आर्थिक वर्षमा ३० लाख रुपैयाँ बजेट विनियोजन गरेको थियो । ‘किसानले उत्पादन गरेको तरकारी र खाद्यन्न बालीलाई रिक्सामा लोड गरी बजारसम्म लगेर बिक्री गर्न अब धेरै नै सहज हुनेछ,' अध्यक्ष प्रकाशबहादुर शाहीले भने ।

गाउँपालिका कार्यालय रामपुरमा बुधबार आयोजित वितरण कार्यक्रममा अध्यक्ष शाहीले आफुहरु निर्वाचित भएर आईसकेपछि किसानसँग पालिका प्रमुख कार्यक्रम नियमित रुपमा सञ्चालन हुदै आएको बताए । देशभरका ७ सय ५३ वटा स्थानीय तह मध्ये बैजनाथ गाउँपालिकाले मात्र वर्षेनी ठुलो परिमाणमा बजेट विनियोजन गरेर कृषिबाटै आर्थिक क्रान्ति ल्याउने सोच बनाएको बताए ।

गाउँपालिकाको कृषि शाखा प्रमुख प्रमोद कुमार विश्वकर्माले ई-लोडिङ रिक्सालाई सही काममा प्रयोग गर्न किसानलाई आग्रह गरे । उनले विभिन्न चरणका प्रक्रिया पुरा गरेर ई-लोडिङ रिक्सा वितरण गरिएको बताए । कार्यक्रममा उपस्थित भएका किसानहरु ई-लोडिङ रिक्सा ७० प्रतिशत अनुदानमा पाउँदा धेरै खुसी देखिएका थिए ।

बैजनाथ स्थानीय सरकारले किसानको उन्नती र प्रगतिमा साथ दिदै आएको उनीहरुको भनाई छ । वितरण कार्यक्रममा नेपाली कांग्रेस बाँकेका सभापति नारायणप्रसाद गौडेल, कृषि शाखाका कर्मचारीहरु, किसान लगायतको सहभागिता रहेको थियो ।