बाँके (फत्तेपुर) : राप्ती सोनारी गाउँपालिका वडा नम्बर ७ फत्तेपुरस्थित नन्कौपुरमा महिलाका लागि एक दिने निःशुल्क स्वास्थ्य शिविर गरिएको छ । नेपाली काँग्रेसका संस्थापक नेता एवम् पूर्वप्रधानमन्त्री स्वर्गी वीपी कोइरालाको ४३ औंँ स्मृति दिवसको अवसरमा नेपाली काँग्रेस क्षेत्र नम्बर १ बाँकेले आयोजना गरेको हो ।
शिविर सञ्चालनका लागि एचसीआरसी अस्पतालको प्राविधिक सहयोग तथा राप्ती सोनारी गाउँपालिकाको सहयोग रहेको थियो । कांग्रेस लुम्बिनी प्रदेश सदस्य एवम् पार्टीका प्रदेश स्वास्थ्य विभाग संयोजक अञ्जना पाण्डेको प्रमुख आतिथ्यता सम्पन्न उत्तः शिविरमा एक सय जना महिलाको निःशुल्क रुपमा स्वास्थ्य परीक्षण गरिएको क्षेत्रीय सभापति पोषणराज केसीले जानकारी दिए ।
मधेशी र थारु समुदायको उल्लेख्य बसोबास रहेको उक्त वडामा महिलाको प्रजनन तथा सामान्य स्वास्थ्यप्रति पहुँच र चेतना न्यून देखिएपछि महिलालाई नै लक्षित गरेर शिविर सञ्चालन गरिएको उनले बताए । शिविरमा एचसीआरसी अस्पतालकी स्त्री तथा प्रसुती (गाइनोलोजिष्ट) डा. मञ्जु बिसी शाह लगायतको टिमले महिलाको स्वास्थ्य परिक्षण गरेको थियो ।
स्वास्थ्य परीक्षणको क्रममा सहभागी एक सय जना मध्ये २५ जना महिलामा पाठेघर खस्ने, सेतो पानी बग्ने, बाँझोपन, महिनावारी लगायत समस्या देखिएको डा. बिसीले बताइन् । शिविरमा आएका महिलाको थप स्वास्थ्य परिक्षण र उपचारका लागि एचसीआरसी अस्पतालमा ५० प्रतिशत छुटमा सेवा दिने व्यवस्था गरिएको उनले जानकारी दिइन् ।
डा. बिसीका अनुसार प्रजनन स्वास्थ्य सम्बन्धी समस्याको समयमै उपचार नभएमा जटिल अवस्थामा पुग्ने सम्भावना रहन्छ । ग्रामीण क्षेत्रका महिलाहरूले प्रायः लाज, आर्थिक अभाव वा जानकारी कमीका कारण अस्पताल जान नचाहने भएकाले यस्ता शिविर अत्यन्त उपयोगी हुने उनले बताइन् ।
क्षेत्रीय सभापति के.सी.ले आगामी दिनमा पनि यस्ता शिविर अन्य ग्रामीण वडामा सञ्चालन गर्ने योजना रहेको बताए । ‘शरीरको समस्या लुकाएर बस्नु समाधान होइन, हामी समुदायमा पुगेर महिलासँग संवाद गर्दै उनीहरूको स्वास्थ्य, पोषण, मानसिक स्वास्थ्यलगायत विविध पक्षमा सशक्तीकरणका कार्यक्रम ल्याउनेछौं,’ उनले भने ।
क्षेत्रीय सभापति केसीको सभापतित्वमा सम्पन्न शिविर उद्घाटन कार्यक्रममा नेपाली कांग्रेसका नेताहरु हुर्मत न्यौपाने, राप्ती सोनारी गाउँपालिका उपाध्यक्ष मनिषासिंह थारु, कांग्रेस बाँकेका जिल्ला सदस्य देव खाँण, प्रदेश सभा-१ 'क' का सभापति अमर बुढाथोकी, प्रदेश सभा-१ 'ख' का सभापति बलराम शर्मा, नेपाली कांग्रेस राप्ती सोनारीका सभापति भिम रानाक्षेत्री लगायतको उपस्थिती रहेको थियो ।
